16 قازان, 21:41 282 0 الەۋمەت انار لەپەسوۆا

نۇرسۇلتاندىقتاردىڭ سۋعا بەرەشەگى 1 ملرد تەڭگەگە جۋىقتادى

ەلوردالىقتاردىڭ سۋعا قارىزى ميللياردقا جۋىقتاعان. بەرەشەگى كوبەيگەندەر قاتارىندا قۇرىلىس كومپانيالارى مەن جەكە كاسىپكەرلەر دە بار. بۇل تۋرالى "استانا سۋ ارناسى" كومپانياسى حابارلادى.

كوممۋنالدىق سالا قىزمەتكەرلەرى وزدەرىنە تيەسىلى اقشانى الۋ ءۇشىن سۋ مەن كارىز جۇيەسىنەن اجىراتۋ جازاسىن قولدانا باستادى.  جاتاقحانانىڭ كومەندانتى بۇگىن تەكسەرۋشىلەردى كۇتپەسە كەرەك. سۋعا قارىزى 2 ميلليون تەڭگەدەن اسقان تۇرعىن يەسىنە حابارلاسىپ شاقىرا باستادى. مۇندا بارلىعى جۇزگە جۋىق پاتەر جالداۋشىلار تۇرادى.

"ۋاقتىلى تولەمەيدى، سول سەبەپتى، بۇگىن ءبىز قوسقاباتتى ءۇيدى سۋمەن قامتاماسىز ەتۋ جۇيەسىنەن اجىراتتىق", – دەيدى "استانا سۋ ارناسى" كومپانياسىنىڭ تەحنيگى كۇلشە سايفۋلينا.

مىنا قوسقاباتتى جەر ءۇيدىڭ يەسى دە سۋدى پايدالانعان ءۇشىن اقىسىن تولەۋگە اسىعار ەمەس. كوممۋنالدىق سالا قىزمەتكەرلەرى بىرنەشە مارتە ءۇيدى سۋدان اجىراتقان. الايدا، زاڭ بۇزۋشىعا بۇل شارا اسەر ەتپەگەن كورىنەدى. بەرەشەگى 180 مىڭنان اسىپ كەتكەن.

رەۆيزورلاردىڭ ايتۋىنشا، كوبىنە ادامدار ۇيلەرىندە بولمايدى نەمەسە ەسىكتى قاساقانا اشپايدى. ال جازباشا جىبەرىلگەن ەسكەرتۋدى ءتىپتى ەلەمەيدى ەكەن. ءۇي يەلەرى تاراپىنان ەشقانداي ارەكەت بولماعان سوڭ سۋدى بۇعاتتاۋعا تۋرا كەلەدى.

ء"بىز كاسسالىق اپپاراتتى تۇرعىنداردىڭ ىڭعايى ءۇشىن الىپ جۇرەمىز. ءبىر جەردەن ەكىنشى جەرگە بارىپ جۇرمەي، بىردەن بىزگە تولەۋ ءۇشىن. الايدا قارىزعا بەلشەسىنەن باتقاندار بۇل مۇمكىندىكتى دە پايدالانبايدى", – دەيدى "استانا سۋ ارناسى" كومپانياسىنىڭ باقىلاۋشىسى ايگەرىم بورانباەۆا.

ەلوردادا سۋ مەن كارىزدى تۇتىنۋشىلاردىڭ جالپى قارىزى ميلليارد تەڭگەدەن اسقان. ونىڭ جارتى ميلليونعا جۋىعى بانكروتقا ۇشىراعان قۇرىلىس كومپانيالارى مەن مەكەمەلەرگە تيەسىلى. ال جەكە تۇلعالاردىڭ بەرەشەگى 300 ملن تەڭگەگە جەتكەن.

«شاتىر ارقىلى ارنايى قۇرىلعىمەن كارىز جۇيەسىن تولىق جابامىز. سوسىن پاتەر ىشىندە تۇتىنۋشى سۋدى قولدانا المايدى. ويتكەنى سۋ اقپاي تۇرىپ قالادى»، – دەيدى «استانا سۋ ارناسى» كومپانياسىنىڭ ابونەنتتىك ۋچاسكە باستىعى تاتيانا سترەلچەنكو.

ماماندار قارىزدى بىردەن ءونىدىرىپ الۋ مۇمكىن ەمەستىگىن ايتادى. الايدا، بورىشكەرلەردىڭ ۇياتى ويانباعانشا، ەلوردادا بۇل رەيد جالعاسا بەرمەك.

 

سوڭعى جاڭالىقتار