7 قاراشا, 15:40 379 0 ىشكى ساياسات انار لەپەسوۆا

425 قويى، 19 تۇيەسى بار: قىزىلوردادا الەۋمەتتىك كومەك العان داۋلەتتى وتباسىلاردىڭ قيتۇرقىلىعى اشكەرەلەندى

قىزىلوردا وبلىسىندا اتاۋلى الەۋمەتتىك كومەك العاندار قاتارىندا داۋلەتتى ازاماتتار بولعان. ءتيىستى سالا ماماندارىنىڭ تەكسەرۋى ناتيجەسىندە 1597 وتباسىنا 1 ملرد 71 ملن تەڭگە الەۋمەتتىك كومەك تاعايىنداۋ توقتاتىلعان. بۇل تۋرالى وبلىس اكىمى مالىمدەدى. 

ارتىق تولەنگەن 229 ملن تەڭگە بيۋدجەتكە قايتارىلعان. اتاۋلى كومەك الۋشىلار سانى قىزىلوردا قالاسىندا – 4,5, جاڭاقورعاندا – 3,8, شيەلىدە – 3,5 ەسەگە ارتقان.

«بۇل اتاۋلى الەۋمەتتىك كومەكتىڭ رەتسىز تاعايىندالعانىن كورسەتەدى. تەكسەرۋ بارىسىندا كوپتەگەن ولقىلىقتار انىقتالدى. وسىنداي كومەككە يە بولعاندار قاتارىندا 425 قويى، 19 تۇيەسى بار وتباسىلار كەزدەستى. سونداي-اق، تاعى بىرىندە 41 تۇيە، 47 جىلقى بار ەكەنى بەلگىلى بولدى. جالپى، مەملەكەت كومەگىن شىن مۇقتاج ادامدار الۋى ءتيىس. اتاۋلى الەۋمەتتىك كومەكتى الۋ ءۇشىن ادەيى اجىراسۋ، جۇمىستان ەرىكتى تۇردە شىعۋ، تابىستى جاسىرۋ سياقتى ارەكەتتەرگە باراتىن ادامدار كەزدەسەدى»، - دەدى قىزىلوردا وبلىسىنىڭ اكىمى قۋانىشبەك ىسقاقوۆ «Nur Otan» پارتياسى وبلىستىق فيليالى ساياسي كەڭەسى بيۋروسىنىڭ كەڭەيتىلگەن وتىرىسىندا.

قازىرگى تاڭدا قىزىلوردا وبلىسىندا ءاربىر وتباسىنا 84 مىڭ تەڭگەدەن جوعارى اتاۋلى الەۋمەتتىك كومەك بەرىلەدى. بيىلعى جىلدىڭ 1 قازانىنداعى مالىمەت بويىنشا مۇنداي كومەكتى 147 مىڭنان استام تۇرعىن العان.

 

سوڭعى جاڭالىقتار