9 قاراشا, 18:30 265 0 الەۋمەت انار لەپەسوۆا

نۇر-سۇلتان مەن الماتىدا ميتينگكە شىققاندار قانداي تالاپ قويدى؟

نۇر-سۇلتان مەن الماتى قالالارىندا رۇقسات ەتىلگەن ميتينگ ءوتتى، دەپ حابارلايدى قازاقپارات.

ۇيىمداستىرۋشىلاردىڭ ايتۋىنشا، بۇگىنگى ميتينگتى وتكىزۋ اكىمدىكپەن كەلىسىلگەن جانە رۇقسات بەرىلگەن. جيىن جەرۇيىق پاركىندە ءوتتى. ميتينگتە ونداعان قاتىسۋشىلار بارلىق ازاماتتاردىڭ نەگىزگى قۇقىقتارى مەن بوستاندىعىن ساقتاۋ، پارلامەنتتىك رەسپۋبليكاعا اۋىسۋ، شىنايى جەرگىلىكتى ءوزىن-ءوزى باسقارۋ ماسەلەلەرىن كوتەردى. ودان بولەك، اكتسيا قاتىسۋشىلارى سايلاۋ جۇيەسىن رەفورمالاۋ مەن زاڭ ۇستەمدىگىن، سوت بيلىگىنىڭ تاۋەلسىزدىگىن تالاپ ەتىپ، پىكىرلەرىن ءبىلدىردى.

الماتىدا بۇگىن سارىارقا كينوتەاترىنىڭ ارتىنداعى الاڭدا رۇقسات ەتىلگەن ميتينگ ءوتتى. وندا دا بىرنەشە ادام «كاسىپوداقتان قولىڭدى تارت!»، «داعدارىسقا تولەمە، كاسىپوداققا قوسىل!»، «كاسىپوداقتار تاۋەلسىز بولسىن»، «ەرەۋىل جاساۋ قۇقىعى قر كونستيتۋتسياسىنىڭ 24-بابىمەن قورعالعان» دەپ جازىلعان پلاكاتتارمەن شىقتى.

«ءبىزدىڭ ماقساتىمىز - قازاقستانداعى ەڭبەك قۇقىقتارىنىڭ بۇزىلىپ جاتقانىنا نازار اۋدارتۋ. وعان ەلىمىز جەتكىلىكتى كوڭىل ءبولىپ وتىرعان جوق. بيزنەس سۋبەكتىلەرى مەن كاسىپوداقتار ەڭبەك قۇقىعىن ورەسكەل بۇزىپ ءجۇر، كاسىپوداقتار ىشىندە كۇرەس ءجۇرىپ جاتىر. سوندىقتان، ءبىز جوعارى ۇمتىلعانىمىزبەن، قازاقستان حالىقارالىق رەيتينگتە تومەندەپ كەلەدى. ەڭبەك قۇقىعى ەشكىمگە قاجەت بولمايتىنداي كەزەڭگە ءتۇسۋىمىز مۇمكىن. بۇل جاقسى ەمەس»، - دەدى «ازاماتتىق قورعانىس» قق توراعاسىنىڭ ورىنباسارى دميتري ليتۆين.

ونىڭ ايتۋىنشا، جۇمىسكەرلەر ءوز قۇقىقتارىن تالاپ ەتىپ، كاسىپوداقتا بىرىگۋى ءتيىس. جيىن بارىسىندا وزگە دە قاتىسۋشىلار ءوز پىكىرىن ايتتى. ايتا كەتەيىك، بۇعان دەيىن الماتى ءماسليحاتى ازاماتتاردىڭ بەيبىت جيىنى ءۇشىن ەكى ورىن بەلگىلەگەن بولاتىن.

 

سوڭعى جاڭالىقتار