13 قازان, 18:53 322 0 نۇر وتان انار لەپەسوۆا

الماتىداعى ەڭ ۇلكەن كوك بايراق مەدەۋدە جەلبىرەدى

«مەدەۋ» مۇز ايدىنىنىڭ ماڭىنا الماتىداعى ەلىمىزدىڭ ەڭ ۇلكەن تۋى تىگىلدى. كوك بايراقتى كوتەرۋ سالتاناتىنا ەسىمدەرى ەلگە بەلگىلى سپورتشىلار مەن قالاداعى جاستار ۇيىمدارىنىڭ وكىلدەرى قاتىستى.
«مەملەكەتتىك تۋىمىزدى الماتىنىڭ تورىندە جەلبىرەتۋىمىزدىڭ ەرەكشە ءمانى بار. ەلباسى ايتقانداي، الماتى – تاۋەلسىزدىكتىڭ التىن بەسىگى. وسى جەردە ەلباسى، ەلىمىزدىڭ تۇڭعىش پرەزيدەنتى نۇرسۇلتان نازارباەۆ تاۋەلسىزدىگىمىزدى جاريا ەتىپ، قاستەرلى مەملەكەتتىك رامىزدەرىمىز، اتا زاڭىمىز بەن ۇلتتىق تەڭگەمىز قابىلداندى. ال «مەدەۋ» – ەلىمىزدىڭ جانە شەتەلدىك تالاي سپورت ساڭلاعىنىڭ الەمدىك رەكوردىنا كۋا بولعان اسەم دە، داڭقتى مەكەن. ءدال وسى جەردە ازيادا جانە ۋنيۆەرسيادا وتكەنىن بىلەسىزدەر. مەملەكەت باسشىسى قاسىم-جومارت توقاەۆ ايتقانداي، «كوك بايراعىمىز كوككە كوتەرىلگەندە، ەلىمىز ءۇشىن، تاۋەلسىزدىكتىڭ ارقاسىندا قول جەتكىزگەن بارلىق جەتىستىكتەرىمىز ءۇشىن كەۋدەمىزدى ماقتانىش سەزىمى كەرنەيدى». ەلتاڭبامىز ەلدىك بەن ەركىندىكتەن باستاۋ العان رۋحىمىزدى اسپانداتىپ، ايبىنىمىزدى اسىرا ءتۇسسىن! اۋەزدى ءانۇرانىمىز ماڭگى شىرقالىپ، ارمان-اڭسارىمىزدى كوككە سامعاتا بەرسىن! بايتاق وتانىمىز، قاسيەتتى قازاق ەلى كۇن سونگەنشە سونبەسىن! ارقاشان كوك تۋىمىز كوگىمىزدە جەلبىرەي بەرسىن»، - دەدى «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك.
سالتاناتتى شارادا ءسوز العان وليمپيادا چەمپيونى جاقسىلىق ۇشكەمپىروۆ سپورتتىڭ ارقاسىندا دۇنيە ءجۇزىنىڭ تالاي جەرىن ارالاعانىمەن، قازاقستاننان ارتىق مەكەن جوق ەكەنىنە كوزى جەتكەنىن ايتتى.
«كەڭ بايتاق قازاق جەرىن الەمگە تانىتاتىن، مەملەكەتىمىزدى الدىڭعى قاتارلى ەل ەتەتىن دە سەندەرسىڭدەر. داڭقتى سپورتشىلارىمىزدىڭ جولىن جالعاپ، شەتەلدەردە ءانۇرانىمىزدى شىرقاتىپ، كوك بايراعىمىزدى جەلبىرەتەتىن دە وزدەرىڭ. سوندىقتان  تاۋەلسىزدىگىمىزدىڭ تۇعىرلى بولۋىنا بارلىعىمىز ءبىر كىسىدەي اتسالاسايىق!» - دەدى ارداگەر سپورتشى.
ايتا كەتۋ كەرەك، ەلىمىزدىڭ ۇلتتىق باسكەتبول فەدەراتسياسى مەملەكەتتىك تۋدى مەدەۋگە ورناتۋ تۋرالى باستاما كوتەرگەن-ءدى. بۇل باستاماعا «Nur Otan» پارتياسى مەن الماتى قالاسىنىڭ اكىمدىگى قولداۋ كورسەتتى. تۋدىڭ بيىكتىگى   40 مەتر، ال كولەمى – 7 دە 14 مەتر.

سوڭعى جاڭالىقتار