7 قازان, 21:01 411 0 ساياسات انار لەپەسوۆا

قاسىم-جومارت توقاەۆ بولگاريانىڭ ۆيتسە-پرەزيدەنتىن قابىلدادى

پرەزيدەنت قاسىم-جومارت توقاەۆ بولگاريانىڭ ۆيتسە-پرەزيدەنتى يليانا يوتوۆانى قابىلدادى، دەپ حابارلايدى اقوردا.

كەزدەسۋ بارىسىندا تاراپتار ەكى جاقتى ىنتىماقتاستىقتىڭ قازىرگى جاي-كۇيى مەن پەرسپەكتيۆالارىن، ونىڭ ىشىندە بولگاريا پرەزيدەنتى رۋمەن رادەۆتىڭ نۇر-سۇلتانعا كەلەر جىلعى ساپارىن تالقىلادى.قاسىم-جومارت توقاەۆ قازاقستان مەن بولگاريا اراسىنداعى جان-جاقتى قارىم-قاتىناستى ودان ءارى كەڭەيتە بەرۋگە نيەتتى ەكەنىن ءبىلدىردى.

پرەزيدەنتتىڭ ايتۋىنشا، قازاقستان بولگارياعا ساۋدا-ەكونوميكالىق ارىپتەستىك تۇرعىسىنان دا، ەۋروپا وداعىمەن ءوزارا ءىس-قيمىل باعىتى بويىنشا دا قىزىعۋشىلىق تانىتادى. ەكى ەل اراسىنداعى قارىم-قاتىناستاردىڭ دامۋىنا حالقىمىزدىڭ اجىراماس بولىگىنە اينالعان بولگار دياسپوراسىنىڭ قوساتىن ۇلەسى زور.

– قازاقستان جەرىندە بولگار حالقىنىڭ بەسىنشى بۋىنى ءومىر ءسۇرىپ جاتىر. ءبىز بولگار حالقىنا ۇلكەن قۇرمەتپەن قارايمىز، بولگاريامەن اراداعى ىنتىماقتاستىعىمىزدى جوعارى باعالايمىز، ەكى ەل اراسىنداعى قارىم-قاتىناس تابىستى دامۋدا،– دەدى مەملەكەت باسشىسى.

قازاقستان كوشباسشىسى قازىرگى ۋاقىتتا بولگاريامەن ءوزارا ءىس-قيمىلداردى جاڭا ساپالى دەڭگەيگە كوتەرۋگە قولايلى جاعداي قالىپتاسقانىن اتاپ ءوتتى. ءوز سوزىندە قاسىم-جومارت توقاەۆ ەكىجاقتى قارىم-قاتىناسىنا تىڭ سەرپىن بەرەتىن پەرسپەكتيۆالى باعىتتاردى ازىرلەۋ ءۇشىن ۇكىمەتارالىق كوميسسيانىڭ جۇمىسىن جانداندىرۋ ماڭىزدى ەكەنىن ايتتى.

ءوز كەزەگىندە بولگاريانىڭ ۆيتسە-پرەزيدەنتى مەملەكەتتەر اراسىنداعى، ونىڭ ىشىندە ەۋروپالىق وداق بويىنشا دا ىنتىماقتاستىقتى ودان ءارى دامىتۋعا بەيىلدى ەكەنىن ءبىلدىردى. يليانا يوتوۆانىڭ سوزىنشە، بۇگىندە قازاقستان قاسىم-جومارت توقاەۆتىڭ 2019 جىلدىڭ قىركۇيەگىندەگى جولداۋىندا ايتىلعان اۋقىمدى رەفورمالاردى جۇزەگە اسىرۋ جاعىنان ۇلكەن جەتىستىكتەرگە قول جەتكىزدى.

ونىڭ ويىنشا، اتالعان باعدارلامانى ىسكە اسىرۋ حالىقتىڭ ءال-اۋقاتىن ارتتىرۋعا، ۇكىمەت پەن ازاماتتىق قوعام اراسىنداعى ديالوگتى قالىپتاستىرۋعا زور ىقپال ەتەدى. بولگارلىق ساياساتكەر مەملەكەت باسشىسىنىڭ ۇلتتىق قوعامدىق سەنىم كەڭەسىن قۇرۋ تۋرالى يدەياسىنا قىزىعۋشىلىق تانىتتى. سونىمەن قاتار يليانا يوتوۆا ەتنوسارالىق كەلىسىمنىڭ قازاقستاندىق مودەلىن جوعارى باعالاپ، بولگار دياسپوراسى قازاقستاننىڭ دامۋىنا ەلەۋلى ۇلەس قوسا بەرەتىنىنە سەنىم ءبىلدىردى. كەزدەسۋ سوڭىندا بولگاريانىڭ ۆيتسە-پرەزيدەنتى پاۆلودار وبلىسىنا بارىپ، وندا جەرگىلىكتى بولگار ەتنوسى وكىلدەرىمەن كەزدەسۋدى جوسپارلاپ وتىرعانىن ايتتى.

سوڭعى جاڭالىقتار