13 قاراشا, 16:00 740 0 وقشانتاي انار لەپەسوۆا

"ودان دا ميللياردتارىن وفشورعا شىعاراتىنداردى ىزدەڭىزدەر!" – پەرۋاشەۆ اقشا اۋدارىمدارىن تەكسەرۋ تۋرالى

پارلامەنت ءماجىلىسىنىڭ دەپۋتاتى ازات پەرۋاشەۆ قارجى مينيسترلىگىنىڭ ازاماتتاردىڭ اقشا اۋدارىمدارىن تەكسەرۋ جونىندەگى مالىمدەمەسىن وتكىر سىنعا الدى دەپ حابارلايدى Sputnik قازاقستان. 

ايتا كەتەيىك، جۋىردا قارجى ۆيتسە-ءمينيسترى بەرىك شولپانقۇلوۆ كەلەشەكتە ازاماتتاردىڭ بانك كارتاسى ارقىلى جاسايتىن وپەراتسيالارىن تەكسەرۋ جوسپارلانىپ وتىرعانىن ايتقان ەدى. پەرۋاشەۆ وسى مالىمدەمەدەن كەيىن "اق جول" پارتياسىنا كوپتەگەن حاتتار كەلىپ تۇسكەنىن، مالىمدەمە قوعامدا ۇلكەن داۋ تۋدىرىپ، سىنعا ىلىنگەنىن اتاپ ءوتتى.

"ۆيتسە-ءمينيستردىڭ تۇسىنىكتەمەسىنە قاراعاندا، بۇل شەشىمنىڭ ەكى نەگىزگى ماقساتى بار: ءبىرىنشىسى، سالىقتان جالتارعان كاسىپكەرلەردىڭ تابىسىن انىقتاۋ; ال ەكىنشىسى – بيۋدجەتكە تۇسەتىن سالىقتى ۇلعايتۋ. جاسىرىن تابىستى انىقتاۋعا قاتىستى مىنانى ەسكە سالعىم كەلەدى. پرەزيدەنت ءوز جولداۋىندا ۇكىمەتكە شاعىن بيزنەستى 2020 جىلدىڭ 1 قاڭتارىنان ءۇش جىلعا تابىس سالىعىنان بوساتۋدى تاپسىردى. بۇدان بولەك، شاعىن جانە ورتا بيزنەستى تەكسەرۋگە ءۇش جىلعا موراتوري جاريالادى", – دەدى دەپۋتات قارجى ءمينيسترى ءاليحان سمايىلوۆقا جولداعان دەپۋتاتتىق ساۋالىندا.

بۇدان بولەك، پەرۋاشەۆ اتاپ وتكەندەي، شوب-تان تۇسەتىن تابىس سالىعى جەرگىلىكتى بيۋدجەتتەرگە بەرىلەتىن بولادى.

"وسىلايشا، شاعىن بيزنەس اينالىمىن اكىمشىلەۋدىڭ ءمانى جوعالىپ وتىر. ازاماتتار جەكە كارتاسىمەن ميلليونداپ اقشا اۋدارادى دەپ ويلامايمىن، باسىم بولىگىنىڭ قولىندا مۇنداي اقشا دا جوق. قاراپايىم حالىق بانك كارتاسىمەن ازىق-تۇلىك، ءدارى-دارمەك، كيىم-كەشەك ساتىپ العاندا ەسەپ ايىرىسادى", – دەدى ول.

سونداي-اق حالىق قالاۋلىسى كارتا ۇستايتىنداردىڭ دەنى كرەديتكە كۇن كورىپ وتىرعانىن جەتكىزدى.

"قۇرمەتتى سالىقشىلار، تولەم كارتالارىن باقىلاۋ ارقىلى تابىسىن جاسىرعان ميلليونەرلەردى تاپپايسىزدار. بۇل ادامدار ۇكىمەتتەن ەشنارسە سۇراپ وتىرعان جوق، ءوز نانىن ءوزى تاۋىپ ءجۇر. ودان دا ميلليونداپ پارا بوپسالاپ، ميللياردتارىن وفشورعا شىعاراتىنداردىڭ ىزىنە تۇسىڭىزدەر", – دەپ كەڭەس بەردى ول.

وسى ورايدا دەپۋتات بيۋدجەت اقشاسىن وڭدى-سولدى شاشاتىن ارانى اشىلعان شەنەۋنىكتەرگە شۇيلىكتى.

"داڭعازا شارالاردى ازايتىڭدار، قىمبات كولىككە مىنگەندى قويىڭدار، سوندا اقشا دا جەتەدى، ادامدار دا سالىقتىڭ دۇرىستىعىنا سەنەدى", – دەدى ماجىلىسمەن.

ءسوز سوڭىندا دەپۋتات "اق جول" فراكتسياسىنىڭ ءوتىنىشىن جەتكىزدى.

"سىزدەن ۆيتسە-مينيستر شولپانقۇلوۆتىڭ تولەم كارتاسى ارقىلى جاسالاتىن وپەراتسيالاردىڭ جەكەلەگەن تۇرىنە سالىق سالۋ تۋرالى مالىمدەمەسىن راستاۋدى نەمەسە جوققا شىعارۋدى; ەگەر مينيسترلىكتىڭ وسىنداي جوسپارى بولسا، تىم بولماعاندا، ونى شاعىن بيزنەستى تابىس سالىعىنان بوساتۋ مەرزىمى اياقتالعانعا دەيىن ىسكە اسىرماۋدى سۇرايمىز", – دەدى ول.

 

سوڭعى جاڭالىقتار