2 قاراشا, 11:29 513 0 ونەر انار لەپەسوۆا

"فاريزا" ماسكەۋلىك كورەرمەن نازارىنا ۇسىنىلدى

ماسكەۋدەگى «سوۆرەمەننيك» تەاترىنىڭ ساحناسىندا «فاريزا» سپەكتاكلى قويىلدى. بەلگىلى دراماتۋرگ روزا مۇقانوۆانىڭ پەساسى بويىنشا قازاقستاندىق جاس رەجيسسەر فارحات مولداعالي قويعان بۇل سپەكتاكلدىڭ تۇساۋكەسەرى  الماتىداعى مۇحتار اۋەزوۆ اتىنداعى تەاتردىڭ ساحناسىندا وتكەن بولاتىن. 

رەسەيدەگى قويىلىم بۇكىلرەسەيلىك تەاتر مارافونىنىڭ باعدارلاماسىنا كىرىپ، قازاقستاننىڭ رەسەيدەگى كۇندەرى اياسىندا كورسەتىلدى.  اۆتورلارى «فاريزا» قويىلىمىن ميستيكالىق دراما جانرىنا جاتقىزىپ وتىر. اقىننىڭ ولەڭدەرى ستسەناريگە شەبەر ورىلگەن. الايدا بۇل ادەبي كەش تە، ءومىربايان دا ەمەس. بۇل – باس كەيىپكەردىڭ ىشكى دۇنيەسى مەن جان سەزىمىن ساحنادا بەينەلەۋ.

"فاريزا وڭعارسىنوۆا اقىن بولۋىمەن قاتار، قازاقستاننىڭ مادەني استاناسى – الماتىعا وقۋعا كەلگەن كوپتەگەن قازاق قىزدارىنىڭ قامقورشىسى بولعان. ولاردى ىلگەرى جەتەلەيتىن. فاريزا وڭعارسىنوۆانى ءوز شابىتى سانايتىن ءىزباسارلارى كوپ", - دەيدى يدەيا اۆتورى اينۇر كوپباساروۆا.

زامانداستارى تاراپىنان ماراپاتقا بولەنۋ مەن قىزعانىش. دوستىق پەن باقتالاستىق. ۇلكەن تابىس پەن جالعىزدىق. اقىننىڭ وسىنىڭ اراسىندا تاڭداۋ جاساۋعا مۇمكىندىگى جوق. شىعارماشىلىق جولىندا شابىتپەن قاتار اۋىر جۇكتى دا ارقالاۋعا ءماجبۇر. بۇل تاعدىردىڭ جازعانى. ەجەلگى گرەك تراگەديالارىنداعىداي، اقىننىڭ پارىزى وزگەرگەن جوق: جان قينالىسىن جوعارى ونەرگە اينالدىرۋ.

"الەم ادەبيەتىندە احماتوۆانىڭ، تسۆەتاەۆانىڭ، ماندەلشتام، بلوك قانداي الەمدىك دەڭگەيدە بولسا، فاريزا شىعارماشىلىعى، فاريزا تاعدىرى، فاريزاداعى جۇمباق – ءبىز وسىنى ىزدەدىك. بۇل –فاريزانىڭ ارپالىسى. بارلىق ادامعا ءتان عوي ارپالىسىپ ءوتۋ. قوعام بىردە تۇسىنەدى، بىردە تۇسىنبەيدى. اتاق، داڭق بولا تۇرا ادام ءوزىن جالعىز سەزىنەتىن كەزدەر بولادى", - دەيدى پەسا اۆتورى روزا مۇقانوۆا.

 

سوڭعى جاڭالىقتار