5 قاراشا, 15:31 461 0 ءبىلىم انار لەپەسوۆا

الماتى مەن سانكت-پەتەربۋرگ ءبىلىم بەرۋ سالاسىندا ءوزارا كەلىسىمگە قول قويدى

الماتىداعى مانشۇك مامەتوۆا اتىنداعى №28 مەكتەپ-ليتسەيى سانكت-پەتەربۋرگ كراسنوگۆاردەيسك اۋدانىنداعى №140 ورتا مەكتەپ پەن الماتى مەملەكەتتىك ەنەرگەتيكا جانە ەلەكتروندى تەحنولوگيا كوللەدجى نەبولسين اتىنداعى نەۆسكي كوللەدجىمەن ءوزارا ىنتىماقتاستىق ورناتپاق. ەندى ەكى تاراپتىڭ وقۋشىلارى مەن كوللەدج ستۋدەنتتەرى تاجىريبە الماسادى، دەپ حابارلايدى الماتى ارناسى. 

سانكت-پەتەربۋرگتەن كەلگەن ارنايى دەلەگاتسيا ءبىلىم وشاعىن ارالاپ، ونىڭ جۇمىسىمەن تانىستى. بۇل مەكتەپتە 1931-1938 جىلدارى كەڭەس وداعىنىڭ باتىرى مانشۇك مامەتوۆا وقىعان. ءبىلىم وشاعى 1960 جىلدان بەرى قازاقتىڭ قاھارمان قىزىنىڭ ەسىمىمەن اتالىپ كەلەدى. ودان بولەك، رەسەيلىك مەيماندار كوللەدجگە دە ات باسىن بۇرىپ، وقۋ ورنىندا اتقارىلىپ جاتقان جۇمىستاردى كوزدەرىمەن كورىپ قايتتى.

«مەن ءدال وسى مانشۇك مامەتوۆا اتىنداعى №28 مەكتەپ-ليتسەيىمەن كەلىسىمگە قول قويىلعانىنا قۋانىشتىمىن. ءبىلىم وشاعىن ارالاپ، تانىسىپ شىقتىق. مۇراجايدا سۇم سوعىستىڭ سۇراپىل كەزدەرى ساقتالعان. الماتى تاراپىنان دا دەلەگاتسيانى دا قابىلدايمىز. ونلاين اشىق ساباق وتكىزەمىز»، – دەدى سانكت-پەتەربۋرگ قالاسى № 140 ورتا مەكتەپتىڭ ديرەكتورى ەلەنا روستۋنوۆا.

«ءبىز حالىقارالىق قارىم-قاتىناستى دامىتۋعا ءتيىسپىز. سەبەبى باسقا ەلدە، باسقا مەملەكەتتە بولىپ جاتقان، قانداي جاڭالىقتار بار ەكەنىن كورىپ-ءبىلىپ، وزىمىزبەن سالىستىرىپ، كەم-كەتىگى بولسا تولىقتىراتىنداي جاعداي جاساۋىمىز كەرەك. ءبىزدىڭ ءبىلىم بەرۋ مەكەمەلەرىنىڭ اراسىندا ءبىلىم بەرۋ جۇيەسىندە سونشالىقتى ايىرماشىلىق بار دەپ ايتا المايمىن. سەبەبى ءبىزدىڭ جاساپ جاتقان جۇمىسىمىزدى ولار دا جاساپ جاتىر. بىراق تىعىز قارىم-قاتىناس ورناسا، ءبىز ءوزىمىزدىڭ سالامىزدى دامىتار ەدىك»، – دەدى  الماتى قالاسى ءبىلىم باسقارماسىنىڭ باسشىسى گۇلنار حودجابەرگەنوۆا.

سوڭعى جاڭالىقتار