8 قازان, 15:52 185 0 ىشكى ساياسات انار لەپەسوۆا

مينيستر اقمولا وبلىسىنىڭ پوليتسيا باسشىسىن قىزمەتىنەن بوساتتى

قازاقستان ىشكى ىستەر ءمينيسترى ەرلان تۇرعىمباەۆ اقمولا وبلىسى بويىنشا پوليتسيا دەپارتامەنتىنىڭ باسشىسىن قىزمەتىنەن شەتتەتتى، دەپ حابارلايدى ۆەدومستۆونىڭ ءباسپاسوز قىزمەتى.

ىشكى ىستەر مينيسترلىگى بۇل جاعدايدىڭ تەرگەۋمەن بايلانىستى ەكەنىن مالىمدەدى.

"دەپارتامەنت باسشىسىنىڭ ورىنباسارى اسان ءسادۋوۆ پەن قارجىلىق قامتاماسىز ەتۋ باسقارماسىنىڭ باستىعى ساۋلە جۇمالينا سىبايلاس جەمقورلىق جاسادى دەگەن كۇدىككە ءىلىنىپ، سوتقا دەيىنگى تەرگەۋ جۇمىستارىنىڭ جۇرگىزىلۋىنە بايلانىستى پوليتسيا دەپارتامەنتىنىڭ باسشىسى، گەنەرال-مايور بەرىك ءبىلالوۆ اتقارىپ وتىرعان لاۋازىمىنان بوساتۋ تۋرالى راپورت بەردى", - دەلىنگەن حابارلامادا.

ءمينيستردىڭ بۇيرىعىمەن اقمولا وبلىسى بويىنشا پوليتسيا دەپارتامەنتى باسشىسى مىندەتىن اتقارۋشى بولىپ كريمينالدى پوليتسيا دەپارتامەنتىن باسقاراتىن پوليتسيا گەنەرال-مايورى ارمانبەك بايمۋرزين تاعايىندالدى.

وڭىردە جوعارى شەندى پوليتسيا باسشىلارىنىڭ ۇستالعانى جونىندە اقپارات وسى جىلدىڭ 4 قازانىندا تاراعان. ولار سەنىپ تاپسىرىلعان مۇلىكتى يەمدەندى نەمەسە تالان-تاراجعا سالدى دەگەن كۇدىككە ىلىنگەن. كەيىن ەكى پوليتسيا پولكوۆنيگى قاماۋعا الىندى. ۆەدومستۆو وكىلدەرى اقمولا وبلىسى بويىنشا پوليتسيا دەپارتامەنتىنىڭ ورىنباسارى ىشكى ىستەر ورگاندارىنان شىعارىلعانىن اتاپ ءوتتى. بۇگىندە ءتارتىپ ساقشىلارى وقيعانىڭ ءمان-جايىن انىقتاپ جاتىر.

 

سوڭعى جاڭالىقتار