9 قاراشا, 18:39 244 0 جاھان انار لەپەسوۆا

الماتى وبلىسى مالايزيامەن ىنتىماقتاستىق ورناتپاق

الماتى وبلىسىنىڭ وڭىرلىك دامۋ ورتالىعى الاڭىندا وبلىس اكىمدىگى وكىلدەرى مالايزيانىڭ شاعىن جانە ورتا بيزنەسىنىڭ حالىقارالىق ساۋدا اسسوتسياتسياسى دەلەگاتسياسىمەن كەزدەستى. بۇل تۋرالى الماتى وبلىسى اكىمدىگىنىڭ ءباسپاسوز قىزمەتى حابارلادى. 

قازاقستاندىق تاراپتان قازاقستاننىڭ مالايزياداعى ەلشىسىنىڭ كەڭەسشىسى سەرىك ءامىروۆ، الماتى وبلىسىنىڭ كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى رۋسلان قوجاسباەۆ، "جەتىسۋ" اكك" ودي" اق باسقارما توراعاسى تالعات مالىباەۆ، توراعانىڭ ءبىرىنشى ورىنباسارى ەرعازى ورىمباساروۆ جانە الماتى وبلىسىنىڭ وڭىرلىك دامۋ ورتالىعى ديرەكتورىنىڭ ورىنباسارى شىڭعىس ماقاشەۆ قاتىستى.

مالايزيالىق دەلەگاتتاردى سميتا باس ديرەكتورى مەگان سۋ باستاپ كەلدى. دەلەگاتسيا قۇرامىندا ينجەنەرلىك، بيوتەحنولوگيالىق، وندىرىستىك جانە ازىق-تۇلىكتىك كومپانيالاردىڭ توپ-مەنەدجەرلەرى بار.

كەزدەسۋ الدىندا الماتى وبلىسىنىڭ جەتىستىكتەرى تۋرالى "We are Zhetysu" جانە "كۇندى قارسى العان جەتىسۋ" اتتى روليكتەر كورسەتىلدى.

الدىمەن وبلىستىق كاسىپكەرلىك جانە يد باسقارماسىنىڭ باسشىسى رۋسلان قوجاسباەۆ ءسوز الىپ، كەلگەن قوناقتارعا جىلى لەبىزىن ءبىلدىردى. الماتى وبلىسىنىڭ ينۆەستيتسيالىق تارتىمدىلىعى تۋرالى بايانداپ، ونىڭ تابيعي-كليماتتىق، لوگيستيكالىق جاعدايى كاسىپكەرلىكتى دامىتۋعا قانداي مۇمكىندىكتەر بەرەتىنى جايىندا ايتىپ بەردى.

"جەتىسۋ" اكك" ءودي" اق باسقارما توراعاسى تالعات مالىباەۆ اكك جۇمىسىنىڭ نەگىزگى باعىتتارىنا توقتالىپ، الداعى جوسپارلارىمەن ءبولىستى:

ءبىزدىڭ كورپوراتسيا اۋىل شارۋاشىلىعى، جەر قويناۋىن پايدالانۋ، تۋريزم، جول بويىنداعى سەرۆيس، جاسىل ەنەرگەتيكا سالالارى مەن يندۋستريالدى ايماقتارعا قولداۋ كورسەتەدى. ءبىز مەملەكەت پەن بيزنەستىڭ اراسىندا دانەكەرمىز. الماتى وبلىسىندا 6 يندۋستريالدى ايماق بار، ونىڭ تالعار مەن ىلە اۋداندارىنداعى ەكەۋىندە ءىرى ينۆەستجوبالار كوپ. سوندىقتان ءبىز جوبالارىڭىزدى جۇزەگە اسىرۋعا الاڭ ۇسىنۋعا، ىسكە اسىرۋ پروتسەسىندە قولداۋ كورسەتۋگە دايىنبىز، - دەدى ول.

اڭگىمە بارىسىندا مالايزيالىقتارعا جوبالاردى جۇزەگە اسىرۋ شارتتارى مەن مەملەكەتتىك قولداۋ شارالارى جايلى ءتۇسىندىرىلدى.

ءوز كەزەگىندە سميتا باس ديرەكتورى مەگان سۋ وبلىس اكىمدىگىنە جىلى قابىلداۋى ءۇشىن ريزاشىلىعىن ءبىلدىردى:

ەندى ءبىز الماتى وبلىسىن مالايزياداعى وزگە بيزنەسمەندەرگە دە تانىستىراتىن بولامىز. ءبىزدىڭ ۇيىمىمىز شاعىن جانە ورتا بيزنەسپەن ىنتىماقتاستىقتا جۇمىس ىستەيدى، ساۋدا ميسسياسىنىڭ ۇيىمىندا، حالىقارالىق كونفەرەنتسيالار مەن سەمينارلاردا وقىتۋ، ساراپتاما مەن قولداۋ قىزمەتتەرىن كورسەتە وتىرىپ، ولاردىڭ الەمدىك ارەناعا شىعۋىنا ىقپال ەتەدى. سىزدەرمەن ءوزارا ارىپتەستىك بايلانىسىمىزدى دامىتامىز دەپ سەنەمىن، - دەدى ول.

وسى كەزدەسۋدە مالايزيالىق وكىلدەر وڭىردە جاسىل ەنەرگەتيكا، اۋىل شارۋاشىلىعى، قۇس ءوسىرۋ سالالارىندا جوبالارىن جۇزەگە اسىرۋعا قىزىعۋشىلىق بىلدىرەتىندەرىن ايتتى.

ەكى جاقتى كەزدەسۋدىڭ قورىتىندىسىندا سميتا مەن "جەتىسۋ" اكك" ءودي" اق اراسىندا ىنتىماقتاستىق تۋرالى مەموراندۋمعا قول قويىلدى. كەلىسىم اياسىندا تاراپتار ينۆەستيتسيا تارتۋمەن، ىسكەرلىك بايلانىستى دامىتۋمەن اينالىسپاق.

سوڭعى جاڭالىقتار