14 قاراشا, 10:12 603 0 ىشكى ساياسات Túrkistan Gazeti

قازاق اباي جولىمەن جۇرسە، اداسپايدى

مەملەكەت باسشىسى قاسىم-جومارت توقاەۆتىڭ جارلىعىمەن حاكىم ابايدىڭ 175 جىلدىق مەرەيتويى كەڭىنەن اتالىپ وتەتىن بولدى. ءبىرتۋار دانىشپاننىڭ مەرەيتويى قارساڭىندا ەلوردامىزدا تۇراتىن ابايتانۋشى عالىمداردى «تۇركىستان» ينتەللەكتۋالدىق وي-پىكىر كلۋبىنا شاقىرىپ، اڭگىمەلەسكەن ەدىك. ابايدى ناسيحاتتاۋ، دارىپتەۋ ىسىندە زور ۇلەسى بار قازاقستاننىڭ ەڭبەك سىڭىرگەن قايراتكەرى، جازۋشى سۇلتان ورازالين مەن ۇعا اكادەميگى، فيلوسوفيا عىلىمىنىڭ دوكتورى، پروفەسسور عاريفوللا ەسىم كەمەڭگەردىڭ شىن باعاسىن بەرۋ تۋرالى كەلەلى ويلارىن ورتاعا سالىپ، ابايدىڭ 175 جىلدىق مەرەيتويىن اتاپ ءوتۋ جونىندەگى مەملەكەتتىك كوميسسيانىڭ نازارىنا بىرقاتار ۇسىنىستارىن جولدادى.

Túrkistan: ەلوردامىزعا قونىس اۋدارىپ كەلگەندەگى العاشقى جيىندى اباي اتامىزدىڭ قۇرمەتىنە ارناۋدى ءجون كوردىك. سونىمەن، ابايدىڭ 175 جىلدىعىنا قىزۋ دايىندىق باستالىپ كەتتى. دەسە دە، بۇل تويدا نەنى ەسكەرۋىمىز كەرەك، نە ىستەلۋى ءتيىس؟ اڭگىمەنىڭ باسىن وسى ماسەلەدەن باستايىقشى.

سۇلتان ورازالين: ابايدىڭ 175 جىلدىق مەرەيتويىن جوعارى دەڭگەيدە اتاپ وتۋگە بايلانىستى ايتار وي، ۇسىنىس وتە كوپ. سوندىقتان ءبىزدىڭ بۇگىنگى تالقىمىز مەملە­كەتتىك كوميسسيانىڭ نازارىن اۋ­دارىپ، ويلاندىرۋى كەرەك. بۇگىندە گازەتتى بىرەۋ وقيدى، بىرەۋى وقىماي­­دى. دەگەنمەن ايتىلعان ءسوز ءبا­رىبىر ەلگە جەتىپ جاتادى. اباي ءتو­ڭىرەگىندەگى ايتىستار ءاربىر 10 جىل سايىن ابايدىڭ مەرەيتويىنىڭ قارساڭىندا شىعىپ تۇرادى. بۇل، مىسال ءۇشىن ابايدى جامانداعاننان ەمەس، ءبىزدىڭ قوعامىمىزدىڭ وسى 10 جىل سايىن جاڭا بۋىننىڭ وسۋىنەن، ءارتۇرلى ادامدار مەن توپتاردىڭ پايدا بولۋىنان، ءارتۇرلى ويلاردىڭ قالىپتاسۋىنان تۋىنداپ جاتادى. مۇنى سوتسيولوگتار، باسقا عىلىم وكىلدەرى دا زەرتتەي جاتار، بىراق مەنى الاڭداتاتىن نارسە سول ابايعا دەگەن ءبىزدىڭ ءوزىمىزدىڭ، حالقىمىزدىڭ قۇرمەتى. ابايدىڭ مىقتى ەكەندىگىنە داۋ جوق، اقىن ەكەندىگىنە داۋ جوق، بىراق ءالى كۇنگە دەيىن سول ابايعا دەگەن ءبىزدىڭ قوعامىمىزدا تۇراقتى پىكىر قالىپتاسپا­عان، وعان دەگەن زور سۇيىسپەنشىلىك ءبىر­جولاتا ورنىقتى دەپ ايتا الماي­مىن. بىرىنشىدەن، ابايدىڭ 125 جىل­دىعى قارساڭىندا «اباي نار­كومان ەكەن»، «اباي اناۋ ەكەن»، «اباي مىناۋ ەكەن» دەگەن ءتۇرلى ماقالالار جازىلدى. ابايدى قايتسە دە ەتەكتەن تارتقىسى كەلەتىندەر كوپ. 150 جىلدىقتىڭ قارساڭىندا دا سونداي ءارتۇرلى پىكىرلەر تاراتتى. سىرتقى جۇرتتىڭ دا، ىشكى ءوزى­مىز­دىڭ قازاقتىڭ رۋلىق، ءيا بولماسا، جەر­شىلدىك ورەسىنە شىققان پىكىرلەر بولدى.

ەندى 175 جىلدىعى تويلاناردىڭ الدىندا ابايدىڭ تۋعان كۇنىن كوكپارعا سالا باستادى. ابايدىڭ تۋعان كۇنى – 10 تامىز ەمەس ەكەن، 23 تامىز دەپ ۋلاپ-شۋلاپ جاتىر. بو­ل­ىمسىز نارسە، تۇككە تۇرمايدى. ونى مەن سول كەزدە-اق ايتتىم، ايتقان پىكىرىم گازەتتەرگە شىقتى. قا­زىر بۇل ماسەلە اياقتالدى، بۇل ءما­سەلە تياناقتالدى. رەسمي تۇردە كوپ عالىمدارمەن ءبارىمىز وتىرىپ سوعان قول قويىپ، ماسەلەنىڭ سوڭعى نۇكتەسىن قويدىق. سونىمەن، ەندى گازەت-جۋرنالدىڭ بارىندە ابايدىڭ تۋعان كۇنى – 10 تامىز دەپ جازىلاتىن بولدى. سىزدەردى وسى شەشىممەن كەلىسەدى دەپ ويلايمىن. سوندىق­تان جالعىز ابايىمىزدى ولاي-بۇ­لاي  كوكپارعا سالماي-اق قويايىق، بۇل – ءبىر. ەكىنشىدەن، ابايدىڭ تويىن، 175 جىلدىعىن قالاي وتكىزەمىز؟ ءوزىم باسقاسىن ايتپاعان­دا، مۇحتاردىڭ 3 تويىن، ءشا­كارىم­نىڭ 2 تويىن، ابايدىڭ 3 تويىن كوردىم. 125 جىلدىعىن، 150 جىل­دىعىن، ەندى، مىنە قۇداي جەت­كىز­سە، 175 جىلدىعىن دا كورەمىز بە دەگەن ءۇمىتىمىز بار. ونىڭ ىشىندە 140 جىلدىعىندا دە­لەگاتسيانى ءوزىم باسقارىپ بارىپ، باسى-قاسىندا بولدىم. ول كەزدە ورتالىق كوميتەتتە ادەبيەت سەكتورىن باسقاراتىنمىن. 40-50 ادام شەتتەن كەلدى، ءوزىمىزدىڭ باۋىرلاس ەلدەردەن كەلدى. تاۋەلسىزدىك تاريحىنداعى ۇلكەن توي بولدى. قالاي دەسەك تە، حاكىمنىڭ 150 جىلدىعى ۇلى توي بولدى. مەملەكەت تە ودان ايانعان جوق، بارىن سالىپ، قارجىنى مولىنان توكتى. مىسال ءۇشىن تاۋەلسىزدىكتىڭ باستاپقى جىلدارىندا حالىقتىڭ رۋحى وتە جوعارى ەدى، اش-جالاڭاش ءجۇرىپ، تۇگى جوق، جۇمىسى جوق، جالاقى ماردىمسىز كەزدىڭ وزىندە ەل توي تويلادى. ابايدىڭ تويىن ەكىنشى دۇنيەجۇزىلىك سوعىستان كەيىن دە اش-جالاڭاش ءجۇرىپ 1945-1946 جىلدارى حالىق تويلاعان. ونىڭ كولەمى 150 جىلدىقتاعىداي بولماسا دا، سول تويعا قازاقتىڭ زيالى ادامدارىنىڭ ءبارى قاتىسقان-دى. ال مىنا 150 جىلدىق توي كولەمى جاعىنان ۇلكەن توي بول­دى. بىراق سول تويدا ۇلكەن كەم­شى­لىكتەر بولدى. باستى كەمشىلىكتەر ۇيىمداستىرۋ ماسەلەلەرىنەن كەتكەن. ەندىگىدە سونداي قاتەلىكتەرگە جول بەرمەۋىمىز كەرەك. تويدىڭ نەگىزگى ماقساتى – ابايدىڭ ابىرويىن كوتەرۋ. مەن ءىشىپ-جەۋدى ايتىپ وتىرعانىم جوق. سول جەردە قانداي ويىندار وينالادى، قانداي ۇلتتىق داستۇرلەر سول تويدىڭ ىشىندە قولعا الىنادى، ونى قالاي كورسەتەدى، قاي جەردە قالاي بولادى؟ مىنە، وسى ماسەلەلەردىڭ بارلىعىنىڭ تولىق ستسەناريى بولۋى كەرەك. ءداستۇرلى جارىستار بولاتىن شىعار، قالىڭ ءۇي تىگىلەدى ءبارىبىر، ونسىز بولمايدى. ونىڭ جانىندا جاسالاتىن ۇلتتىق ويىنداردىڭ، ۇلتتىق داستۇرلەردىڭ قاندايىن جاساۋ كەرەك، ونى ەسكەرۋ كەرەك. سوندىقتان وسى تويدا اباي تۋرالى كىم سويلەيدى، كىم بايانداما جاسايدى ءبارى-ءبارى ەرتەرەك ويلاستىرىلۋى كەرەك. مادەنيەت مينيسترلىگىنىڭ جاۋاپتىلارى بۇل ماسەلەگە ءاتۇستى قاراماي، ءمان بەرىپ كىرىسپەسە بولمايدى. ابايدى شەتەلگە تانىتۋدا «سامودەياتەلنىي» كونتسەرتتىڭ بارلىعىن توقتاتۋ كەرەك. الەمگە ءبىز ابايدى تانىتامىز دەيمىز دە، كەرىسىنشە ماسقارالاپ جۇرەمىز. اباي – پروفەسسيونال اقىن. اباي – ۇلى اقىن. ابايدىڭ دارەجەسىنە ەڭ تاڭداۋلى دەگەن انشىلەرىمىزدى، تاڭداۋلى ونەر ادامدارىمىزدى اپارۋىمىز كەرەك. دەلەگاتسيا قۇرامى از بولسىن، توپىرلاتىپ 50-60 ادامدى اپارۋ قاجەت ەمەس. قازىرگى قۇرىلعان كوميسسيا ابايدىڭ تويىن لايىقتى اتاپ وتۋگە ناقتى باعدارلامامەن ىستەيدى دەپ ويلامايمىن. ويتكەنى كوميسسيا قۇرامىنداعىلاردىڭ ءتىزىمىن كورىپ وتىرمىن. بارلىعى اكىمقارالار، شەنەۋنىكتەر. ولار ۇيىمداستىرۋ جۇمىستارىنا كەرەك، بىراق سول توپقا ابايدى شىن قۇرمەتتەي­تىن، تانىتاتىن عالىم، جازۋشىلاردى تارتۋ كەرەك ەدى.

عاريفوللا ەسىم: ابايدىڭ 175 جىلدىق مەرەيتويىن تويلاعان كەزدە اباي تۋرالى جۇرەگىمىزدى تىلگە بيلەتپەۋىمىز كەرەك. ءتىل ايتا بەرەدى ەمەس پە! جۇرەك ءسوزىن سويلەۋىمىز كەرەك. مىسالى، ءبىز «ۇلى اباي» دەيمىز. مۇنىمىز دۇرىس پا؟ ەگەر ءبىز اللا تاعالانى مويىنداساق، ول ۇلى بولاتىن بولسا، ءبىز نەگە بۇلاي دەپ ايتامىز؟ ابايدى «ۇلى» دەپ شاكارىم دە ايتقان جوق، ماعجان دا ايتقان جوق. ءبارى حاكىم دەدى. «التىن حاكىم ابايعا» دەدى ماعجان. «ۇلى» دەگەن ءسوز كەيىننەن شىققان. «ۇلىلاردىڭ مەكەنى» دەيدى، ول دا دۇرىس ەمەس، «عۇلامالاردىڭ مەكەنى». حاكىم اباي، دانىشپان شاكارىم، كەمەڭگەر مۇحتار، ەر ماحامبەت، عالىم شوقان، ۇستاز ىبىراي دەپ ايتۋىمىز كەرەك. ايتپەسە، كەشەگى ارىستاردىڭ ۇلى دەگەنگە ءتىلى كەلمەدى ەمەس كەلدى، بىراق ولار ابايدى «حاكىم»، «باس اقىن» دەپ باعالاپ، حالىقتىق سيپاتقا كوتەرۋگە قىزمەت ەتتى. بۇل – ءبىر. ەكىنشى – اباي اعارتۋشى دەگەندى توقتاتۋ كەرەك، اباي – ويشىل. اعارتۋشى دەگەن ىبىراي اتامىز بولادى. ول مەكتەپ اشتى، كىتاپ شىعاردى، وقۋلىق جازدى، بالا وقىتتى. ال اباي ەشقاشان اعارتۋ ىسىمەن اينالىسقان جوق. اباي – ۇستاز، ويشىل. اسقان دانا، كەمەڭگەر. ابايدىڭ باعاسىن ويشىلدىقپەن ولشەۋىمىز لازىم.

ابايدىڭ مەرەيتويى، ارينە تۋعان جەرىندە وتەدى، كيىز ءۇي تىگىلىپ، ات شابىس، الامان بايگە بارلىعى بولماسا، حالىق ونى توي دەپ ەسەپتەمەيدى. مەرەيتويدى وتكىزگەندەگى ماقسات نە دەگەنگە تاعى قايتىپ كەلەمىز.

Túrkistan: مەرەيتوي اياسىندا اباي تۋعان توپىراقتا قانداي جۇمىستار اتقارىلۋى كەرەك؟

سۇلتان ورازالين: ابايدىڭ 150 جىلدىق مەرەيتويى قارساڭىندا دانىشپاننىڭ كەسەنەسى سالىندى. اباي كەسەنەسىن كەشەن تۇرىندە سالۋ يدەياسى اسپاننان كەلگەن جوق. ءفيرداۋسيدىڭ ەسكەرتكىشىنە ۇقساس سالدى. مەن ول ەسكەرتكىشتى ءوزىم بارىپ كورگەنمىن. فيرداۋسي كەشەنى تۇرعان جەر قۇرعاق جەر ەكەن. ال اباي اتا كەشەنى سازداۋىت جەردە ورنالاسقان. ءفيرداۋسيدىڭ ەسكەرتكىشىن كوتەرگەندە تۋرا ابايدىڭ ەسكەرتكىشىندەي قىلىپ سالعان. ونىڭ استىڭعى قاباتىندا ۇلكەن ادەبي-تاريحي ونەر زالدارى جاسالعان. ول زالداردىڭ ىشىندە دۇنيەجۇزىندەگى باتىرلاردىڭ سۋرەتى، الەمنىڭ تاڭداۋلى سۋرەتشىلەرىنىڭ سۋرەتتەرى كورمە رەتىندە قويىلعان. مىنا شەتىندە ءفيرداۋسيدىڭ مرامورمەن قورشالعان زيراتى جاتىر. مىنە، وسىنداي يدەيالار بولعان. بىراق ءبىز ابايعا كەلگەندە، سونى جارىتىپ ىستەي المادىق. سوندىقتان اباي زيراتىنىڭ ماڭى كىتاپحانا، مادەني ورتالىق بولۋى كەرەك. 150 جىلدىقتا باستالعان ءىستى اياقتاۋىمىز كەرەك!

عاريفوللا ەسىم: وتە دۇرىس ساۋال. ءدۇبىرلى تويدان كەيىن نە قالادى؟ توي تويلانادى، تويدى وتكىزەدى. سۇلتان اعامىز ايتقان قاتەلىكتەردى جاساماۋى دا مۇمكىن. ءبارى جوعارى وتەدى. بىراق تويدان كەيىن نە قالادى؟ ماسەلە — سوندا. جۋىردا عانا وتكەن مەملەكەتتىك كوميسسيانىڭ جينالىسىندا، مەن مىناداي ۇسىنىس ەنگىزدىم. سەمەي قالاسىنان شىققاندا «اباي جولى» دەگەن ستەللا تۇر، ونى بۇرىندارى ءبىز ورناتقانبىز. ەندىگىدە سول «اباي جولىن» جيدەبايعا دەيىن جەتكىزۋىمىز كەرەك. ول – دانىشپان مۇحتار اۋەزوۆتىڭ جوباسى. بۇل – كوپ ادامنىڭ جۇرەتىن جولى. ەندى وسى جولدى «داڭعىل» دەپ اتاۋ كەرەك! م.اۋەزوۆ «اباي جولى» رومانىندا: «تاستاق جەرگە شىنار ءوسىپ شىقتى، اباي ءوسىپ شىقتى» دەيدى. روماننىڭ سوڭىندا شىنار قۇلادى دەيتىن ەدى عوي. مىنە، ابايدىڭ تۋعان جەرىن اباتتاندىرۋ، گۇلدەندىرۋ ءىسىنىڭ ءبارىن مۇحتار اۋەزوۆتىڭ رومانىنىڭ جەلىسى بويىنشا جاساۋىمىز كەرەك. اباي تۋعان سىرت قاسقابۇلاق توپىراعىنا، ۇلى جولدىڭ بويىنا الىپ شىناردى ورناتۋ كەرەك، ونى ءوزىمىزدىڭ سۋرەتشىلەر مەن ساۋلەتشىلەر يدەيالىق-كومپوزيتسيالىق تۇرعىسىنان ەرەكشە ستيلمەن سالىپ، بەزەندىرۋى كەرەك. سەمەي – كۇشىكباي اسۋى – ءبورىلى – قاسقابۇلاق – اقشوقى – جيدەباي – قاراۋىل بويىندا ابايدىڭ شىعارماشىلىعىنا قاتىستى كومپوزيتسيالىق ەسكەرتكىشتەردى سالىپ، بۇل «اباي جولىن» دالا مۋزەيىنە اينالدىرۋ كەرەك. وزگە جۇرت قىزىعىپ، تامسانىپ قالاتىن ەدى. ەل رۋحى دا كوتەرىلەر ەدى.  بۇل دەگەنىڭىز– ناعىز مەملەكەتتىك رۋحاني جاڭعىرۋ!

Túrkistan: ەلوردامىزدا «اباي» ورتالىعى اشىلادى ەكەن. بۇل ورتالىقتىڭ جۇمىسى مەن نەگىزگى كونتسەپتسياسى قانداي بولماق؟

سۇلتان ورازالين: ورتالىق بولعاننان كەيىن، سوعان بۇكىل ابايعا بايلانىستى دۇنيەلەردىڭ كوپشىلىگى جيناقتالۋى كەرەك. ءبىز سول ارقىلى ابايدى تانىپ شىعۋىمىز قاجەت. بۇل جەر ەلوردا بولعان سوڭ، الىس-جاقىننان كوپ كىسى كەلەدى. كەلگەن كىسى ابايدى، اباي ارقىلى قازاق ەلىن، ۇلتىن تولىق تانىپ كەتۋى كەرەك. اباي ورتالىعى – قازاق ەلىنىڭ ەنتسيكلوپەدياسى بولۋى ءتيىس. ورتالىق اشىلسا، ناقتى ىسكە كىرىسسە، ابايدى مەيلىنشە تولىق زەرتتەۋگە، تانىتۋعا ءتيىس دەپ سانايمىن.

عاريفوللا ەسىم: قازىر اناۋ دا، مىناۋ دا «اباي» ورتالىعىن اشامىز دەپ كەتتى. اشسىن، اشا بەرسىن! بىراق مەن مەملەكەت باسشىسى قاسىم-جومارت توقاەۆقا «اباي» اكادەمياسىن اشايىق دەپ ارنايى حات جازدىم. «اباي» اكادەمياسىنىڭ جۇمىسى – ابايدى زەرتتەۋ ەمەس، ابايدى زەرتتەيتىن ۇيىمدار، ورتالىقتار كوپ. ءاربىر ۋنيۆەرسيتەتتىڭ جانىندا ورتالىقتار بار، سوسىن «قازاق ءتىلى مەن ادەبيەتى» كافەدرالارى بار، سولاردىڭ ءبارى ابايدى زەرتتەيدى، تانيدى. ەلىمىزدە بۇدان باسقا ابايدى زەرتتەيتىن ورتالىقتار دا، عىلىمي-زەرتتەۋ ينستيتۋتتارى دا قۇدايعا شۇكىر، بارشىلىق. زەرتتەي بەرسىن. ال «اباي» اكادەمياسى نە اتقارادى؟ اباي اكادەمياسى بۇكىل قازاق قوعامىنا قالاي قىزمەت ەتەدى؟   ماسەلە  — وسى. ول ءبىزدىڭ مىنا بۇرىنعى يدەولوگيامىز سياقتى. بۇكىل قوعامدىق عىلىمدار، گۋمانيتارلىق عىلىمدارعا باسشىلىق جاساپ، ينتەگراتسيا جاساپ، سولاردىڭ باعىتىن انىقتايتىنداي اباي اكادەمياسى بولۋى كەرەك. ول تەك عىلىمي-زەرتتەۋ ەمەس، مەملەكەتتىك يدەولوگيا ورتالىعى بولۋى كەرەك. سونداي بولسىن دەپ جازىپ ەدىك، مەملەكەت باسشىسى ق.توقاەۆ مىرزا قولدايمىن دەپ قول قويدى. بىراق ول ۇسىنىستىڭ تومەنگى ورىندالۋ ماسەلەلەرى ءارتۇرلى بولىپ بارا جاتىر. بىراق ءبىزدىڭ ءبىر ءۇمىتىمىز بار. ەلوردا اكىمدىگى «اباي الەمى» دەگەن ءۇي سالايىن دەپ جاتىر. ءۇي سالسا، ارينە «اباي» اكادەمياسى بولۋى كەرەك. بولاشاق «اباي» اكادەمياسىندا قىزمەت ەتەتىن مامانداردىڭ ويى باسقا بولۋى كەرەك. ابايدى زەرتتەۋ عانا ەمەس، ابايدىڭ يدەياسىن تاراتۋ، ناسيحاتتاۋ. قازىرگى قوعام  قالاي ءومىر ءسۇرىپ جاتىر؟ بولاشاقتا قالاي ءومىر سۇرەدى ؟ اباي قانداي جاعدايدا اباي بولىپ تۇرادى؟ اباي جانە حالىق قالاي بىرگە بولادى؟ وسىنداي ىرگەلى مەملەكەتتىك ءىستى ويلاۋىمىز قاجەت، ءىسىمىز تەك قانا گۋمانيتارلىق ەمەس، بيزنەسكە بولسىن، باسقا دا قوعامدىق ۇيىمدارعا بولسىن قىزمەت ەتۋى كەرەك. اباي – مەملەكەتتىك دەڭگەيدە قوعامنىڭ بارلىق قۇرىلىمى مەن سالالارىندا بولۋى كەرەك. اباي ءبىزدىڭ يدەولوگيامىز بولۋى كەرەك. مىسالى، كونفۋتسي قىتايدىڭ باستى يدەولوگياسىنا اينالعان، جالپىحالىقتىق سيپات العان تۇلعا. پۋشكين دە ورىستاردىڭ مادەنيەتىنە، قوعامدىق ومىرىنە كىرىگىپ كەتكەن قۇبىلىس. ورىستىڭ زيالىلارى پۋشكينسىز ءسوز سويلەمەيدى. ءبىز وسى ابايدىڭ ايتقانىن، جازعانىن بۇكىل قوعامعا قاتىستى قىلىپ، جاڭا سانامەن، تاۋەل­سىزدىك­تىڭ يدەياسىمەن بايلانىستىرىپ، ارى قاراي رۋحاني اينالىمعا، حالىقتىق قولدانىسقا ەنگىزسەك دەيمىز. اباي – حالىقتىڭ، ۇلىستىڭ ءيميدجى بولۋى كەرەك!

اباي ورتالىعىن تەك عىلىمي-زەرتتەۋ ورتالىعى دەسەڭىز، ونى مەن ءوزىم دە جەكە اشا الامىن. جەكە ورتالىق اشۋدى سۇلتان اعا دا، ءسىز دە ىستەي الاسىز. اباي ورتالىعى – جەكە ەمەس، مەملەكەتتىك بولۋى كەرەك. سوندا عانا ابايدى ءبىز ۇلتتىق قۇندىلىق رەتىندە باعالاپ، تۇلعاسىن بيىكتەتەمىز. مەملەكەت ءۇشىن تەك ابايدىڭ تۆورچەستۆوسى عانا ەمەس، ابايدىڭ ايتقان يدەيالارى قالاي ىسكە اسىپ جاتقانى ماڭىزدى بولۋى ءتيىس. اباي بىزگە وسى نە ايتتى؟ نە ءۇشىن ابايدىڭ مەرەيتويىن تويلاپ وتىرمىز؟ تويلاپ وتىرعانىمىز ءار جاس ۇرپاق ابايدى ءتۇسىنىپ ءومىر ءسۇرۋى كەرەك. تەك ولەڭىن جاتتاپ الۋ ازدىق ەتەدى. ەڭ بولماسا، ابايشا ءومىر ءسۇرۋ قاجەت. ابايشا ءومىر ءسۇرۋ دەگەن نە؟ اباي حاكىم ايتىپ كەتكەن: «وسەك، وتىرىك، ماقتانشاق، ەرىنشەك، بەكەر مال شاشپاق. بەس دۇشپانىڭ، بىلسەڭىز». قازىر وسى فورمۋلا جۇمىس ىستەپ تۇر ما؟ بولاشاق «اباي» اكادەمياسى وسىندايدى ايتۋى كەرەك. ەل، جۇرت رۋحاني تازارۋى كەرەك. وسى جاعدايدى نىساناعا قويعانبىز. ەگەر «اباي» اكادەمياسىن قۇرساق، بىزگە وسىلاي جۇرگىزۋگە مۇمكىندىك بەرسە، جۇرگىزەمىز. ۇكىمەت جاعىنان كۇش بولمايتىن بولسا، «اباي» اكادەمياسىن ءوز قارجىممەن اشىپ الامىن دا، ءوزىم جۇرگىزەمىن. بىراق وعان مەنىڭ قانشالىقتى كۇشىم كەلەدى، كەلمەيدى، ونى ۋاقىت كورسەتەدى. اقيقاتىندا، اباي تويى – ەلدىڭ  تويى.

ازىرلەگەن

ەلدوس نۇسىپۇلى

 

 

سوڭعى جاڭالىقتار