4 قاراشا, 21:11 367 0 ايماق انار لەپەسوۆا

ەلباسى تۇركىستان تۇرعىندارىمەن كەزدەستى

تۇركىستان قالاسىنا جۇمىس ساپارىمەن كەلگەن ەلباسى نۇرسۇلتان نازارباەۆ قالا جۇرتشىلىعىمەن كەزدەستى، دەپ حابارلايدى ەلباسىنىڭ رەسمي سايتى

«تۇركىستانعا وبلىس ورتالىعى مارتەبەسىن بەرۋ تاۋەلسىزدىك العان ءبىرىنشى كۇننەن باستاپ ەستە بولعان. مۇنى مەنەن بۇرىنعى ومىردەن ءوتىپ كەتكەن ەل اعالارى دا ەسىندە ۇستاعان. وتكەن عاسىردىڭ وزىندە تۇركىستان رەسپۋبليكاسىن قۇرامىز، تۇركىستان بيۋروسى دەپ وسى جەردە كوپ شارۋا اتقارىلدى. ال، ەندى تاريحقا ۇڭىلەتىن بولساق، بۇل - قاسيەتتى ءوڭىر. جيىرما ءبىر حانىمىز جەرلەنگەن، سۇلتاندارىمىز بەن اۋليەلەر ماڭگىلىك تىنىشتىق تاپقان وتە كيەلى ورىن. مىنە، بۇگىن تۇركىستان قالاسىن وبلىس ورتالىعى ەتىپ، قايتادان جانداندىرىپ، ەلىمىزگە وسى كيەلى وردانى قايتارۋ مۇمكىنشىلىگى قولىمىزعا ءتيدى. بۇل قالانىڭ بۇكىل تۇركى دۇنيەسىنىڭ ورتالىعى ەكەنى بارىمىزگە بەلگىلى. وڭتۇستىكتەگى اعايىندار مەن وزبەكستان، قىرعىزستان، تۇرىكمەنستان قۋانىپ جاتىر. ولار دا اتسالىسىپ، بىزگە كومەكتەسەدى دەپ سەنەمىن»، - دەدى نۇرسۇلتان نازارباەۆ.

ەلباسى سونداي-اق، تۇركىستان شاھارىنىڭ الداعى ۋاقىتتا ءىرى مەگاپوليسكە اينالاتىنىنا سەنىم ءبىلدىردى.

«وسىدان بىرنەشە جىل بۇرىن تۇركىستاننىڭ 1500 جىلدىعىن اتاپ وتەمىز دەپ ءبىراز شارۋانى اتقارعان ەدىك. سوندا وسى الاڭدا كەزدەسىپ، سويلەسكەنبىز. سول كەزدە تۇركىستان ورتالىق بولادى دەپ ايتقانمىن. مىنەكەي، بىلتىر تۇركىستان وبلىس ورتالىعى بولادى دەگەن جارلىققا قول قويدىم. ەلىمىزدە الماتى، نۇر-سۇلتان جانە شىمكەنت - ءبىر ميلليون تۇرعىنى بار قالالار قاتارىندا. بولاشاقتا وسىنداي ۇلكەن قالالاردا ەكونوميكا، مادەنيەت - بارلىعى ءوسىپ-وركەندەي بەرەدى. الداعى ۋاقىتتا ميلليون تۇرعىنى بار قالالار سانى تاعى ارتادى»، - دەدى نۇرسۇلتان نازارباەۆ.

 

سوڭعى جاڭالىقتار