15 قازان, 11:11 277 0 دەنساۋلىق انار لەپەسوۆا

ەلىمىزدە جىل سايىن 15 مىڭ ادام قاتەرلى ىسىكتەن كوز جۇمادى

جىل سايىن قازاقستاندا 35 مىڭ ادامنان قاتەرلى ىسىك انىقتالادى. قازىر 180 مىڭعا جۋىق ناۋقاس ەسەپكە الىنعان. دارىگەرلەردىڭ ايتۋىنشا، بۇل دەرتكە شالدىققانداردىڭ 50 پايىزى ەمدەلىپ شىعادى، دەپ حابارلايدى «حابار 24».

ال، مەملەكەت ونكولوگيالىق اۋرۋلاردى ەمدەۋگە جىل سايىن 36 ملرد تەڭگە ءبولىپ وتىر. ودان بولەك، وزىق تەحنولوگيالى ەمدەۋ ادىستەرى ەنگىزىلىپ جاتىر.

اتى قورقىنىشتى اۋرۋعا شالدىققانداردىڭ كوبى دارىگەردىڭ الدىنا كەش كەلەدى. ال، اسقىنعان دەرتتى ەمدەۋ قيىن. ەلورداداعى ونكولوگيا ورتالىعىنىڭ باس دارىگەرى مۇحتار تولەۋتاەۆتىڭ ايتۋىنشا، سىرقاتتاردىڭ 40%-ءى 3 نەمەسە 4 ساتىسىندا ەم ىزدەيدى. ول كەزەڭدە ىسىك مەتاستازاعا اينالا باستايدى. دارىگەردىڭ اۋزىنان جامان دەرت تۋرالى ەستىگەن سىرقاتقا پسيحولوگتىڭ دا كومەگى كەرەك بولادى. ادام اۋرۋدى سۇراپ المايدى. «دەگەنمەن، اعزادا قانداي دا دەرتتىڭ بەلگىسىن بايقاعان ادام دەرەۋ دارىگەرگە بارعانى دۇرىس»، - دەدى تاجىربيەلى ونكولوگ. قازىر سىرقاتتاردى ەمدەۋدىڭ جاڭا ادىستەرى دە كوبەيدى.

مۇحتار تولەۋتاەۆ، قالالىق ونكولوگيا ورتالىعىنىڭ ديرەكتورى:

- باس پەن مويىن اۋماعىندا ورنالاسقان ىسىكتەر بولادى، جاق سۇيەگى، ءتىل، ءتىلدىڭ وبىرى، اۋىز قۋىسىنىڭ وبىرى دەيدى. سول جەردە ميكروحيرۋرگيالىق جاق قالىپتاستىرۋ، ادامعا جاساندى ءتىل جاسايتىنداي وپەراتسيالار قولعا الىنىپ، كومەك كورسەتە الامىز. ول ميكروسكوپيا ارقىلى جاسالاتىن وپەراتسيا. ودان كەيىن اۋىز قۋىسىندا پلاستيكالىق وپەراتسيا جاساپ، سول مۇشەلەردە كەزدەسكەن ىسىكتەردى الىپ تاستاۋعا وتالاردى مەڭگەرگەن.

توموتەراپيا. ەلىمىزدە بيىل قولدانىلا باستادى. 130 ادام وسى ادىسپەن ەم قابىلداعان. ونىڭ ۇشتەن ءبىرى تەگىن مەديتسينالىق كومەك اياسىندا ەمدەلگەن. نەسىمەن ەرەكشەلەنەدى دەسەك. ادامنىڭ دەنەسىندە حيرۋرگيالىق تىلىك جاسالمايدى. ىسىكتى جان-جاعىنان ساۋلەمەن سىلىپ الادى. بۇل تەراپيا ورتا ازيا ەلدەرىندە تەك قازاقستاندا بار. سوندىقتان كورشى ەلدەردەن دە سىرقاتتار كەلە باستاعان.

ەرجان شاياحمەتوۆ، يادرولىق مەديتسينا جانە توموتەراپيا ورتالىعىنىڭ حيرۋرگ-ونكولوگى:

- بۇل ۇدەتكىش جەلىمەن سالىستىرعاندا از مولشەرى تەراپيا سانالادى. ياعني، تيىمدىلىگى – ەمدەۋ ءۇشىن از مولشەرلى، تومەن پروتسەنتتى ساۋلە قولدانىلادى. سونداي-اق ىسىكتىڭ جان-جاعىنداعى ساۋ تىندەرگە زيانىن تيگىزبەيدى. مىسالى، قۋىقاستى بەزىنىڭ قاتەرلى ىسىگىن 99%-كە ەمدەپ شىعادى. ارى قاراي گورموندى تەراپيامەن ەمدەيدى.

ەلىمىزدە 180 مىڭعا جۋىق ادام قاتەرلى ىسىك اۋرۋىمەن ەسەپتە تۇر. جىل سايىن مىڭداعان ادامنان انىقتالادى. دەرت سالدارىنان 15 مىڭ ادامنىڭ ءدام-تۇزى تاۋسىلادى. دەنساۋلىق ساقتاۋ مينيسترلىگىنىڭ مالىمەتىنشە، شىعىس قازاقستان، قاراعاندى مەن تۇركىستان وبلىستارىندا كورسەتكىش جوعارى.

 

سوڭعى جاڭالىقتار