20 قاراشا, 15:56 290 0 زاڭ انار لەپەسوۆا

مەكتەپتەگى قىز زورلاۋ وقيعاسىنان كەيىن تارازدا 11 شەنەۋنىك جاۋاپقا تارتىلدى

تارازدا مەكتەپتە بولعان زورلاۋ وقيعاسىنان كەيىن وبلىستىق ءبىلىم باسقارماسىنىڭ باسشىسى ءوز ەركىمەن جۇمىستان كەتتى، دەپ حابارلايدى جامبىل وبلىسى اكىمىنىڭ ءباسپاسوز قىزمەتى. 

"قوعامدىق رەزونانس تۋدىرعان وقيعاعا بايلانىستى وبلىستىق ءبىلىم باسقارماسىنىڭ باسشىسى راحيا تۇرماحانبەتوۆا ءوز ەركىمەن جۇمىستان بوساتىلدى", - دەلىنگەن حابارلامادا.

ءباسپاسوز قىزمەتىنىڭ اقپاراتىنشا، وقۋشى قىزدىڭ زورلانۋىنان كەيىن باس-اياعى 11 ادام جاۋاپقا تارتىلعان.

جەرگىلىكتى پوليتسيا قىزمەتىنىڭ باستىعى، پوليتسيا پولكوۆنيگى مامىتبەكوۆكە، تاراز قالاسى پوليتسيا باسقارماسى ەكىنشى پوليتسيا ءبولىمىنىڭ باستىعى، پوليتسيا پولكوۆنيگى مۇساەۆقا، ەكىنشى پوليتسيا ءبولىمى جەرگىلىكتى پوليتسيا قىزمەتىنىڭ ءبولىم باستىعى، پوليتسيا پودپولكوۆنيگى تولەۋىشوۆكە، تاراز قالاسى پوليتسيا باسقارماسى ەكىنشى پوليتسيا ءبولىمى يۋۆەنالدىق پوليتسيا جۇمىسىن ۇيىمداستىرۋ جونىندەگى اعا ينسپەكتور، پوليتسيا مايورى يۋرينعا  قاتاڭ سوگىس جاريالاندى.

جالپى ءبىلىم بەرەتىن مەكەمەلەرگە بەكىتىلگەن كامەلەتكە تولماعانداردىڭ ىستەرى جونىندەگى ۋچاسكەلىك ينسپەكتور، پوليتسيا مايورى رىسباەۆ ىشكى ىستەر ورگاندارىنان شىعارىلدى. مەكتەپ ديرەكتورى سمانوۆا ءوز ەركىمەن جۇمىستان كەتتى.

سونىمەن قاتار، مەكتەپ ۆاحتەرى نۇرشاباەۆا، ديرەكتوردىڭ قۇقىقتىق ءىسى جونىندەگى ورىنباسارى وزبەكوۆا، دارەتحاناعا سۇرانعان وقۋشىنى جىبەرىپ، ساباق بىتكەنشە ىزدەمەگەن فيزيكا-ماتەماتيكا ءپانىنىڭ مۇعالىمى كيم، مەكتەپ ىشىندەگى كەزەكشىلىككە جاۋاپتى قازاق ءتىلى ءپانىنىڭ مۇعالىمى بايقۇلوۆا ءوز وتىنىشتەرى نەگىزىندە قىزمەتىنەن بوساتىلدى.

سۇمدىق جاعداي تۋرالى جاقىندا بەلگىلى بولدى. 7-سىنىپ وقۋشىسىن تاراز مەكتەبىنىڭ اۋماعىندا زورلادى.

مەكتەپ دارەتحاناسى دۇرىس جۇمىس ىستەمەگەن جانە بوتەن ادامعا ەشكىم نازار اۋدارماعان. اتا-انالار بۇل ءۇشىن مەكتەپ باسشىلىعىن جازالاۋدى تالاپ ەتتى.

كۇدىكتى ۇستالىپ، تەرگەۋ يزولياتورىنا قامالدى. پوليتسيانىڭ مالىمەتىنشە، ول  19 جىل بۇرىن ادام زورلاعانى ءۇشىن ءتورت جىل تۇرمەدە وتىرىپ شىققان.

كەيىن مەكتەپ قىزمەتكەرلەرىنىڭ جاپپاي جۇمىستان بوساتىلعانى بەلگىلى بولدى.

Nur Otan ءبىلىم باسقارماسىنىڭ باسشىلىعىن جازالاۋدى تالاپ ەتتى. پارتيا ءباسپاسوز قىزمەتىنىڭ اقپاراتىنشا، جامبىل وبلىسىندا مەكتەپ اۋلاسىنداعى دارەتحانالاردى جويۋ ماسەلەسى بۇعان دەيىن كوتەرىلگەن.

ء"بىزدىڭ كوزىمىزشە بىرنەشە مەكتەپتىڭ اۋلاسىنداعى دارەتحانالاردى ءسۇرىپ، قالعان ءبىلىم وشاقتارىندا دا جۇمىس جالعاسىن تابادى دەپ ەسەپ بەرگەن ەدى. بىراق بۇل تەك كوزبوياۋشىلىق بولىپ شىقتى. ءبىز ورىنداۋشىلاردى ەمەس، ءبىلىم باسقارماسىنىڭ باسشىلىعىن جاۋاپقا تارتۋ ماسەلەسىن كوتەرەمىز", - دەدى كەڭەس توراعاسىنىڭ ورىنباسارى دينارا زاكيەۆا.

قازىر كەڭەستىڭ ساراپشىلار توبى الماتىداعى 151 نىسانعا جاسالعان مونيتورينگتىڭ قورىتىندىسىن شىعارىپ جاتىر.

سوڭعى جاڭالىقتار