12 قاراشا, 11:30 303 0 جاھان انار لەپەسوۆا

نۇرسۇلتان نازارباەۆ ەۋرازيانىڭ تۇراقتىلىعىن تەڭسەلتەتىن قاۋىپ-قاتەرلەردى اتادى

Astana Club پلەنارلىق وتىرىسىندا سويلەگەن سوزىندە نۇرسۇلتان نازارباەۆ ەۋرازيا كەڭىستىگىندەگى گەوساياسي جاعدايعا اسەرىن تيگىزەتىن نەگىزگى قاۋىپ-قاتەرلەرگە توقتالدى. 

«مەن دە ەۋرازياداعى گەوساياسي جاعدايعا جاعىمسىز اسەرىن تيگىزەتىن قاۋىپتەر جايلى كوزقاراسىمدى بىلدىرسەم دەپ ەدىم. بىرىنشىدەن، ءبىزدى كەلە جاتقان داعدارىستان حابار بەرەتىن الەمدىك ەكونوميكاداعى احۋال الاڭداتادى. ساۋدا تەكەتىرەستەرى ءوسىپ كەلە جاتقاندىقتان، گەوساياسي تۇراقسىزدىق احۋالىنا الەمدىك ينستيتۋتتار تەرىس باعاسىن بەرىپ جاتىر. جاھاندىق ءوسىمنىڭ باسەڭدەۋى الەمدىك ساۋداعا تەرىس ىقپالىن تيگىزىپ كەلەدى. جاھاندىق مەملەكەتتىك قارىزدىڭ دەڭگەيى 2007 جىلعى داعدارىس الدىنداعى قارىز دەڭگەيىنەن ەكى ەسە ارتىپ، الەمدىك ءجىو-ءنىڭ 80 پايىزىنا جەتتى. بۇل فاكتورلاردىڭ بارلىعى الەمدىك تۇراقتىلىقتى تەڭسەلتىپ، ەۋرازيا ەلدەرىنە قاتتى ىقپال ەتىپ وتىر»، - دەدى نۇرسۇلتان نازارباەۆ Astana Club وتىرىسىندا.

ەلباسى Astana Club وتىرىسىنا قاتىسۋشىلاردىڭ بىرقاتارىمەن جەكە كەزدەسكەنىن، ءدال سول كەزدەسۋلەردە اتالعان ماسەلەلەر تالقىلانعانىن تىلگە تيەك ەتتى.

«ەكىنشىدەن، الەمدىك دەرجاۆالار اراسىنداعى باسەكەلەستىك جاڭا دەڭگەيگە شىقتى. ءوزارا سانكتسيالار، ساۋدا سوعىستارى – اقش پەن قحر-دىڭ قازىرگى قارىم-قاتىناسىنىڭ قالىپتى جاعدايىنا اينالىپ كەتكەن. اگرەسسيۆتى ريتوريكا، ەكونوميكالىق سانكتسيا – باتىس پەن رەسەي اراسىنداعى نەگىزگى قاتىناس ءتىلى بولىپ تۇر. تۇراقتى كوممۋنيكاتسيا ارنالارىنىڭ بولماۋى احۋالدى ودان سايىن قيىنداتىپ وتىر. جەتەكشى دەرجاۆالاردىڭ اراسىنداعى تەكەتىرەس اۆتوماتتى تۇردە ەۋرازيانىڭ ىستىق نۇكتەلەرىنە اۋىسىپ وتىرادى. ول جاعداي سيريا مەن ۋكرايناداعى ماسەلەنى بەيبىت تۇردە شەشۋ امالدارىن قيىنداتادى. ال برەكسيت – سوڭعى ۋاقىتتىڭ نەگىزگى انتينتەگراتسيالىق وقيعاسىنا اينالدى»، - دەدى ول.

 

سوڭعى جاڭالىقتار