9 قازان, 12:45 185 0 ايماق انار لەپەسوۆا

الماتى پوليتسەيلەرى 20-قاباتتان سەكىرمەك بولعان جاس انانى قۇتقاردى

الماتى پوليتسەيلەرى تۇرعىن ءۇيدىڭ 20-شى قاباتىنان سەكىرمەك بولعان جاس انانى قۇتقاردى، دەپ حابارلايدى قازاقپارات.

الماتى پوليتسياسىنىڭ «102» پۋلتىنە «مانحەتتەن» تۇرعىن ءۇي كەشەنىنىڭ تۇرعىندارىنان 20-قاباتتاعى ۇيلەردىڭ ءبىرىنىڭ دالىزىندەگى بالكوننان اياعىن سىرتقا سالبىراتا وتىرعان ايەل تۋرالى حابارلاما تۇسكەن. كورسەتىلگەن مەكەنجايعا دەرەۋ بۋران-080 پاترۋلدىك توبى اتتانعان. وقيعا ورنىنا جەتكەن پوليتسيا اعا لەيتەنانتى سايات بەكجانوۆ پەن پوليتسيا پودپولكوۆنيگى نۇرسۇلتان بەكتۇرسىن بۇل اقپاراتتى راستاپ، عيماراتتىڭ 20-قاباتىنا كوتەرىلگەن.

«بىردەن شارا قولدانۋعا كوشتىك. وعان اقىرىن جاقىندادىق: ايەل بالكوننىڭ شەتىندە وتىر ەكەن. جانىندا بالا ارباسى تۇردى، ىشىندە كىشكەنتاي ءسابي جاتتى. كورشى ءۇيدىڭ تۇرعىندارى ايەلدىڭ نازارىن وزدەرىنە اۋدارىپ، مۇنداي شەشىمنەن باس تارتۋىن ءوتىنىپ جاتتى. جاعدايدى باعالاي وتىرىپ، جۇگىرە جانىنا جەتتىك تە، بالكوننان ىشكە ءتۇسىرىپ الدىق. جاعدايدى سۇراعانىمىزدا ايەل ەشتەڭە ايتا الماي، جىلادى. مەن ونى قۇشاقتاپ، جۇباتۋعا تىرىسقانىمدا، ول قاتتى جىلاي باستادى. ونىڭ پروبلەماسى بولعانى انىق. ەڭ باستىسى، جاس انا مەن ونىڭ التى ايلىق بالاسى قۇتقارىلدى»، - دەدى الماتى قالالىق جول-پاترۋلدىك قىزمەتىنىڭ پوليتسەيى سايات بەكجانوۆ.

بەلگىلى بولعانداي، ايەلدىڭ جاسى – 26-دا، التى ايلىق بالاسى بار، تۇرمىسقا شىققان. كۇيەۋى باسقا قالادا جۇمىس ىستەيدى. قازىر پوليتسيا جاس انانىڭ مۇنداي ارەكەتكە بارۋىنا نە سەبەپ بولعانىن انىقتاپ جاتىر. سونداي-اق، ونىمەن پسيحولوگ جۇمىس ىستەۋدە.

 

سوڭعى جاڭالىقتار