16 قازان, 14:53 308 0 ەكونوميكا انار لەپەسوۆا

«ەير استانا» وتاندىق كاسىپكەرلەرگە باسىمدىق بەرمەك

«ەير استانا» اكتسيونەرلىك قوعامى الماتىدا اشىق ەسىك كۇندەرىن وتكىزدى. جيىندا اۋە كومپانياسىنىڭ تەندەر ۇتىپ الۋشىلارعا قوياتىن تالاپتارى مەن مىندەتتەرى ءتۇسىندىرىلدى.

شارا بارىسىندا وتاندىق جانە شەتەلدىك وندىرۋشىلەر وندىرگەن، «ەيراستانا» ساتىپ العان تاۋارلار كورمەگە قويىلدى. اۋەكومپانياسى بۇگىنگى تاڭدا قازاقستاندىق تاۋارلاردى تۇتىنۋعا قىزىعۋشىلىق تانىتىپ وتىر. ەگەر تاۋار ساپاسى مەن سەرۆيستىك قىزمەت جاقسى بولسا، ول ءونىمدى ەشقانداي قيىندىقسىز ساتىپ الاتىندارىن جەتكىزدى.

اشىق ەسىككە «ەير استانا» اق ساتىپ الۋ ءبولىمىنىڭ ۆيتسە-پرەزيدەنتى ديليارا كۇنقوجاەۆا، «سامۇرىق-قازىنا» ۇلتتىق ءال-اۋقات قورى مەن «اتامەكەن» ۇلتتىق كاسىپكەرلەر پالاتاسىنىڭ وكىلدەرى قاتىسىپ، ارنايى ءسوز سويلەدى.

ديليارا كۇنقوجاەۆا كەلتىرگەن مالىمەتكە سۇيەنسەك، مەملەكەتتىك ساتىپ الۋدان جەڭگەن تاسىمالداۋشىلار بازاسى 25 مىڭنان استام بولسا، سونىڭ 34 پايىزى جەرگىلىكتى كاسىپكەرلەر ەنشىسىندە. كومپانيا وكىلدەرى وسى 34 پايىزدى الداعى ۋاقىتتا جوعارىلاتپاق نيەتتە.

«ەير استانا» اق-نىڭ 51 پايىز اكتسياسى «سامۇرىق-قازىنا» ۇلتتىق ءال-اۋقات قورىنا تيەسىلى بولسا، قالعان 49 پايىزعا ۇلىبريتانيالىق «BAE Systems» كومپانياسى يە.

تاراپتار شەشىمىمەن «ەير استانا» كومپانياسىنىڭ سەرۆيستىك قىزمەتى جىل سايىن جاقسارىپ كەلەدى. وعان تەندەرگە بولىنگەن قاراجات تا اسەر ەتسە كەرەك. ماسەلەن 2017 جىلى 153 ملرد تەڭگە قاراستىرىلسا، بۇل سومما 2019 جىلى 219 ملردقا جەتكەن. كومپانيا وكىلدەرى بارلىق قازاقستاندىقتاردى «ەير استانا» كومپانياسىنىڭ تەندەرىنە قاتىسۋعا شاقىرىپ، كەش سوڭىندا ۇزدىك تاۋار جەتكىزۋشىلەردى ماراپاتتادى.

 

سوڭعى جاڭالىقتار