7 قازان, 10:47 469 0 ەكونوميكا انار لەپەسوۆا

«FlyArystan» رەيستەرىنىڭ سانى 3 ەسە ارتادى

2020 جىلى «FlyArystan» اۋە كومپانياسىنىڭ رەيستەر سانى 28-دەن 80-گە دەيىن ارتادى. بۇل تۋرالى بۇگىنگى ۇكىمەت وتىرىسىندا اسقار مامين ايتتى. 

«بۇگىنگى تاڭدا اۆياتسيا سالاسىندا جولاۋشىلار تاسىمالىنىڭ ارتىپ كەلە جاتقانى بايقالادى. سالا ءۇشىن كادر ساپاسىن جاقسارتۋ، اۋە كەمەلەرى مەن قىزمەت كورسەتۋ ساپاسىن ستاندارتتارعا سايكەس كەلتىرۋ بويىنشا جۇمىس ۇنەمى جۇرگىزىلۋدە. قازىرگى ۋاقىتتا «Air Astana»، «Qazaq Air» اۋە كومپانيالارى ۇشۋ باعىتتارىن قارقىندى دامىتىپ، باعالار ساياساتى بويىنشا ناقتى جۇمىس جۇرگىزىلىپ جاتىر. بيۋدجەتتىك «FlyArystan» اۋە كومپانياسىنىڭ تاريفتەرى ەۋروپانىڭ بيۋدجەتتى كومپانيالارىمەن سالىستىرعاندا ورتاشا ەسەپپەن 4 ەسەگە دەيىن تومەن. كەلەسى جىلى «FlyArystan» كومپانياسىنىڭ رەيستەر سانى 28-دەن 80-گە دەيىن ارتادى. ۇشۋ باعىتتارى ايتارلىقتاي كەڭەيتىلەدى»، - دەدى ا.مامين  ۇكىمەت وتىرىسىندا.

ونىڭ ايتۋىنشا، جالپى وتاندىق اۋە كومپانيالارىنىڭ ءبارى دە باعالار ساياساتى مەن قىزمەت كورسەتۋ ساپاسىن ارتتىرۋ بويىنشا جۇمىستى جالعاستىرادى.

«وسى رەتتە، سىزدەردىڭ نازارلارىڭىزدى بىرقاتار ماسەلەلەرگە اۋدارعىم كەلەدى. بىرىنشىدەن، «ۇلت جوسپارىنىڭ» 73-ءشى قادامىنا سايكەس، 9 الەمدىك قارجى ورتالىعىمەن تۇراقتى اۋە قاتىناسى ورناتىلدى. يندۋستريا جانە ينفراقۇرىلىمدىق دامۋ، ۇلتتىق ەكونوميكا، سىرتقى ىستەر مينيسترلىكتەرى «استانا» حقو-مەن بىرلەسىپ، 2020 جىلى شانحاي مەن سينگاپۋرعا رەيس اشۋ بويىنشا جۇمىستى جالعاستىرۋدى تاپسىرامىن»، - دەدى ول.

سونىمەن بىرگە، پرەمەر-مينيستر نيۋ-يورككە ۇشۋ ءۇشىن وتاندىق اۋە كومپانيالاردى اككرەديتتەۋ ءراسىمىن اياقتاۋدى تاپسىردى. «ەكىنشىدەن، يندۋستريا جانە ينفراقۇرىلىمدىق دامۋ مينيسترلىگى مۇددەلى مەملەكەتتىك ورگاندارمەن بىرلەسىپ، بيىلعى جىلدىڭ سوڭىنا دەيىن قوستاناي جانە بالقاش قالاسىنداعى ۇشىپ-قونۋ جولاعىن قايتا جوندەۋدى اياقتاۋدى تاپسىردى. قازىرگى تاڭدا شەتەلدىك ينۆەستورلاردىڭ قاتىسۋىمەن «تۇركىستان» حالىقارالىق اۋەجايىنىڭ قۇرىلىسى جۇرگىزىلۋدە. وسى نىساندى بەلگىلەنگەن مەرزىمدە – كەلەسى جىلى اياقتاۋ كەرەك»، - دەدى اسقار مامين.

 

سوڭعى جاڭالىقتار