20 قاراشا, 15:29 302 0 ايماق انار لەپەسوۆا

پاۆلوداردا اباي مەن ەستايعا ەسكەرتكىش ورناتىلادى

كەلەر جىلى پاۆلودار قالاسىندا اباي مەن ەستاي بەركىمبايۇلىنا ەسكەرتكىش ورناتىلادى. بۇگىندە ەسكەرتكىشتەردىڭ ۇلگىسىن جاساۋ ءۇشىن مۇسىنشىلەر اراسىندا بايقاۋ وتكىزىلۋدە، دەپ حابارلايدى pavlodarnews.kz.

پاۆلودار قالاسى مادەنيەت جانە تىلدەردى دامىتۋ ءبولىمىنىڭ باسشىسى سامال بەگالينوۆا بايقاۋعا تەك پاۆلوداردىڭ عانا ەمەس، نۇر-سۇلتان، الماتى، قاراعاندى جانە اقتوبەنىڭ دە مۇسىنشىلەرى جۇمىستارىن ۇسىنعانىن اتاپ ءوتتى.

«الداعى جىلى ۇلى اقىن، اعارتۋشى ابايدىڭ 175 جىلدىعى اتالىپ وتەدى. رەسپۋبليكالىق دەڭگەيدە تويلاۋ بارىسىندا ابايعا ارنالعان ەسكەرتكىش جوق قالالاردا ءمۇسىن ورناتۋ ۇسىنىلعان. بۇل ەسكەرتكىشكە قاتىستى بايقاۋعا 8 مۇسىنشىدەن 11 ۇلگى كەلىپ ءتۇستى. ازىرگە ونىڭ ۇشەۋى ىرىكتەلىپ الىندى»، - دەدى سامال بەگالينوۆا.

ابايعا ارنالعان ەسكەرتكىش اباي-كريۆەنكو كوشەلەرىنىڭ قيىلىسىندا ورنالاساتىن بولادى.

سونىمەن قاتار، كورنەكتى ءانشى، اقىن-سازگەر، قازسسر-ءنىڭ ەڭبەك سىڭىرگەن ونەر قايراتكەرى ەستاي بەركىمبايۇلىنىڭ ەسكەرتكىشى وبلىس ورتالىعىنداعى قالالىق ساياباقتىڭ ەستاي-اكادەميك بەكتۇروۆ كوشەلەرىنىڭ قيىلىساتىن تۇسىندا ورىن تەپپەك.

«ەستاي اتامىزعا ارنالعان ەسكەرتكىشتىڭ ماسەلەسى 9 جىلدان بەرى كوتەرىلىپ كەلەدى. بايقاۋ بارىسىندا ەسكەرتكىشتىڭ 9 ۇلگىسى ۇسىنىلدى. ايتا كەتەيىك، قازاقتىڭ قوس تۇلعاسىنا ارنالعان ەسكەرتكىشتەرگە بيۋدجەتتەن تىس قارجى قاراستىرىلۋدا»، - دەدى ءبولىم باسشىسى.

 

سوڭعى جاڭالىقتار