17 قازان, 14:43 341 0 مادەنيەت انار لەپەسوۆا

قازاقشا سويلەگەن «مالەفيسەنتا» كورەرمەنگە جول تارتتى

كۇنى كەشە «مالەفيسەنتا: تۇنەك ءامىرشىسى» ءفيلمىنىڭ قازاق تىلىندەگى الدىن الا كورسەتىلىمى ءوتتى. فيلم «بولاشاق» كورپوراتيۆتىك قورى مەن "مەلومان" كومپانياسىنىڭ باستاماسىمەن، «Nur Otan» پارتياسىنىڭ قولداۋىمەن «وزىڭنەن باستا» جوباسى اياسىندا دۋبلياجدالدى. فيلم دۋبلياجىنىڭ دەمەۋشىسى ەۋرازيالىق توپ (ERG).

ءىس-شارادا العاش بولىپ ءسوز العان «بولاشاق» كورپوراتيۆتىك قورى قامقورشىلىق كەڭەسىنىڭ قۇرمەتتى مۇشەسى، «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك جوبانىڭ نەگىزگى ماقساتىنا توقتالدى.

– 1993 جىلدان باستاپ ەلباسىنىڭ جارلىعىمەن «بولاشاق» باعدارلاماسى جۇزەگە اسىپ كەلەدى. باعدارلامانىڭ ارقاسىندا قاراپايىم وتباسىنان شىققان كوپتەگەن جاسقا شەت ەلدەردەگى الدىڭعى قاتارلى وقۋ ورىندارىندا ءبىلىم الۋعا مۇمكىندىك جاسالدى. وسىنداي اعىلشىن، نەمىس، فرانتسۋز جانە تاعى دا باسقا تىلدەردى مەڭگەرگەن جاستار حالقىڭا قىزمەت ەتەمىن دەسەڭ الدىمەن ءوز انا ءتىلىڭدى ءبىلىپ، ۇلتتىق سالت-ءداستۇر مەن مادەنيەتتى بويعا ءسىڭىرۋ كەرەك ەكەنىن جاقسى ءتۇسىندى. سوندىقتان دا «بولاشاق»-پەن وقىعان ءبىر توپ جاستىڭ باستى ماقساتى ەلگە ورالعان سوڭ ءارتۇرلى سالادا قولىمىزدان كەلگەنشە ەلگە قىزمەت ەتۋ بولدى. بۇل جوبا وسىنداي يگى ويدان تۋدى, دەدى باۋىرجان بايبەك.

گولليۆۋد فيلمدەرىن قازاق تىلىنە دۋبلياجداۋ – بۇل ءبىرىنشى كەزەكتە، ءاربىر قازاقستاندىقتىڭ قازاق تىلىندەگى ساپالى كونتەنتكە قول جەتكىزۋ قۇقىعى. ال گولليۆۋدتىڭ تانىمال كينو تۋىندىلارى ەلىمىزدە 2011 جىلدان باستاپ قازاقشا سويلەتىپ كەلە جاتقان «وزىڭنەن باستا» جوباسى كوممەرتسيالىق ماقساتتى كوزدەمەيدى. وسى ورايدا، «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك:

– جاستار مەملەكەت ماعان نە بەرەدى دەپ ەمەس، ارقايىسى ءوز سالاسىندا انا تىلىنە، ءداستۇر مەن مادەنيەتىمىزگە دەگەن قۇرمەتتى وزىنەن باستاپ، ارەكەت ەتسە، ەلىمىزدىڭ جەتىستىگى ەسەلەنە تۇسپەك. حالقىمىزدىڭ رۋحى بەرىك، تاۋەلسىز ەلىمىزدىڭ ەرتەڭى جارقىن بولعاي! - دەدى باۋىرجان بايبەك.

ايتا كەتەيىك، ءفيلمدى دۋبلياجداۋعا جوبانىڭ دەمەۋشىسى بولىپ وتىرعان Eurasian Resources Group-تىڭ قىزمەتكەرلەرى دە قاتىسقان.

– ءبىزدىڭ ءۇش ارىپتەسىمىز كاستينگتەن ءوتتى. ەندى ولاردىڭ داۋىستارىن فيلمدە تىڭداي الامىز. سونداي-اق، كومپانيا ءفيلمنىڭ دۋبلياجىن قارجىلاندىرۋمەن قاتار، قازاقستاننىڭ بەس قالاسىندا قايىرىمدىلىق كورسەتىلىمدەر وتكىزىپ، وعان بالالار ۇيلەرىنىڭ، كوپ بالالى جانە الەۋمەتتىك جاعدايى تومەن وتباسىلاردان شىققان 500-دەن اسا بالاقاي قاتىستى. ERG ءۇشىن بۇل – مەملەكەتتىك ءتىلدى دامىتۋعا جانە ناسيحاتتاۋعا قوسقان تاعى ءبىر ۇلەس، –  دەدى ERG كومپانياسىنىڭ وكىلى تالعات تورەبەكوۆ.

سونىمەن قاتار، ءفيلمىنىڭ قازاق تىلىندەگى الدىن الا كورسەتىلىمىنە ونەر، مەديا سالالارى مەن "بولاشاق" قاۋىمداستىعىنىڭ مۇشەلەرى جانە باسقا دا قۇرمەتتى قوناقتار قاتىستى.

«مالەفيسەنتا» ميستيكالىق بلوكباستەرىندە جوبا اياسىندا مالەفيسەنتانىڭ ءرولىن دىبىستاۋعا ايرىقشا قۇقىقتار الىنعان. ماسەلەن، اندجەلينا دجولي قازاقستاندىق تەاتر جانە كينو اكتريساسى گۇلناز اۋەسبايدى ءوزىنىڭ كەيىپكەرىن دىبىستاۋعا جەكە بەكىتتى. قازاق دۋبلياجىنىڭ رەجيسسەرى نازەركە لەسپەكقىزى. فيلم كاستينگىنە نۇر-سۇلتان، الماتى جانە قاراعاندى قالالارىنان 40-تان استام اكتەرلەر قاتىسقان.

2019 جىلى قاراشا ايىندا تاعى ءبىر قازاق تىلىنە دۋبلياجدالعان "حولودنوە سەردتسە 2"/ "مۇزدى ولكە 2" ءفيلمىنىڭ پرەمەراسى كۇتىپ تۇر.

«وزىڭنەن باستا» جوباسىن اياسىندا قازاق تىلىنە بارلىعى 32 گولليۆۋدتىق تۋىندى دۋبلياجدالسپا، ولاردىڭ ىشىندە «كولىكتەر 2»، «كەك الۋشىلار: الترون ءدəۋىرى»، «باتىل جۇرەك»، «كوكو قۇپياسى»، «موانا»، «مالەفيسەنتا»، «الاددين»، «ويىنشىقتار حيكاياسى - 4» جانە ت.ب. فيلمدەر بار. وسى جوبانىڭ ارقاسىندا 100-دەن استام وتاندىق اكتەردىڭ داۋىسى "Walt Disney Pictures" داۋىستىق قورىنا جازىلدى. قازاق ءتىلى دۋبلياجدا تۇرىك تىلىنەن كەيىنگى ەكىنشى تۇركى ءتىلى بولىپ تۇر جانە "Walt Disney" كومپانياسىنىڭ تاريحىندا 39-شى ورىندا.

سوڭعى جاڭالىقتار