14 قازان, 11:55 234 0 زاڭ انار لەپەسوۆا

برازيليادان قازاقستان مەن تۇركياعا كوكاين تاسىمالداعان قىلمىستىق توپ سوتتالدى

ۇلتتىق قاۋىپسىزدىك كوميتەتى كوكاين كونترابانداسىنىڭ ترانزيتتىك ارناسىنىڭ جولىن كەستى، دەپ حابارلايدى ۆەدومستۆونىڭ ءباسپاسوز قىزمەتى. 

ۇقك الماتى قالاسى بويىنشا دەپارتامەنتى شىمكەنتتىك ارىپتەستەرىمەن بىرگە برازيليادان ءباا ارقىلى قازاقستانعا جانە ودان ءارى تۇركياعا كوكاين جەتكىزۋدىڭ حالىقارالىق ارناسىن انىقتاپ، جولىن كەستى.

«2019 جىلعى ناۋرىزدا ۇقك الماتى قالالىق دەپارتامەنتى جەدەل ىزدەستىرۋ بارىسىندا الماتى اۋەجايىندا كونتراباندالىق جولمەن كوكاين اكەلدى دەگەن كۇدىكپەن «دۋباي-الماتى» اۆيارەيسىنىڭ جولاۋشىسى، قر ازاماتى م. ساتىبالديەۆتى ۇستادى. ت ەكسەرۋ كەزىندە قالالىق كلينيكالىق اۋرۋحانانىڭ مەدقىزمەتكەرلەرى ارنايى پروتسەدۋرا جۇرگىزىپ، م. ساتىبالديەۆتىڭ اسقازان-ىشەك جولدارىنان جالپى سالماعى 460 گرامم كوكاينى بار 42 كاپسۋلا تابىلدى. جەدەل تەرگەۋ ءىس-شارالارىنىڭ ناتيجەسىندە وعان تۋىستىق قاتىسى بار ل. قۇرمانباەۆا ۇستالدى. ول كورسەتىلگەن ەسىرتكى پارتياسىن برازيليادان قر-عا كونتراباندالىق جولمەن جەتكىزۋدى ۇيىمداستىرعان، سونداي-اق ولاردى تۇركياعا تاسىمالداماق بولعان» دەلىنگەن حابارلامادا.

بيىلعى ماۋسىمدا الماتى قالالىق مامانداندىرىلعان اۋدانارالىق قىلمىستىق ىستەر بويىنشا سوتىنىڭ ۇكىمىمەن ل. قۇرمانباەۆا مەن م. ساتىبالديەۆ قر قك 297-بابى 3-بولىگى جانە 286-بابى 4-بولىگى بويىنشا كىنالى دەپ تانىلدى. ولار قاۋىپسىزدىگى بارىنشا جوعارى تۇزەۋ كولونياسىندا 15,5 جىل جازاسىن وتەيدى.

 

سوڭعى جاڭالىقتار