8 قازان, 10:47 235 0 قوعام دينارا مىڭجاسارقىزى

جانسەيىت تۇيمەباەۆ: ەكى ەل قارىم-قاتىناسى جاڭا ساتىعا كوتەرىلەدى

بۇگىن نۇر-سۇلتان قالاسىنداعى دوستىق ۇيىندە قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ج.تۇيمەباەۆ بولگاريا ۆيتسە-پرەزيدەنتى ي.يوتوۆامەن كەزدەستى.

قوس تاراپتىڭ كەزدەسۋىنە ەتنومادەني ورتالىقتاردىڭ وكىلدەرى دە قاتىستى. بولگاريا رەسپۋبليكاسىنىڭ دەلەگاتسياسىن باستاپ كەلگەن يليانا يوتوۆا رەسمي باسقوسۋ الدىندا دوستىق ءۇيىن ارالاپ، قازاقتىڭ ۇلتتىق ءداستۇرىنىڭ كونە جادىگەرلەرىن تاماشالادى جانە ءبىر شاڭىراق استىندا ءتۇتىن تۇتەتكەن ەتنوستاردىڭ ءتول مادەنيەتى پەن تۋعان تىلدەرىن ساقتاۋعا، دامىتۋعا بەرىلگەن مۇمكىندىكتىڭ كەڭدىگىنە تاڭ قالدى.

قازاقستان حالقى اسسامبلەياسى توراعاسىنىڭ ورىنباسارى ج.تۇيمەباەۆ ءوز سوزىندە قازاقستاندا 4 523 بولگار تۇراتىنىن، ولاردىڭ العاشقى قونىس اۋدارۋى ۋكراينا مەن بەسسارابيادان 20 عاسىر باسىنداعى ستولىپين رەفورماسىنان كەيىن باستالعانىن اتاپ ءوتتى. سونداي-اق نۇر-سۇلتان، پاۆلودار، اتىراۋ، اقتوبە جانە قاراعاندى وبلىستارىندا بولگار ءتىلىن، مادەنيەتى مەن ۇلتتىق داستۇرلەرىن ساقتاۋ ماقساتىندا بولگار مادەني ورتالىقتارى اشىلعانىن جەتكىزدى.

قازاقستان مەن بولگاريا مۇددەلەس جانە وداقتاس مەملەكەتتەر ەكەنىن ايتا كەلە،  قازاقستان پرەزيدەنتى قاسىم-جومارت توقاەۆتىڭ بولگارياداعى قازاقستان ديپلوماتيالىق ميسسياسىن ەلشىلىك رەتىندە قايتا قۇرۋ تۋرالى شەشىمى ەكى ەل قارىم-قاتىناسىن جاڭا ساتىعا كوتەرەتىنىنە توقتالدى. سونىڭ ىشىندە ءبىلىم، سپورت، مادەنيەت سالاسىنىڭ قارقىندى داميتىنىنا سەنىم ءبىلدىردى.

ەستەرىڭىزگە سالا كەتسەك، قازاقستان مەن بولگاريا ديپلوماتيالىق قاتىناستاردى ورناتۋ تۋرالى حاتتاماعا 1992 جىلعى قول قويىپ، 1994 جىلى بولگاريا ەلشىلىگى اشىلدى. 1993 جىلى العاش رەت بولگاريا پرەزيدەنتى ج.جەلەۆ – قازاقستانعا، 1999 جىلعى قىركۇيەكتە تۇڭعىش پرەزيدەنت ن.نازارباەۆ سوفياعا ءىس-ساپارمەن باردى.

قازىرگى تاڭدا بولگار تاراپىنىڭ قاتىسۋىمەن ەلىمىزدە 80-گە جۋىق كومپانيا تىركەلگەن. بولگاريادا 35-كە جۋىق قازاقستاندىق كومپانيا جۇمىس ىستەيدى. قحا قۇرامىندا 4 بولگار ەتنومادەني بىرلەستىگى بار. بارلىق ورتالىقتار قازاقستان حالقى اسسامبلەياسى وتكىزەتىن مادەني ءىس-شارالارعا تۇراقتى قاتىسادى.

بولگاريا ۆيتسە-پرەزيدەنتى ي.يوتوۆا ءوز كەزەگىندە قازاقستاندا بولگارلاردىڭ ءتىلىن، ءداستۇرىن ساقتاۋىنا بارلىق قولايلى جاعداي جاسالعاندىعىنا ريزاشىلىعىن ءبىلدىرىپ، قازاقستاندىق بولگار جاستارىن تاريحي وتاندارىندا تەگىن ءبىلىم الۋعا شاقىردى.

سونداي-اق، «دوسسىز ءومىر – تۇسسىز اس» دەگەن قازاقتىڭ كونە ماقالىن ەسىنە العان يليانا يوتوۆا الەمنىڭ كەيبىر ەلدەرىندە ساياسي جاعداي ۋشىعىپ تۇرعان بۇگىنگى كەزەڭدە جاستاردى تولەرانتتىلىق پەن بەيبىتسۇيگىشتىلىك قاسيەتتە تاربيەلەۋ ماڭىزدى دەدى.

كەزدەسۋ سوڭىندا جانسەيىت قانسەيىتۇلى بولگار دەلەگاتسياسىنىڭ باسشىسىنا ەلدەگى بىرلىكتىڭ سيمۆولى شاڭىراق ءمۇسىنىن سىيعا تارتتى. بولگارلىقتار دا قۇرقول كەلمەپتى، ولار دوستىقتىڭ ۇيىتقىسى بولعان اسسامبلەياعا بولگار ەجەلگى ءالىپبيىنىڭ قۇيماسىن تارتۋ ەتتى.

سوڭعى جاڭالىقتار