19 قاراشا, 10:43 283 0 رۋحانيات انار لەپەسوۆا

الماتىدا ءماۋلىت مەرەكەسى اتالىپ ءوتتى

قازاقستان مۇسىلماندارى ءدىني باسقارماسىنىڭ ۇيىمداستىرۋىمەن الماتىداعى رەسپۋبليكا سارايىندا ادامزاتتىڭ اسىلى پايعامبارىمىز مۇحاممەدتىڭ (وعان اللانىڭ سالاۋاتى مەن سالەمى بولسىن) تۋعان ايىنا ارنالعان ء"از  پايعامبار حاق جولى" اتتى مەرەكەلىك ءماۋلىت كەشى ءوتتى، دەپ حابارلادى قمدب-نىڭ ءباسپاسوز قىزمەتى.

ءماۋلىت كەشى قاراڭعىلىقتا قالعان ادامازاتتى جارىققا شىعارۋ ءۇشىن اللا تاعالا تاراپىنان جەبىرەيىل (ع.س.) پەرىشتەنىڭ مۇحاممەد پايعامبارىمىزعا (وعان اللانىڭ سالاۋاتى مەن سالەمى بولسىن) العاشقى ۋاحيدى اكەلۋى تۋرالى ارنايى ازىرلەنگەن بەينەبايانمەن باستالدى. كەيىننەن الماتى ورتالىق مەشىتىنىڭ ازانشىسى، قاري سەرىك پولاتحانۇلىنىڭ «الاق» سۇرەسىنىڭ العاشقى بەس اياتىن وقۋمەن، اقىن، سازگەر جاكەن وماروۆتىڭ قازاقشا ءماۋلىت جىرىن ايتۋمەن جانە قاناتبەك پولاتبەك، سەرجانالى الىبەك، ەرگەن ايتىمبەتوۆ، رايىم ۋايىستىڭ اسەم انىمەن جالعاستى.

ءماۋلىت كەشىن قمدب-نىڭ توراعاسى، باس ءمۇفتي سەرىكباي قاجى وراز حازىرەت سالتاناتتى تۇردە ءسوز سويلەپ اشىپ بەردى. باس ءمۇفتي ءوز سوزىندە پايعامبارىمىزدىڭ (وعان اللانىڭ سالاۋاتى مەن سالەمى بولسىن) ءماۋلىت ايىمەن الماتى جۇرتشىلىعىن قۇتتىقتاپ، اللا ەلشىسىنىڭ دۇنيەگە كەلىپ، عالامدى نۇرعا بولەۋى – ارتىنا ەرگەن ۇمبەتى ءۇشىن ۇلكەن قۋانىش ەكەنىن ايتتى. پايعامبارىمىزدىڭ عيبراتتى عۇمىرىنان سىر شەرتىپ، مۇسىلمانداردى ونىڭ كوركەم مىنەزىنەن ۇلگى الۋعا شاقىردى. سونداي-اق ماۋلىت مەرەكەسىن تويلاۋدىڭ ارتىقشىلىعى مەن پايعامباردى ءسۇيۋدىڭ، ونىڭ حاق جولىمەن ءجۇرۋدىڭ ماڭىزىنا توقتالدى.

ال "اق وردا" رەسپۋبليكالىق قوزعالىسىنىڭ توراعا ورىنباسارى قانات مۇساعۇلوۆ وسى قوزعالىستىڭ توراعاسى قايرات ساتىبالدىۇلىنىڭ قۇتتىقتاۋ ءسوزىن جەتكىزدى. كورەرمەن كوزايىمىنا اينالىپ ۇلگەرگەن، ادەمى ازىلدەرىمەن اقيقاتتى استارلاپ ايتىپ جۇرگەن "ونەر قىراندارى" ءازىل-سىقاق تەاترى "ساحابالاردىڭ پايعامبارعا دەگەن ماحابباتى", "پايعامبار مەكەنىنە ساعىنىش" اتتى تاربيەلىك ءمانى زور قويىلىمدارىن ەل نازارىنا ۇسىندى. ماقسات سابيتوۆ "كەشىر، ءيا، راسۋلاللا" اتتى اسەرلى مونولوگىن ورىنداسا، كەش سوڭى ەرگەن ايتىمبەتوۆ "پايعامبارعا سالاۋات" انىمەن اياقتالدى.

ەستەرىڭىزگە سالا كەتسەك، اقىن جاكەن وماروۆ وتكەن جىلى ورىنداعان ءماۋلىت جىرىندا پايعامبارىمىزدىڭ دۇنيەگە كەلۋى مەن قىرىق جاسقا دەيىنگى ءومىرىن بايانداعان ەدى. ال بيىلعى ءماۋلىت جىرى العاشقى ۋاحيدىڭ كەلۋىنەن باستاپ پايعامبارىمىزدىڭ مەككەدەگى ءدىندى جايۋى، ساحابالاردىڭ يسلام دىنىنە كىرۋى، ميعراج ساپارى، سوڭىندا مۇشرىكتەردەن جاپا شەككەن اللا ەلشىسىنىڭ ماديناعا قونىس اۋدارۋىمەن اياقتالدى. اللا بۇيىرسا، كەلەر جىلعى ماۋلىتتە پايعامبارىمىزدىڭ ءمادينا قالاسىندا وتكەن ءومىرى جىرلاناتىن بولادى.

بەز نازۆانيا (4).jpg

الماتىدا اتالىپ وتكەن بيىلعى ءماۋلىت مەرەكەسى 3 بىردەي جاڭالىعىمەن ەرەكشەلەندى.

ءبىرىنشى – وتكەن جىلعى ءماۋلىت مەرەكەسىندە كەش اتاۋىمەن بىردەي "تالىمگەر پايعامبار تاعىلىمى" اتتى كىتاپ جارىق كورىپ، ەلگە تاراتىلعان بولاتىن. سول سياقتى بيىل دا ءماۋلىت كەشىمەن اتتاس پايعامبارىمىزدىڭ حاق جولىن ۇيرەتەتىن ء"از پايعامبار حاق جولى" اتتى جاڭا كىتاپ شىعارىلىپ، كەش قوناقتارىنا ۇلەستىرىلدى. بۇل ءۇردىس الداعى ماۋلىتتەردە ءوز جالعاسىن تابادى دەگەن ۇمىتتەمىز.

ەكىنشى – ءماۋلىت كەشىنىڭ 2-سەانسىندا كورەرمەندەر اراسىندا ۇمرا قاجىلىعى ويناتىلدى. كورەرمەندەردىڭ اراسىن ەكى ادام، دەمەۋشىلەردىڭ كومەگىمەن، "حيكمەت-ترەۆل" قاجىلىق كومپانياسى ارقىلى ۇمرا قاجىلىعىنا باراتىن بولدى.

بەز نازۆانيا (3).jpg

ءۇشىنشى – رەسپۋبليكا سارايىنىڭ فويەسىندە پايعامبارىمىزدىڭ (وعان اللانىڭ سالاۋاتى مەن سالەمى بولسىن) ومىرىندە پايدالانعان زاتتارىنىڭ فوتو-گالەرەياسى، پايعامبارىمىزدىڭ اتا-تەك شەجىرەسى، قاسيەتتى قاعبانىڭ، "يبراھيم ماقامىنىڭ", سافا مەن مارۋانىڭ ماكەتتەرى جانە I LOVE MUHAMMAD (مەن پايعامبارىمدى جاقسى كورەمىن) كورنەكىلىگى قويىلدى. سونىمەن قاتار، قوناقتار پايعامبارىمىزدىڭ كالليگرافيالىق (كوركەم جازۋ) شەبەرلىكپەن جازىلعان ەسىمدەرىنىڭ كورمەسىن تاماشالادى.

سوڭعى جاڭالىقتار