16 قازان, 10:48 286 0 رۋحانيات انار لەپەسوۆا

الماتى اكىمى بىرقاتار قالامگەرلەردى پرەزيدەنتتىڭ العىس حاتىمەن ماراپاتتادى

بيىل «قر ءتىل تۋرالى» زاڭىنىڭ قابىلدانعانىنا 30 جىل. وسىعان وراي الماتىداعى بىرنەشە اقىن، جازۋشىلار ەل پرەزيدەنتى قاسىم-جومارت توقاەۆتىڭ العىس حاتىمەن ماراپاتتالدى. قالا اكىمى باقىتجان ساعىنتاەۆ زيالى قاۋىمدى ايتۋلى داتامەن قۇتتىقتاپ، قازاق ءتىلىنىڭ ماڭىزدىلىعىن اتاپ ءوتتى، دەپ حابارلايدى "الماتى" ارناسى. 

«پرەزيدەنتىمىز ءوزىنىڭ جولداۋىندا «قازاق ءتىلى ەندى جالپى ۇلتارالىق تىلگە اينالۋى كەرەك» دەپ ايتىپ ءوتتى عوي. سوعان دا بىرتە-بىرتە جەتەمىز. وڭتۇستىك وڭىرلەردى نە باتىس ءوڭىردى الساڭىز، نەگىزىنەن قازاقشا سويلەيدى», – دەدى الماتى قالاسىنىڭ اكىمى باقىتجان ساعىنتاەۆ.

شاراعا جينالعان مەملەكەتتىك جانە قوعام قايراتكەرلەرى، سونداي-اق، ءتىل جاناشىرلارى قازاق ءتىلىن دامىتۋدا ءوز ۇسىنىستارىن ايتتى. ءبىرى، زاڭدى قاتاڭداتۋ كەرەك دەسە، ەكىنشىسى مەكتەپتەردە قازاق جازۋشىلارىنىڭ كىتاپتارىن كوبەيتكەن ءجون دەيدى. سونداي-اق، قازاق ءتىلىن زامان تالابىنا ساي دارىپتەۋ دە ءسوز بولدى.

«سوڭعى 20 جىلدا مەكتەپ كىتاپحانالارىنا جاڭا ادەبي كىتاپتار تۇسكەن جوق.  وقۋلىقتار جانە قوسىمشا كىتاپتار بولۋى مۇمكىن. بىراق قازاق جازۋشىلارىنىڭ كىتاپتارى مەكتەپ كىتاپحانالارىندا جوق. ال، بۇل – ۇلكەن پروبلەما», – دەدى قازاقستان جازۋشىلارى وداعى توراعاسىنىڭ ورىنباسارى مەرەكە قۇلكەنوۆ.

«اۋدارما كونتەنتتەردىڭ ىشىندە قازاق ءتىلى تۇرۋ كەرەك. وسىنداي قازاق ءتىلى ەشقانداي ادام رەسۋرستارىن قوسپاي-اق، تەحنولوگيا بويىنشا اۋدارىپ وتىراتىن بولساق، وندا بۇكىل جوو ءبىلىم مازمۇندارى قازاق تىلىنە ەرىكسىز كوشىپ كەتەدى. جانە جاستار قينالماي، ءبىلىمدى يگەرە بەرەتىن بولادى. وسىنداي دۇنيەگە جەتەتىن بولساق، وندا قازاق ءتىلىنىڭ ءورىسى كەڭەيەدى دەپ ويلايمىن», – دەدى الماتى قالالىق ءماسليحاتىنىڭ دەپۋتاتى كەنجەحان ماتىجانوۆ.

سوڭعى جاڭالىقتار