21 قاراشا, 09:14 321 0 زاڭ انار لەپەسوۆا

جامبىلدا كىسى ولتىرگەن قىلمىسكەر 21 جىلدان كەيىن ۇستالدى

جامبىل وبلىسى مويىنقۇم اۋدانىندا كىسى ولتىرگەن قىلمىسكەر 21 جىلدان سوڭ انىقتالىپ، ۇستالدى، دەپ حابارلايدى قازاقپارات.

بيىل 16 قاراشادا جامبىل وبلىسى مويىنقۇم اۋدانى پوليتسيا ءبولىمى قىزمەتكەرلەرى جۇرگىزگەن جەدەل-ىزدەستىرۋ شارالارىنىڭ ناتيجەسىندە 21 جىل بۇرىن كىسى ولتىرگەن مويىنقۇم اۋىلىنىڭ 61 جاستاعى تۇرعىنى انىقتالىپ، ۇستالدى. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى حابارلادى.

«كۇدىكتى ءوز تۇسىنىكتەمەسىندە اتالعان جاعدايدىڭ دوستارىمەن ىشىمدىك ءىشىپ، ەرەگەسىپ قالۋى سالدارىنان بولعانىن مالىمدەدى. ەرەگەس كەزىندە كۇدىكتى «يج» ماركالى 12-كاليبرلى قارۋدان وق اتىپ، ەر ادام وقيعا ورنىندا اجال قۇشادى. تەرگەۋ جۇمىستارىنىڭ بارىسىندا كۇدىكتىنىڭ كورسەتۋىمەن ءۇيىنىڭ اۋلاسىنان جەرلەنگەن ءمايىتتىڭ قالدىقتارى تابىلدى»،-دەلىنگەن ۆەدومستۆو حابارلاماسىندا.

سونىمەن قاتار، 1998 جىلى بولعان قىلمىستىق وقيعاعا قاتىستى وق داۋىسىن ەستىگەن كۋاگەردىڭ تۇسىنىكتەمەسى بار. ودان بولەك، كۇدىكتى 2013 جىلى ەرىكتى تۇردە قارۋ وتكىزۋ اكتسياسى اياسىندا وق اتىلعان قارۋدى مويىنقۇم اۋدانى ىشكى ىستەر بولىمىنە وتكىزگەنىن ايتتى. وتكىزگەنى تۋرالى مالىمەت اەك-عا تىركەلگەن. بۇگىندە اتالعان دەرەك بويىنشا قر قك-ءنىڭ 99-بابى 1-بولىمىمەن (كىسى ءولىمى) سوتقا دەيىنگى تەرگەۋ امالدارى جۇرگىزىلۋدە. سوت-مەديتسينالىق ساراپتاماسى تاعايىندالدى.

 

سوڭعى جاڭالىقتار