18 قاراشا, 10:21 274 0 زاڭ انار لەپەسوۆا

پوليتسيا قىزمەتكەرىنىڭ باسىنان تاسپەن ۇرعان جۇرگىزۋشىنىڭ ەسىرتكى قولدانعانى انىقتالدى

ماڭعىستاۋ وبلىسىندا ماس جۇرگىزۋشى قىزمەتتىك مىندەتىن اتقارۋ كەزىندە پوليتسيا قىزمەتكەرىنىڭ باسىنان تاسپەن ۇردى، دەپ حابارلايدى Lada.kz. 

Cايتتىڭ ماڭعىستاۋ وبلىستىق پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ بەرگەن مالىمەتتەرى بويىنشا، وقيعا 15 قاراشا كۇنى ساعات 21-30-دار شاماسىندا بولعان.

اقتاۋ-شەتپە-بەينەۋ تراسساسىنىڭ بويىمەن كەلە جاتقان «Toyota Camry» جۇرگىزۋشىسى كولىككە يە بولا الماي، ونى اۋدارىپ العان. وسى ۋاقىتتا كۇندىزگى كەزەكشىلىگىن وتكىزىپ كەلە جاتقان پوليتسيا لەيتەنانتى جول-كولىك وقيعاسىن كورگەن سوڭ، زارداپ شەككەندەرگە كومەكتەسپەك بولعان.

«قۇقىق قورعاۋ ورگانىنىڭ قىزمەتكەرىنە ەشقانداي سەبەپسىز جول اپاتىنا تۇسكەن كولىكتىڭ جۇرگىزۋشىسى وتە دورەكى تۇردە تاپ بەرىپ، ونى باسىنان تاسپەن ۇرعان. پوليتسەي شەتپە اۋدانىنىڭ ورتالىق اۋرۋحاناسىنا قارالۋعا ءماجبۇر بولدى. Toyota Camry كولىگىنىڭ جۇرگىزۋشىسى دە مەديتسينا ماماندارىنىڭ كومەگىنە جۇگىندى. جول اپاتىنىڭ سالدارىنان ول جابىق باسسۇيەك جاراقاتىن الدى. سونداي-اق ونىڭ ميى شايقالىپ، كەۋدە كلەتكالارىنا زاقىم كەلگەن»،-دەپ حابارلاعان ۆەدومستۆونىڭ ءباسپاسوز قىزمەتى.

پوليتسيا قىزمەتكەرى مەن جول اپاتىنا تۇسكەن جۇرگىزۋشى مەديتسينالىق تەكسەرۋدەن ءوتتى. تەكسەرۋ ناتيجەسى بويىنشا جۇرگىزۋشى الكوگولدىك ىشىمدىك پەن كاننابينويد پرەپاراتتارىن قابىلداعاندىعى انىقتالدى. ال پوليتسيا قىزمەتكەرىنەن ەشتەڭە انىقتالمادى. وقيعا سوتقا دەيىنگى تەرگەۋ رەەسترىنە قر قىلمىستىق كودەكسىنىڭ 380 بابى، 1 بولىگى نەگىزىندە تىركەلدى. زاڭ بۇزعان جۇرگىزۋشىدەن ەشقايدا شىقپاۋ تۋرالى قولحات الىندى»،-دەلىنگەن پوليتسيا دەپارتامەنتىنىڭ اقپاراتىندا.

 

سوڭعى جاڭالىقتار