11 قازان, 14:32 273 0 جاھان انار لەپەسوۆا

قاسىم-جومارت توقاەۆ گۋربانگۋلى بەردىمۇحامەدوۆپەن كەزدەستى

مەملەكەت باسشىسى قاسىم-جومارت توقاەۆ اشحابادتا تۇرىكمەنستان پرەزيدەنتى گۋربانگۋلى بەردىمۇحامەدوۆپەن كەزدەستى، دەپ حابارلايدى اقوردا. 
كەزدەسۋ بارىسىندا تاراپتار قازاقستان مەن تۇرىكمەنستان اراسىنداعى ءوزارا سەنىم مەن اشىقتىققا قۇرىلعان ساياسي تۇسىنىستىكتىڭ جوعارى ەكەنىن اتاپ ايتتى.

قازاقستان پرەزيدەنتى تۇرىكمەن كوشباسشىسىنا قوناقجايلىلىعى ءۇشىن ريزاشىلىعىن ءبىلدىرىپ، ونىڭ قازاق-تۇرىكمەن قارىم-قاتىناسىنا قوسقان ۇلەسىنە توقتالدى.

– كيەلى تۇرىكمەن جەرىنە تابانىم تيگەن العاشقى ساتتەردەن باستاپ ماعان كورسەتكەن قۇرمەتىڭىزگە ريزامىن. ءوزىنىڭ اسەمدىگىمەن كوز تارتاتىن اشحاباد قالاسىنا تاعى كەلگەنىمە قۋانىشتىمىن. مەنىمەن بىرگە ۇلكەن دەلەگاتسيا كەلدى. ءبىزدىڭ كوپتەگەن پەرسپەكتيۆالى جوبالارىمىز بار. ەلدەرىمىز اراسىنداعى ارىپتەستىك وتە جوعارى دەڭگەيدە دامىپ كەلەدى دەپ ويلايمىن. بۇل تۇرعىدا قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆ پەن ءوزىڭىزدىڭ ۇلەستەرىڭىز زور،– دەدى قاسىم-جومارت توقاەۆ.

مەملەكەتتەر باسشىلارى ەكىجاقتى كەزدەسۋدىڭ كۇن تارتىبىندەگى ايماقتاعى جاعداي، ءارتۇرلى حالىقارالىق فورمات شەڭبەرىندەگى ءوزارا ءىس-قيمىلدار سەكىلدى اۋقىمدى ماسەلەلەر تالقىلادى.

 

سوڭعى جاڭالىقتار