4 قازان, 14:37 608 0 قاۋىپسىزدىك دينارا مىڭجاسارقىزى

دەسانتتىق-شابۋىلداۋ اسكەرلەرىندە اشىق ەسىك كۇنى ءوتتى

دەسانتتىق-شابۋىلداۋ اسكەرلەرىندە مەكتەپ وقۋشىلارى ءۇشىن «اشىق ەسىكتەر» كۇنى وتكىزىلدى.

الماتى قالاسىنداعى دەسانتتىق-شابۋىلداۋ اسكەرلەرىنىڭ «61993» اسكەري ءبولىمى قالانىڭ 32 مەكتەبىنىڭ وقۋشىلارىنا جانە كوللەدج ستۋدەنتتەرىنە پاتريوتتىق تاربيە بەرۋ ماقساتىندا «اشىق ەسىكتەر كۇنىن» وتكىزدى. سانى

200-گە تارتا وقۋشىلار مەن ستۋدەنتەر اسكەري ءومىردىڭ تىنىس-تىرشىلىگىمەن تانىسىپ قايتتى.

الماتى قالاسى اۋەزوۆ اۋدانى قورعانىس ىستەرى جونىندەگى باسقارماسىنىڭ باستىعى پودپولكوۆنيك دەنيس ناسىروۆتىڭ ۇيىمداستىرۋىمەن وسى اۋدانعا قاراستى 32 مەكتەپتەن جينالعان وقۋشىلار جانە پوليتەحنيكالىق كوللەدجدىڭ ستۋدەنتتەرى اسكەري ءبولىمنىڭ قۇرىلۋ تاريحىمەن، سپورتتىق بازاسىمەن، قارۋ-جاراعىمەن، اسكەري تەحنيكالارىمەن تانىسىپ، ولاردى تاجىريبە جۇزىندە قولدانىپ كورۋگە مۇمكىندىك الدى. ونىڭ ىشىندە، دەسانتتىق-شابۋىلداۋ اسكەرلەرىنىڭ جاۋىنگەرلىك دايىندىعىنىڭ نەگىزى بولىپ سانالاتىن پاراشيۋتپەن سەكىرۋ جونىندەگى اقپاراتتار، ولاردى جيناۋ تارتىپتەرى بويىنشا كورسەتىلگەن تاجىربيەلىك جۇمىستار وقۋشىلاردىڭ ەرەكشە نازارىن اۋدارتتى.

 -قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆتىڭ بيىلعى قازاقستان حالقىنا جولداۋىندا اسكەري قىزمەتتىڭ بەدەلىن ارتتىرىپ، ونىڭ قاتارىن تولىقتىراتىن اسكەري قىزمەتشىلەردىڭ بىلىكتىلىگىنە ەرەكشە نازار اۋدارۋ جايى اتاپ وتىلگەن بولاتىن. وتكىزىلىپ وتىرعان ءىس-شارانىڭ نەگىزگى ماقساتى مەن مىندەتى دە مەكتەپ قابىرعاسىنان بالانى پاتريوتتىققا باۋلۋ، وتان الدىنداعى اسكەري بورىشتارىن ابىرويمەن وتەۋ، ەلىمىزدىڭ قورعانىس قابىلەتىن نىعايتۋ جولىنداعى بىلىمدەرى مەن كاسىبي بىلىكتىلىكتەرىن ارتتىرۋ بولىپ تابىلادى. سوندىقتان ءبىز وسى تەكتەس ءىس-شارالار ارقىلى جاستاردىڭ بويىنا وتانسۇيگىشتىك سەزىمىن ۇيالاتۋعا ىقپال ەتكىمىز كەلەدى،- دەيدى الماتى قالاسى اۋەزوۆ اۋدانى قورعانىس ىستەرى جونىندەگى باسقارماسىنىڭ باستىعى پودپولكوۆنيك دەنيس ناسىروۆ.

ال، № 42 مەكتەپتىڭ 9-سىنىپ وقۋشىسى اليمكۋلوۆ دانياردىڭ بالا كەزدەگى ارمانى – اسكەري ادام بولۋ ەكەن. ونىڭ ايتۋىنشا، ءاربىر ازامات وتان الدىنداعى اسكەري بورىشىن وتەپ، قاجەت بولسا، سول ساپتا ابىرويلى قىزمەت اتقارۋ كەرەك دەپ ەسەپتەيدى.

«بۇگىن ءبىز اسكەريلەردىڭ، ونىڭ ىشىندە دەسانتشىلاردىڭ ومىرىنە ساياحات جاسادىق. اسكەري تەحنيكالاردىڭ تۇرلەرىمەن، ولاردىڭ ۇرىستاعى مىندەتتەرىمەن تانىسىپ، قارۋدى قولىمىزعا ۇستاپ كوردىك. مەنىڭ بولاشاقتاعى ارمانىم – جوعارى اسكەري وقۋ ورنىنا ءتۇسىپ، وفيتسەرلەر ساپىندا وتانىما قىزمەت ەتۋ»،- دەپ دانيار بولاشاق ارمانىمەن  بولىستى.ءبىز بولاشاق وتان قورعاۋشىلارعا اق جول تىلەدىك.

پولاتبەك گ.،

لەيتەنانت،

دەسانتتىق-شابۋىلداۋ

اسكەرلەرىنىڭ ءباسپاسوز حاتشىسى

سوڭعى جاڭالىقتار