8 قازان, 14:26 197 0 قاۋىپسىزدىك انار لەپەسوۆا

الماتى وبلىسىندا تاۋ باسىنداعى 17 كول قاۋىپتى

الماتى وبلىسىندا تاۋ باسىنداعى 36 كولدىڭ 17-ءسى قاۋىپ تۋدىرادى. تاۋداعى كولدەردىڭ سۋىن ازايتىپ جاتقان «قازسەلدەنقورعاۋ» مەكەمەسىنىڭ وكىلدەرى وسىلاي دەپ مالىمدەدى. بۇگىندە ەڭ قاۋىپتى دەگەن №13-ءشى كولدىڭ بەتى قاتىپ قالعان. ودان بولەك، تاسۋ قاتەرى بار 17 سۋ قويماسىندا دا اپپاراتتار ورناتىلىپ، سۋ دەڭگەيى ازايتىلىپ جاتىر، دەپ حابارلايدى "الماتى" ارناسى.

الاتاۋدىڭ توبەسىندە ورنالاسقان 36 مورەنالىق كولدى «قازسەلدەنقورعاۋ» مەكەمەسىنىڭ وكىلدەرى وسىلاي تىكۇشاقپەن تۇراقتى ارالاپ تۇرادى. قىسى-جازى قار باسىپ جاتاتىن شىڭداردىڭ باسىنا ءجيى كوتەرىلىپ، باقىلاپ وتىرۋ ولاردىڭ كۇندەلىكتى جۇمىسى. بۇگىنگى باقىلاۋدا مامانداردىڭ كولدەردىڭ قىس الدىنداعى جاعدايىمەن تانىستى.

«تاۋلى جەردە جاتقان كولدەردى كوزبەن شولۋ جۇمىستارىن جۇرگىزىپ وتتىك. كولدەر قازىر قىسقى ماۋسىمعا اۋىسىپ جاتىر. دەڭگەيلەرى تومەن. ەشقانداي قاۋىپ جوق», - دەدى «قازسەلدەنقورعاۋ» مم ءبولىم باسشىسى ەرجان قوسباقوۆ.

قالىڭ قاردىڭ ەتەگىندە جاتقان №13-مورەنالىق كولدىڭ سۋى تاسىسا، ۇلكەن الماتى كانالى ارناسىنا سۋ سيماي قالادى دەيدى. قازىرگى تاڭدا كول بەتىنە سۋ تارتقىش اپپارات ورناتىلىپ، كولەمى ازايتىلىپ جاتىر.

الاتاۋ بوكتەرىندە ورنالاسقان كولدەردىڭ ىشىندە الماتى تۇرعىندارى مەن «قازسەلدەنقورعاۋ» مەكەمەسىنىڭ ماماندارىن ءجيى ابىگەرگە سالاتىن وسى №13 كول. تەڭىز دەڭگەيىنەن 3500 مەتر بيىكتىكتە ورنالاسقان. جالپى مامانداردىڭ ايتۋىنشا، ازىرگە بۇل كولدەن كەلەر قاۋىپ جوق ەكەن.

تاۋ باسىنداعى 36 كولدىڭ 17-ءسى قاۋىپ تۋدىرادى ەكەن. بۇگىنگى شولۋ بارىسىندا ولاردىڭ ءبىرازىنىڭ تارتىلىپ، بەتىنە مۇز قاتقانىن بايقادى ماماندار. دەمەك، سەل قاۋپى تۇگەلىمەن سەيىلدى.

سوڭعى جاڭالىقتار