9 قازان, 15:14 195 0 ساياسات انار لەپەسوۆا

نىعماتۋلين: 9 ايدا جۇكتى ايەل بوسانىپ ۇلگەرەدى، ال سەندەر ءبىر بۇيرىق دايىنداي المايسىڭدار!

ءماجىلىس توراعاسى نۇرلان نىعماتۋلين مەملەكەتتىك بيۋدجەتتەن قاراجات بولىنەتىن باعدارلامالاردى ىسكە اسىرۋدا جايباسارلىققا سالىنعان شەنەۋنىكتەرگە شۇيلىكتى.

بۇگىن پارلامەنت ءماجىلىسىنىڭ جالپى وتىرىسىندا "2019-2021 جىلدارعا ارنالعان رەسپۋبليكالىق بيۋدجەت تۋرالى" قر زاڭىنا وزگەرىستەر ەنگىزۋ تۋرالى" زاڭ جوباسىن تالقىلاۋ كەزىندە "جاس مامان" جوباسىنىڭ ورىندالۋى بارىسىنا نازار اۋداردى.

نىعماتۋلين جىل باسىندا، ياعني جاستار جىلىنىڭ اشىلۋى راسىمىندە ەلباسى "جاس مامان" باعدارلاماسىن دايىنداۋ ءۇشىن ۇكىمەتكە ءتيىستى تاپسىرمالار بەرگەنىن ەسكە سالدى. الايدا وسى باعىتتاعى قاجەتتى شارالار ىسكە اسىرىلماعان. وسى ورايدا، ءماجىلىس توراعاسى قۇجاتتى دايىنداۋ مەن كەلىسۋدىڭ ۇزاق راسىمدەرىن سىنعا الدى.

"تاپسىرمانى ورىنداماۋدىڭ سەبەبىنىڭ ءوزى نارازىلىق تۋدىرادى، ياعني بۇل جاعداي باعدارلامانى جۇزەگە اسىرۋ ءتارتىبىن دايىنداۋ مەن كەلىسۋ كەزىندەگى جاي عانا قاعازباستىلىقپەن ءتۇسىندىرىلىپ وتىر. ءبىر قۇجاتتى كەلىسۋ شارالارىنا 9 اي مەرزىم جۇمسالعان. 9 ايدا جۇكتى ايەل دۇنيەگە بالا اكەلىپ ۇلگەرەدى. ال سەندەر ءبىر بۇيرىقتى دايىنداي المايسىڭدار! مەنىڭ ويىمشا، بۇل جايت جاستاردىڭ مۇددەسىن قامتيتىن ماڭىزدى باعدارلامانى جۇزەگە اسىرۋ كەزىنە بيۋروكراتيالىق اۋرە-سارساڭنىڭ جارقىن ۇلگىسىن كورسەتىپ وتىر. "جاستار جىلى" بولسا اياقتالۋعا تاياپ قالعاندا، سەندەر ەندى عانا ويانىپ جاتسىڭدار", - دەدى نىعماتۋلين.

سوڭعى جاڭالىقتار