7 قاراشا, 13:14 413 0 تۇلعا انار لەپەسوۆا

الماتىلىقتار رايسا مۇحامەدياروۆانى اقتىق ساپارعا شىعارىپ سالدى

الماتىدا كسرو جانە قازاقستاننىڭ ەڭبەك سىڭىرگەن ءارتىسى رايسا مۇحامەدياروۆانى اقتىق ساپارعا شىعارىپ سالۋ ءراسىمى ءوتتى.

قارالى جيىن الماتىداعى ع. مۇسىرەپوۆ اتىنداعى قازاق بالالار جانە جاسوسپىرىمدەر اكادەميالىق تەاترىندا ءوتتى. ءارتىستى اقىرعى ساپارعا شىعارىپ سالۋعا تەاتر جانە كينو ارتىستەرى، زيالى قاۋىم وكىلدەرى، قالا حالقى، ونەرسۇيەر قاۋىم قاتىستى.

جينالعاندارعا نۇر-سۇلتان قالاسىنان ارنايى كەلگەن قوعام قايراتكەرى ءمادي ارتىعاليەۆ قر پرەزيدەنتى قاسىم-جومارت توقاەۆتىڭ كوڭىل ايتۋ جەدەلحاتىن وقىپ بەردى. «بەلگىلى مادەنيەت قايراتكەرى، تەاتر جانە كينو ءارتىسى رايسا مۇحامەدياروۆانىڭ دۇنيەدەن وتۋىنە بايلانىستى اۋىر قايعىلارىڭىزعا ورتاقتاسىپ كوڭىل ايتامىن. رايسا ماجىتقىزى ۇزاق جىلدار بويى تەاتردا ونەر كورسەتىپ، كەيىپكەرلەردى اسقان شەبەرلىكپەن ساحناعا شىعارا ءبىلىپ، كورەرمەن قاۋىمنىڭ ىستىق ىقىلاسىنا بولەندى. سونداي-اق كوركەم فيلمدەرگە ءتۇسىپ، كوپتەگەن باستى رولدەردى سومدادى. ونىڭ ەسىمى مەن جارقىن بەينەسى ونەر سۇيەر قاۋىمنىڭ جۇرەگىندە ماڭگى ساقتالادى»، - دەلىنگەن پرەزيدەنتتىڭ جەدەلحاتتىندا.

سونىمەن قاتار، قر پارلامەنتى سەناتىنىڭ توراعاسى داريعا نازارباەۆا، قر مادەنيەت جانە سپورت ءمينيسترى اقتوتى رايىمقۇلوۆا، الماتى قالاسىنىڭ اكىمى باقىتجان ساعىنتاەۆ جانە نۇر-سۇلتان قالاسىنىڭ اكىمى التاي كولگىنوۆ كوڭىل ايتۋ جەدەل حاتىن جولدادى. قارالى جيىندا، ونەر ادامدارى مارقۇمنىڭ ونەرى مەن ءومىرى تۋرالى ايتىپ، ەسكە الدى.

«تەاتر جانە كينو الەمى تاعى ءبىر شوقتىعى بيىك جۇلدىزىنان ايرىلدى. بۇگىن رايسا مۇحامەدياروۆانى اقتىق ساپارعا شىعارىپ سالىپ تۇرمىز. رايسا قازاقتىڭ كينوسى مەن تەاترىندا «سۇلۋلىقتىڭ سيموۆولى» بولاتىن. ساحناداعى ەرەكشە وبرازدارىمەن ەستە قالدى. كينو سالاسىندا دا وزىندىك ورنى بار اكتريسا ەدى. كينوداعى ءاربىر بەينەسى كورەرمەنىڭ ەسىندە ماڭگى ساقتالادى. ءبىز سياقتى جاستار سول كىسىلەردىڭ ويناعان كينوسىن كورىپ ەسەيدىك، ەلىكتەدىك، بالا كەيىپىمىزبەن عاشىق بولدىق. بۇگىن مىنە ماڭگى مەكەنىنە شىعارىپ سالىپ جاتىرمىز»، - دەدى قارالى جيىندا ع. مۇسىرەپوۆ اتىنداعى قازاق بالالار جانە جاسوسپىرىمدەر اكادەميالىق تەاترىنىڭ ديرەكتورى ازامات ساتىبالدى.

رايسا مۇحامەدياروۆا 1963 جىلى رەجيسسەر سۇلتان قوجىقوۆتىڭ قازاق كينوسىنىڭ التىن قورىنان ورىن العان «مەنىڭ اتىم - قوجا» فيلمىندە ۇستاز مايقانوۆانىڭ رولىمەن حالىققا كەڭىنەن تانىلدى. 30-عا جۋىق فيلمگە تۇسكەن. ايتا كەتەيىك، 1964 جىلى رايسا مۇحامەدياروۆا جازۋشى عابيت مۇسىرەپوۆكە تۇرمىسقا شىعىپ، 8 جىل نەكەدە بولعان. اكتريسا 80 جاسىندا دۇنيەدەن وزدى.

 

سوڭعى جاڭالىقتار