6 قاراشا, 10:32 474 0 ءوندىرىس انار لەپەسوۆا

"بيزنەستىڭ جول كارتاسى-2020" باعدارلاماسىنىڭ ناتيجەلەرى سارالاندى

ۇلتتىق ەكونوميكا ءمينيسترى رۋسلان دالەنوۆ ۇكىمەت وتىرىسىندا "بيزنەستىڭ جول كارتاسى-2020" مەملەكەتتىك باعدارلاماسىنىڭ ناتيجەلەرىن باياندادى. 

"باعدارلاما ەكىنشى بەسجىلدىعىندا ناقتى ناتيجەلەرگە جەتتى. وسى جىلى قابىلدانعان شارالاردىڭ نەگىزىندە قازاقستان دۇنيەجۇزىلىك بانكتىڭ "Doing Business" رەيتينگىسىندە 25-ورىنعا يە بولدى. بۇل رەيتينگ بويىنشا ەلىمىز 2015 جىلمەن سالىستىرعاندا 16 بىرلىككە كوتەرىلدى. جالپى ىشكى ونىمدەگى شاعىن جانە ورتا بيزنەستىڭ ۇلەسى 28,4%-كە دەيىن ارتتى. 2015 جىلمەن سالىستىرعاندا شاعىن جانە ورتا بيزنەس سۋبەكتىلەرىنىڭ سانى 400 مىڭعا ۇلعايىپ، 1,3 ملن قۇرادى. جۇمىسپەن قامتىلعانداردىڭ سانى 300 مىڭعا ءوسىپ، 3,3 ملن ادامدى قۇرادى", - دەدى مينيستر.

دالەنوۆ باعدارلاما اياسىندا كاسىپكەرلەرگە پايىزدىق مولشەرلەمەنىڭ ءبىر بولىگىن سۋبسيديالاۋ، نەسيەلەرگە كەپىلدىك بەرۋ، مەملەكەتتىك گرانتتار ۇسىنۋ، كاسىپكەرلەردى وقىتۋ، ينفراقۇرىلىمدى جەتكىزۋ سەكىلدى قولداۋ كورسەتىلەتىنىن ايتتى.

باعدارلامانى ىسكە اسىرۋ ءۇشىن بيۋدجەتتەن 282 ملرد تەڭگە ءبولىنىپ، ناتيجەسىندە 16 مىڭنان استام شاعىن جانە ورتا بيزنەس سۋبەكتىلەرى قارجىلاندىرىلىپ، 100 مىڭنان استام كاسىپكەر وقىتىلعان. 15,5 ترلن تەڭگەگە ءونىم ءوندىرىلىپ، 1 ترلن تەڭگە شاماسىندا سالىق تولەنگەن.

"باعدارلاما شەڭبەرىندە بيزنەستى دامىتۋعا مۇمكىندىك بەرىلەدى. كاسىپكەرلەر 7,1 پايىزبەن نەسيە الا الادى. نەسيە 2,5 ملرد تەڭگەگە دەيىن بەرىلەدى. مەملەكەت تاراپىنان 60 ملن تەڭگەگە دەيىن نەسيەلەرگە كەپىلدىك بەرىلەدى. سونىمەن قاتار 3 ملن تەڭگەگە دەيىن وتەۋسىز گرانت ۇسىنىلادى", - دەدى مينيستر.

ۆەدومستۆو باسشىسى ازاماتتاردى بيزنەس نەگىزدەرىنە وقىتۋ بويىنشا قاراستىرىلعان شارالار بويىنشا ناتيجەلەردى اتاپ ءوتتى.

"باعدارلاما شەڭبەرىندە كونسۋلتاتسيالار كوزدەلگەن. بۇدان باسقا، وقىتۋ مەن تاعىلىمدامادان ءوتۋ قاراستىرىلعان. ولار ەكى كۇن نەمەسە ەكى جانە ءۇش اپتا وتكىزىلەدى. باعدارلامانىڭ وسى ەكىنشى بەسجىلدىعىندا 120 مىڭعا جۋىق كاسىپكەر مەملەكەتتىك قولداۋ الدى. 9 مىڭنان استام كاسىپكەرلەردىڭ نەسيەلەرى سۋبسيديالاندى. 5 مىڭنان استام كاسىپكەرگە كەپىلدىك ۇسىنىلدى. 100 مىڭنان استام ازامات بيزنەستى جۇرگىزۋ بويىنشا وقىتىلدى. 2 مىڭعا جۋىق گرانت بەرىلدى. 165 جوباعا ينفراقۇرىلىم جەتكىزىلدى", - دەدى ۇلتتىق ەكونوميكا ءمينيسترى.

سوڭعى جاڭالىقتار