19 قاراشا, 21:27 292 0 الەۋمەت انار لەپەسوۆا

ىلە الاتاۋىنداعى جوندەۋدەن وتكەن كەشەندى تۋريستەر قيراتىپ كەتتى

تۋريستەر ىلە الاتاۋى ۇلتتىق پاركىندە قايتا جوندەلگەننەن كەيىن ىسكە قوسىلعان ىستىق سۋ كەشەنىن قيراتتى. بۇل تۋرالى ۇلتتىق پاركتىڭ Facebook -تەگى پاراقشاسىندا حابارلاندى. 

«مادەنيەتسىز ادامداردىڭ مادەني دەمالىسى... جاقىندا ىستىق سۋ كەشەنى قايتا جاڭعىرۋدان سوڭ اشىلعان بولاتىن. تۋريزم تۋرالى قالاي ءسوز ايتۋعا بولادى دەگەن سۇراق تۋادى. 2 اپتانىڭ ىشىندە ادامدار سونشا قاراجات پەن ۋاقىت جۇمسالعان كەشەندى قيراتتى»، - دەلىنگەن الەۋمەتتىك جەلىدەگى جازبادا.

بۇل كەشەن 2016 جىلى دەمەۋشى كاسىپكەرلەردىڭ كومەگىمەن اشىلعان. «ەڭ العاش پايدالانۋعا بەرىلگەن كۇندەرى ادامدار قيراتا باستادى. سول كەزدە كامەرا ورناتتىق. ۆانداليزم توقتاعان سياقتى ەدى. ول جەردەن بوتەلكە، تەمەكى قالدىقتارىن كورۋگە بولادى»، - دەدى دەمەۋشىلەردىڭ ءبىرى سەرگەي سپيتسىن.

كەيىن كەشەن قايتا جوندەۋگە جابىلعان. الەۋمەتتىك جەلىدە جاريالانعان جازبادان سوڭ سۋعا تۇسەتىن بوشكە مەن دۋش كابيناسى قالپىنا كەلتىرىلدى. الماتى اكىمدىگىنىڭ كومەگىمەن سۋ كەشەنىنە جارىق تارتىلاتىن بولدى.

 

سوڭعى جاڭالىقتار