7 قاراشا, 16:04 313 0 رۋحانيات انار لەپەسوۆا

II رەسپۋبليكالىق «ءدىلمار» شەشەندىك ونەر بايقاۋى ءوتتى

اباي اتىنداعى مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن مەكتەپ-ينتەرناتىندا II رەسپۋبليكالىق «ءدىلمار» شەشەندىك ونەر بايقاۋى ءوتتى. بايقاۋعا ەلىمىزدىڭ 3 قالاسى، 10 وبلىسىنان 38 وقۋشى قاتىسىپ، ءۇش كەزەڭ بويىنشا بارىن سالىپ، باعىن سىنادى.

بايقاۋ شىمىلدىعى قۇرمانعازىنىڭ كۇمبىرلەگەن كۇيىمەن اشىلدى. ارتىنشا مەكتەپتى تانىستىرۋ ارناۋى مەن شەشەندىك ونەردىڭ ماڭىزىن اشاتىن كورىنىس كورسەتىلدى. يگى شارانىڭ ۇيىمداستىرۋشىسى مەكتەپ-ينتەرنات ديرەكتورى روزا سەكسەنوۆا بايقاۋدىڭ ءمان-ماڭىزى، ماقساتى مەن ەرەكشەلىگىن اتاپ، قاتىسۋشىلارعا ساتتىلىك تىلەدى.

«ونەردىڭ ەڭ اسىلى ءسوز ونەرى» دەمەكشى، «ءدىلمار» سايىسى وقۋشىلاردىڭ شەشەندىك دەڭگەيىن شىن انىقتادى. كىل جۇيرىكتە كىم جۇيرىك ەكەنىن انىقتاۋ ءۇشىن تانىمال عالىمدار، اقىن-جازۋشى، ديكتورلار مەن زەرتتەۋشىلەردەن قۇرالعان ادىلقازىلار تورەلىك ەتتى. ولار: مارات توقاشباەۆ، امانجان ەڭسەبايۇلى، گۇلبانۋ قوسىموۆا، سەرىك قاليەۆ، ەرمۇحامەت مارالبەك سياقتى ءسوز ونەرىنىڭ مايتالمان ماماندارى قاتىسۋشىلاردىڭ ءتۇرلى دەڭگەيىنە جەكە-جەكە باعا بەردى.

12.png

بۇل بايقاۋدىڭ ماقساتى: شەشەندىك ونەردى جاس ۇرپاققا ءسىڭىرىپ، ءسوز مادەنيەتىن تۇزەۋ. وسى تالاپتاردى انىقتاۋ 3 كەزەڭدى قۇرادى. العاشقى كەزەڭدە بي-شەشەندەر مەن اقىن-جىراۋلاردىڭ شەشەندىك پايىم، تولعاۋلارىن جالعاستىرۋ تالاپ ەتىلدى. ەكىنشى بولىمدە تۇراقتى تىركەس، وداعاي، ماقال-ماتەل ت.ب. بەرىلگەن 3 ءسوز ارقىلى ساۋاتتى سويلەم قۇراۋ تالاپ ەتىلدى. ال ناعىز كوسىلە سويلەپ، شەشىلە شەشەندىك تانىتاتىن ءىىى كەزەڭ كوپ قاتىسۋشىنىڭ ناعىز بولمىسىن، ءبىلىمى مەن سوزدىك قورىن كورسەتتى.

بۇل بايقاۋدىڭ وزگە بايقاۋلاردان ەرەكشەلىگى وتە كوپ. مىسالى: قاتىسۋشىلاردىڭ جەرەبەلىك ءنومىرى ۇلتتىق مۇرا – اسىقپەن انىقتالسا، سايىس امانجان ەڭسەبايۇلىنىڭ اق باتاسىمەن جاندانىپ، كوڭىلىمىزدى مارقايتاتىن شاشۋمەن شاتتىعىمىز ەسەلەندى.

بايقاۋ بارىسىندا توپ جارعان دۇلدۇلدەر دە، ەكى ءسوزدىڭ باسىن ءجوندى قۇراي المايتىندار دا بايقالدى. كەيبىرى بۇگىنگى تاڭداعى وزەكتى ماسەلەلەردى قوزعايمىز دەپ تاقىرىپتان اۋىتقىپ، ءسوز بەن وي قايتالاۋعا ءماجبۇر بولدى. مەنىڭ ويىمشا، كەيبىر قاتىسۋشىلار وزدەرىن تولىقتاي كورسەتىپ، بولاشاقتىڭ ءسوز باستار سەركەلەرى بولاتىندارىنا سەندىردى. بۇل قۋانتارلىق جايت.

سايىستىڭ قورىتىندىسى بويىنشا باس جۇلدە قوستانايلىق دوسىمحانوۆا اياكوزگە، ى ورىن اباي اتىنداعى رممي وقۋشىسى داۋلەتبەك دۋمانعا، ىى ورىن قىزىلوردالىق بالتاباەۆا ارداققا، اقتوبەلىك كادىرباي مارعۇلانعا بەرىلسە، ىىى ورىندار الماتى وبلىستان كەلگەن بەكتۇر مەرەيگە، الماتىلىق اشيلبەكوۆا روزاعا، شىمكەنتتىك جادىگەروۆا گۇلسانعا بەرىلدى.

شەشەندىك ونەر بارلىق ونەردى تالاپ ەتەتىن ەرەكشەلىككە يە بولعاندىقتان وعان ءاتۇستى قاراماۋىمىز كەرەك ەكەنىن اڭعاردىق. وسىنداي ءىس-شارالار ارقىلى بابالار ءسوزى بالالار ەسىندە ماڭگى جاڭعىرا بەرمەك.

«ءدىلمار» شەشەندىك ونەر بايقاۋىنىڭ جوبا جەتەكشىسى مەن تۇراقتى دەمەۋشىسى، رۋحانياتتىڭ ناعىز جاناشىرى – «زەينوللا سانىك اتىنداعى مادەنيەت قورى».

سوڭعى جاڭالىقتار