9 قازان, 10:16 232 0 جاھان انار لەپەسوۆا

انالارى اۋعانستان تۇرمەسىندە وتىرعان قازاقستاندىق 14 بالا ەلگە قايتارىلادى

يراكتا قالىپ قويعان قازاقستاندىق 14 بالا ەلگە قايتارىلادى. بۇل تۋرالى ەلوردادا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) اۋعانستان بويىنشا جيىندا سىرتقى ىستەر ءمينيسترى مۇحتار تىلەۋبەردى مالىمدەدى. 

«2019 جىلدىڭ باسىندا قازاقستان ارنايى «جۋسان» وپەراتسياسىن جۇرگىزگەن بولاتىن. «جۋسان» وپەراتسياسى – قازاقستان وسى ادامداردىڭ (كەزىندە سيرياعا كەتىپ قالعان ازاماتتاردىڭ – اۆت.) ءۇيى ەكەنىن كورسەتتى. وپەراتسيانىڭ ارقاسىندا ەلگە 600-گە تارتا ادام قايتارىلدى. ولاردىڭ 406-ى بالا. ولاردىڭ ءبارى دە وڭالتۋ شارالارىنان ءوتىپ، قازاقستاندىق قوعامعا بەيىمدەلدى. قازىرگى ۋاقىتتا يراكتان 14 بالانى قايتارۋ باعىتىندا جۇمىس جۇرگىزىپ جاتىرمىز. ولاردىڭ انالارى سول جاقتا ءومىر بويى باس بوستاندىعىنان ايىرىلعان»، – دەدى قر سىرتقى ىستەر ءمينيسترى مۇحتار تىلەۋبەردى وتىرىس بارىسىندا.

ءمينيستردىڭ ايتۋىنا قاراعاندا، قازاقستان مۇنداي گۋمانيتارلىق اكتسيالاردى جۇرگىزىپ جاتقان الەمدەگى ساناۋلى مەملەكەتتەردىڭ ءبىرى. «ءبىز ءوز تاجىريبەمىزبەن بولىسۋگە دايىنبىز»، – دەدى ول.

«جۋسان» گۋمانيتارلىق وپەراتسياسى - اۋقىمدى اكتسيا. بۇل باستامانى تۇڭعىش پرەزيدەنت – ەلباسى نۇرسۇلتان نازارباەۆ ۇسىندى. 2018 جىلدان بەرى جۇزەگە اسىرىلىپ كەلەدى. سيريادان قازاقستاندىقتاردىڭ العاشقى لەگى بيىلعى 6 قاڭتاردا ەلگە جەتكىزىلگەن بولاتىن. 7-9 مامىر كۇندەرى اتالمىش ەلدەن قازاقستاننىڭ تاعى 231 ازاماتى ورالدى. كەشەندى شارالار ناتيجەسىندە قاقتىعىس ايماعىنان ەلىمىزگە جالپى 357 بالا قايتارىلدى. 28-31 مامىردا «جۋسان» ارنايى گۋمانيتارلىق اكتسياسىنىڭ سوڭعى كەزەڭى وتكىزىلگەن ەدى.

سوڭعى جاڭالىقتار