13 قاراشا, 10:48 410 0 سىرتقى ساياسات انار لەپەسوۆا

ەۋرازيالىق وداق اۋماعىندا ورتاق ۆاليۋتا ەنگىزىلە مە؟

ەۋرازيالىق وداق اۋماعىندا بىرىڭعاي ۆاليۋتا ەنگىزىلمەيدى. بۇل تۋرالى بۇگىن ۇلتتىق بانك توراعاسى ەربولات دوساەۆ مالىمدەدى، دەپ حابارلايدى Sputnik قازاقستان. 

دوساەۆ ەاەو قۇرۋداعى باستى ماقسات ۆاليۋتالىق ەمەس، ەكونوميكالىق وداق قۇرۋ بولعانىن اتاپ ءوتتى.

"بىرىڭعاي ۆاليۋتا تۋرالى سۇراق ادەيى ءارتۇرلى فورمادا ارا-تۇرا قويىلىپ وتىرادى. كەلىسىمدە بىرىڭعاي ۆاليۋتالىق وداق قۇرۋ جانە بىرىڭعاي ۆاليۋتاعا كوشۋ قاراستىرىلماعان. كەلىسىمشارتتا بۇل ناقتى جازىلعان. ەاەو-نىڭ ءار قاتىسۋشىسى قارجىلىق سۋۆەرەنيتەتتى ساقتايدى", - دەدى ول ءماجىلىس كۋلۋارىندا.

دوساەۆ ۇلتتىق بانك قارجى نارىعىن رەتتەۋشى رەتىندە اقشا-نەسيە ساياساتىن جۇرگىزۋگە، قارجىلىق تۇراقتىلىقتى قامتاماسىز ەتۋگە، داعدارىسقا قارسى قاجەتتى شارالار قابىلداۋ سالاسىندا وكىلەتتىكتى تولىعىمەن قالدىراتىنىن ايتتى.

بۇعان دەيىن رەسەيدىڭ قارجى مينيسترلىگى ەاەو ەلدەرىندە (قازاقستان، رەسەي، بەلارۋس، قىرعىزستان جانە ارمەنيا) ترانسشەكارالىق ەسەپ جۇيەسىنە بىرىڭعاي ەلەكتروندى ۆاليۋتا ەنگىزۋ يدەياسىن قولداعان بولاتىن.

سول كەزدەگى ۇلتتىق ەكونوميكا ءمينيسترى تيمۋر سۇلەيمەنوۆ ەاەو ەلدەرىندە بىرىڭعاي ەلەكتروندى ۆاليۋتا ەنگىزۋگە قارسى ەكەنىن مالىمدەدى.

 

سوڭعى جاڭالىقتار