1 قاراشا, 18:15 447 0 ساياسات انار لەپەسوۆا

اسقار مامين شاۆكات ميرزيەەۆپەن كەزدەستى

 تاشكەنت قالاسىندا قر پرەمەر-ءمينيسترى اسقار مامين وزبەكستان پرەزيدەنتى شاۆكات ميرزيەەۆپەن كەزدەستى، دەپ حابارلايدى ۇكىمەت باسشىسىنىڭ ءباسپاسوز قىزمەتى.

«قر تۇڭعىش پرەزيدەنتى – ەلباسى نۇرسۇلتان نازارباەۆ سىزبەن بىرگە قازاقستان مەن وزبەكستان اراسىنداعى ەكىجاقتى قاتىناستاردى ستراتەگيالىق ىنتىماقتاستىقتىڭ جاڭا دەڭگەيىنە شىعارۋعا نەگىز سالدى. مەملەكەت باسشىسى قاسىم-جومارت توقاەۆ سىرتقى ساياساتتىڭ ساباقتاستىعىن ساقتايدى جانە ەكىجاقتى ىنتىماقتاستىقتى نىعايتۋعا ەرەكشە نازار اۋدارادى»، — دەدى ا. مامين.

ۇكىمەت باسشىسى بۇگىندە قازاقستان–وزبەكستان قارىم-قاتىناسى ىنتىماقتاستىقتىڭ ساپالى جوعارى دەڭگەيىنە شىققانىن اتاپ ءوتتى. مۇنى بارلىق دەرلىك دەڭگەيلەردەگى ءوزارا ارەكەتتەسۋ قارقىنى دالەلدەيدى.

كەلىسسوزدەر بارىسىندا ساۋدا-ەكونوميكالىق، ينۆەستيتسيالىق، ەنەرگەتيكالىق، ترانزيتتىك-كولىك، قۇرىلىس، توقىما، اۆتوموبيل جاساۋ، مادەني-گۋمانيتارلىق، تۋريستىك جانە باسقا دا سالالارداعى ىنتىماقتاستىقتى ودان ءارى دامىتۋ بويىنشا كەڭ اۋقىمدى ماسەلەلەر تالقىلاندى.

2019 جىلعى 9 ايدىڭ قورىتىندىسى بويىنشا قر مەن ءور اراسىنداعى ءوزارا ساۋدا-ساتتىق 25%-عا $2,6 ملرد دەيىن ءوستى. الداعى جىلدارى تاۋار اينالىمىن $5 ملرد دەيىن جەتكىزۋ جوسپاردا بار.

ەرتەڭ قر پرەمەر-ءمينيسترى اسقار مامين شانحاي ىنتىماقتاستىق ۇيىمىنا (شىۇ) مۇشە مەملەكەتتەردىڭ ۇكىمەت باسشىلارى كەڭەسىنىڭ (ۇبك) وتىرىسىنا قاتىسادى.

سوڭعى جاڭالىقتار