30 قازان, 18:41 497 0 ىشكى ساياسات دينارا مىڭجاسارقىزى

نۇر-سۇلتاندا رەسپۋبليكالىق جاستار فورۋمى ءوتتى

بۇگىن قازاقستان حالقى اسسامبلەياسىنىڭ ۇيىمداستىرۋىمەن نازارباەۆ ۋنيۆەرسيتەتىندە رەسپۋبليكالىق «Social Assembly» جاستار فورۋمى ءوتتى. كرەاتيۆتى جوبالاردى جۇزەگە اسىرۋعا مۇمكىندىك بەرەتىن تالانتتى جاستارعا ارنالعان الاڭ قۇرۋدى ماقسات ەتكەن فورۋمعا ەلىمىزدىڭ ءار ايماعىنان 100-گە جۋىق جاستار جينالدى.

ولار ايماقتاعى جاستار جىلىنىڭ قورىتىندىسى بويىنشا بەينەروليكتەرىن تانىستىردى، سونداي-اق، ستارتاپ-جوبالارى بار جاستاردىڭ بيزنەس-يدەيالارى ساراپقا سالىندى.

فورۋم جۇمىسىنا قحا مۇشەلەرى، مەملەكەتتىك ورگاندار مەن مەكەمەلەردىڭ وكىلدەرى، «100 ەسىم» جوباسىنىڭ جەڭىمپازدارى مەن جاستار ۇيىمدارى قاتىستى.

قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆپەن كەزدەسكەن جاستار وزدەرىن تولعاندىرعان ماسەلەلەردى ورتاعا سالدى، سونداي-اق، ەل دامۋىنا جاستاردىڭ قوسار ۇلەسى تاقىرىبىندا سۇحبات قۇردى.

جانسەيىت قانسەيىتۇلى اسسامبلەيانىڭ جاستار قوزعالىسىنىڭ جاستار جىلى اياسىندا اتقارعان جۇمىسىنا جوعارى باعا بەردى. سونداي-اق، جاستار تانىستىرۋعا ۇسىنعان الەۋمەتتىك جوبالاردىڭ ىسكە اسىرىلاتىنىنا سەنىم ءبىلدىردى. «الداعى ۋاقىتتا دا جاس كوشباسشىلاردىڭ الەۋەتىن دامىتىپ، جاڭا يدەيالار مەن ۇسىنىستاردى جۇزەگە اسىرۋعا مۇمكىندىك بەرەتىن جاعداي قالىپتاستىراتىن بولامىز. 2019 جىل قازاقستان ءۇشىن ەرەكشە جىل بولدى. ءبىز تاۋەلسىزدىك جىلدارى ىشىندە العاش رەت جاستار جىلىن وتكىزىپ، اۋقىمدى ىستەرگە سەرپىن بەردىك»، - دەدى جانسەيىت تۇيمەباەۆ.

قازاقستان حالقى اسسامبلەياسى جاستاردىڭ كرەاتيۆتى جوبالارىن جۇزەگە اسىرۋ الاڭىنا اينالۋدى كوزدەيدى. فورۋم اياسىندا جاستار جوبالىق مەنەدجمەنت، نەتۆوركينگ بويىنشا دارىستەر تىڭداپ، «جاستار جىلى-داڭعىل جول» ونلاين كونكۋرسىنىڭ ناتيجەسى جاريا ەتىلدى. سونداي-اق، جاس مەملەكەتشىلدەر الەۋمەتتىك ماسەلەلەردى شەشۋ بويىنشا وزدەرىنىڭ ۇسىنىستارىن دا ايتتى.

اتالعان جيىنعا ستارتاپ جوبالاردىڭ جۇزەگە اسىرىلۋىنا مەنتورلىق كولداۋ كورسەتۋ، ينۆەستيتسيا تارتۋ ماقساتىندا كاسىپكەرلەر دە قاتىستى. ناتيجەسىندە، تاڭدالىپ الىنعان بيزنەس جانە الەۋمەتتىك جوبالار شاقىرىلعان سپيكەرلەر مەن مەنتورلاردىڭ تالقىلاۋىنا ۇسىنىلدى. ەڭ وزىق شىققاندارى «ۇزدىك الەۋمەتتىك جوبا»، «ۇزدىك بيزنەس-يدەيا»، «ۇزدىك ءىت جوبا»، «ۇزدىك مەديا جوبا» نوميناتسيالارى بويىنشا ماراپاتقا ۇسىنىلدى. سونداي-اق، جاستار وكىلدەرىنىڭ ينتەراكتيۆتى ترەنينگتەر ارقىلى باق سىناسۋىنا، تاجىريبە الماسۋىنا مۇمكىندىك بەرىلدى.

فورۋم اياسىندا «Innovation Day»، «Startup الاڭى» كورمەلەرى ۇيىمداستىرىلدى. ايماقتاردان كەلگەن جاستار ءوز جوبالارىن تانىستىرۋ مۇمكىندىگىنە يە بولدى. قحا جاستار قاناتى ايماقتىق شتابتارىنىڭ كوشباسشىلارى جاستاردىڭ ەل دامۋىنداعى الاتىن ورنى مەن قىزمەتى تاقىرىبىندا ءوز ويلارىن ورتاعا سالىپ، وڭىرلەردە جۇرگىزىلىپ جاتقان جۇمىستار بويىنشا ەسەپ بەردى.

فورۋمدا جاستار باسەكەگە قابىلەتتىلىك تاقىرىبىنىڭ توڭىرەگىندە دە پىكىر تالاستىردى. اسىرەسە، اۋىلدىڭ مەملەكەت تىرەگى ەكەندىگىنە باسىمدىق بەرگەن جاس مەملەكەتشىلدەر اۋىلداعى تالانتتى جاستاردىڭ ءوز يدەيالارىن جۇزەگە اسىرۋىنا قولداۋ كورسەتۋ كەرەك دەدى. جاستارعا اسىرەسە، قازاقستاندىقتاردىڭ ۇلكەن قىزىعۋشىلىعىن تۋدىرعان «100 ەسىم» جوباسىنىڭ جەڭىمپازدارىمەن كەزدەسۋ ۇلكەن شابىت سىيلادى. ولار حالىقتىڭ ىشىنەن سۋىرىلىپ شىققان ۇزدىكتەرمەن بۇكپەسىز سۇحباتتاسۋ ارقىلى، تابىستىلىق پەن تانىمالدىلىققا جەتۋدىڭ جولىن انىق ۇعىنعانداي بولدى. جاستارمەن كەزدەسۋگە ساياساتتانۋشىلار مەن قوعام قايراتكەرلەرى عانا ەمەس، سونداي-اق سپورتتىق دودالاردان قانجىعاسى قۇر قايتپاعان جەڭىمپازدار مەن ونەردىڭ شىڭىن باعىندىرعان دارىندى ونەرپازدار دا كەلگەن بولاتىن.

سونداي-اق، فورۋم قاتىسۋشىلارى ءۇشىن نازارباەۆ ۋنيۆەرسيتەتىنە ەكسكۋرسيا ۇيىمداستىرىلىپ، «اباي الەمى» بۇرىشى تانىستىرىلدى.

جيىن سوڭىندا فورۋم جۇمىسىنا قاتىسۋشىلار كەلەسى جىلدىڭ ەرىكتىلەر جىلى دەپ جاريالانۋىنا بايلانىستى ءوز ۇسىنىستارىن ءبىلدىردى.

سوڭعى جاڭالىقتار