14 قازان, 15:54 459 0 سىرتقى ساياسات دينارا مىڭجاسارقىزى

تۇركىمەنستان Google بۇلتىن بۇعاتتادى

تۇركىمەنستان بيلىگى Google كومپانياسىنىڭ مالىمەتتەر ساقتايتىن بۇلتىن بۇعاتتادى. بۇل تۋرالى Turkmen.news باسىلىمى Qurium Media Foundation شۆەد ۇكىمەتتىك ەمەس ۇيىمىنىڭ ەسەبىنە سىلتەمە جاساپ حابارلادى.

بۇعاتتاۋ DNS-سەرۆەردى الماستىرىپ، جالعان IP كورسەتۋ ارقىلى جۇزەگە اسقان. سونىڭ سالدارىنان قولدانۋشىلار سۇراعان پاراقتى اشا الماي قالادى.

حابارلارعا قاراعاندا، Google بۇلتىنا ماۋسىم ايىنىڭ باسىندا turkmen.news سايتىنىڭ كوشىرمەسى ساقتالعان. تۇركىمەنستاندا ول بىرنەشە كۇن اشىلىپ تۇردى، بىراق كەيىن ونى دا جاۋىپ تاستادى.

ماماندار بۇعاتتاۋدىڭ بۇل تۇرىنە بيلىك قىرۋار قاراجات جۇمساپ وتىرعانىن ايتتى.

تۇركىمەنستان بيلىگى ينتەرنەتتى باقىلاۋ مەن بۇعاتتاۋعا قاجەتتى تەحنولوگيالاردى شەتەلدەن ساتىپ العان. تۇركىمەن ارنايى قىزمەتى ونى نەمىستىڭ Rohde & Schwarz كومپانياسىنان العان.

تۇركىمەنستاندا الەۋمەتتىك جەلىلەر، الەمدىك اقپارات قۇرالدارىنىڭ سايتتارى، سونىمەن بىرگە فايل الماسۋ سەرۆيستەرى اشىلماي تۇر.

سوڭعى جاڭالىقتار