4 قازان, 13:47 381 0 ەكونوميكا انار لەپەسوۆا

سالىق تولەۋگە قاتىستى ەڭ ءجيى قويىلاتىن 20 سۇراققا جاۋاپ بەرىلدى

سالىق تولەۋشىلەر كوبىنەسە مۇلىك، جەر جانە كولىك سالىقتارىن تولەۋگە قاتىستى سۇراقتارعا جاۋاپ ىزدەيدى. مەملەكەتتىك كىرىستەر كوميتەتىنىڭ ءباسپاسوز قىزمەتى ەڭ ءجيى قويىلاتىن توپ-20 سۇراققا جاۋاپ بەردى.

جەكە تۇلعالاردىڭ مۇلىك سالىعى، جەر سالىعى جانە كولىك قۇرالدارىنا سالىعىنىڭ تولەۋ مەرزىمدەرى قانداي؟

جەكە تۇلعالار بيۋدجەتكە:

جەر سالىعى مەن مۇلىك سالىعىن ەسەپتى جىلدان كەيىنگى جىلدىڭ 1 قازانىنان كەشىكتىرمەي;

كولىك سالىعىن ەسەپتى جىلدىڭ 31 جەلتوقسانىنان كەشىكتىرمەي تولەيدى.

سالىقتى ۋاقىتىلى تولەمەگەنى ءۇشىن ايىپپۇل سانكتسيالارى بولا ما؟

قولدانىستاعى قازاقستان رەسپۋبليكاسىنىڭ سالىق كودەكسىندە سالىق مىندەتتەمەسىن ورىنداۋدىڭ مەرزىمى وتكەن ءاربىر كۇن ءۇشىن بەرەسى سوماسىنا ءوسىمپۇل سوماسىن ەسەپتەۋدى قوسپاعاندا، ايىپپۇل سانكتسيالارى بەلگىلەنبەگەن.

كولىك سالىعىن قالاي تولەۋ كەرەك؟

جەكە تۇلعالار سالىق تولەۋدى تۇرعىلىقتى (تىركەلگەن) جەرى بويىنشا  جۇرگىزەدى.

ەگەر سالىق تولەۋشى تۇرعىلىقتى تىركەلگەن جەرىن اۋىستىرىپ، شىعىس قازاقستان وبلىسىنا كوشسە، ال كولىك بۇرىنعىسىنشا الماتى وبلىسىندا تىركەلگەن بولسا، وندا جەكە تۇلعالار كولىك قۇرالدارىنا سالىناتىن سالىقتى قايدا تولەيدى؟

سالىقتى تۇرعىلىقتى جەرى بويىنشا بيۋدجەتكە تولەۋى قاجەت، دەرەكتەمەلەرىن تۇرعىلىقتى جەرى بويىنشا مەملەكەتتىك كىرىستەر باسقارماسىنا نە 1414 تەلەفونى ارقىلى بايلانىس ورتالىعىنا حابارلاسىپ الۋعا بولادى.

اۆتوكولىك جول-كولىك اپاتىنان كەيىن بۇزىلىپ، پايدالانىلماي تۇر، وسى كولىك قۇرالى ءۇشىن سالىقتى تولەۋ كەرەك پە؟

ءيا، اۆتوموبيل يەسى ازىرگە بار جانە جول پوليتسياسى باسقارماسىنىڭ ورگاندارىندا كولىك تىركەۋ ەسەبىندە تۇرعان بولسا تولەۋى كەرەك. وسىنداي كولىك قۇرالى بويىنشا سالىق مىندەتتەمەسىن ورىنداۋدى توقتاتۋ ءۇشىن ونى تىركەۋ ەسەبىنەن شىعارۋ قاجەت.

كولىك قۇرالدارىنا سالىق تولەۋ كەزىندە ءوز اتىما قاتە تولەپ قويدىم، ال اۆتوكولىك جۇبايىمنىڭ اتىنا تىركەلگەن. ەندى بۇل تولەمدى ايەلىمنىڭ اتىنا قالاي ەسەپتەسەم ەكەن؟

سالىق كودەكسىنىڭ 101-بابى 5-تارماعىنا سايكەس سالىقتىڭ، بيۋدجەتكە تولەنەتىن تولەمنىڭ، ءوسىمپۇلدىڭ ارتىق تولەنگەن ء(وندىرىپ الىنعان) سوماسى باسقا سالىق تولەۋشىنىڭ سالىقتىق بەرەشەگىن وتەۋ ەسەبىنە ەسەپتەۋگە جاتپايدى. بۇل ادام سوماسىن قايتارۋ تۋرالى سالىقتىق ءوتىنىش بەرە الادى.

ەگەر مەن اۆتوكولىكتى سەنىمحات بويىنشا ساتىپ جىبەرسەم، سالىقتار كىمگە ەسەپتەلەدى: ماعان با الدە اۆتوكولىكتىڭ ناقتى پايدالانۋشىسىنا ما؟

ءسىزدىڭ مەنشىك قۇقىعىڭىز ەكى جاقتى مامىلە جاسالعان جانە ۋاكىلەتتى ورگاندا تىركەلگەن نەگىزىندە عانا توقتاتىلادى، ءاۆتوموبيلدى باسقا تاسىلدەرمەن ساتۋ (سەنىمحات بويىنشا نە ساقتاندىرۋ بويىنشا) مەنشىك قۇقىعىن توقتاتپايدى.

تيىسىنشە، سالىقتار رەسمي تۇردە ۋاكىلەتتى ورگاندا تىركەلگەن اۆتوكولىكتىڭ مەنشىك يەسىنە ەسەپتەلەدى. بۇل رەتتە سەنىمحات بويىنشا كولىك قۇرالىن بەرۋ ازاماتتىق كودەكسىنىڭ نورمالارىنا سايكەس مۇلىكتى يەلىكتەن ايىرۋ مەن مەنشىك قۇقىعىن بەرۋ بولىپ تابىلمايدى، تەك مەنشىك يەسىنىڭ اتىنان ونى باسقارۋعا نەمەسە مۇددەلەرىن بىلدىرۋگە عانا قۇقىق بەرەدى.

ەگەر اۆتوموبيل اعىمداعى جىلعى تامىز ايىندا ساتىپ الىنعان بولسا، جەكە تۇلعادان كولىك قۇرالى سالىعىن تولەۋ قانداي مولشەردە جۇرگىزىلەدى؟

كولىك قۇرالى سالىعىنىڭ سوماسى مەنشىك قۇقىعى الىنعان ايدىڭ 1-كۇنiنەن باستاپ سالىق كەزەڭiنiڭ سوڭىنا دەيiنگى كەزەڭ ءۇشىن ەسەپتەلەدى. تيىسىنشە، ءسىزدىڭ جاعدايىڭىزدا كولىك سالىعىن بەس اي ءۇشىن: اعىمداعى جىلعى تامىزدان جەلتوقسانعا دەيىن تولەۋ قاجەت.

كولىك قۇرالدارىنىڭ تىركەمەلەرى كولىك سالىعىن سالۋ وبەكتىسى بولىپ تابىلادى ما؟

كولىك قۇرالدارىنىڭ تىركەمەلەرى كولىك قۇرالى سالىعىن سالۋ وبەكتىسى بولىپ تابىلمايدى.

جەكە تۇلعا قالاي جانە قاي جەردە ءوز بەتىنشە كولىك سالىعىن ەسەپتەۋ الادى؟

كولىك قۇرالى سالىعىن ەسەپتەۋدى سالىق تولەۋشىلەر ءوز بەتىنشە مىناداي سەرۆيستەرگە ءوتىپ: «ەلەكتروندىق سەرۆيستەر» - «كالكۋلياتور» - «كولىك سالىعىن ەسەپتەۋ» دەگەن پاراقشالاردان نەمەسە http://kgd.gov.kz/ru/calc/transports دەگەن تىكەلەي سىلتەمە بويىنشا ءوتىپ، http://www.kgd.gov.kz پورتالىن پايدالانۋمەن جۇرگىزۋى مۇمكىن. اۆتوماتتى ەسەپتەۋدى جۇرگىزۋ ءۇشىن ءتيىستى اشىق جولداردى تولتىرىڭىزدار.

جەر سالىعىن جانە مۇلىك سالىعىن ايقىنداۋ ءۇشىن سالىق بازاسى قانداي؟

جەر سالىعىن ايقىنداۋ ءۇشiن جەر ۋچاسكەسiنiڭ جانە (نەمەسە) جەر ۇلەسىنىڭ الاڭى، ال مۇلىك سالىعى بويىنشا – مۇلىكتى باعالاۋ قۇنى سالىقتىق بازا بولىپ تابىلادى.

جەر ۋچاسكەسىنە ارنالعان سايكەستەندىرۋ قۇجاتتارى بولماعان جاعدايدا پايدالانۋشىنى جەر سالىعىن تولەۋشى رەتىندە تانۋ ءۇشىن نەگىز بولىپ تابىلاتىن نە؟

جەر ۋچاسكەسىنە ارنالعان سايكەستەندىرۋ قۇجاتتارى بولماعان جاعدايدا پايدالانۋشىنى جەر ۋچاسكەسىنە قاتىستى جەر سالىعىن تولەۋشى رەتىندە تانۋ ءۇشىن:

1) جەر ۋچاسكەسى مەملەكەتتىك مەنشىكتەن بەرىلگەن كەزدە – مەملەكەتتىك ورگانداردىڭ جەر ۋچاسكەسىن بەرۋ تۋرالى اكتىلەرى;

2) قالعان جاعدايلاردا – ازاماتتىق-قۇقىقتىق مامىلەلەر نەگىزىندە نەمەسە قازاقستان رەسپۋبليكاسىنىڭ زاڭناماسىندا كوزدەلگەن وزگە دە نەگىزدەردە وسىنداي ۋچاسكەنى ءىس جۇزىندە يەلەنۋ جانە پايدالانۋ نەگىز بولىپ تابىلادى (سك 499-ب.3-ت.).

جەكە تۇلعادان مۇلىك سالىعىن ەسەپتەۋدىڭ سالىق بازاسى؟

«ازاماتتارعا ارنالعان ۇكىمەت» مەملەكەتتىك كورپوراتسياسى ەسەپتى جىلدان كەيىنگى ءاربىر جىلدىڭ 1 قاڭتارىنداعى جاعداي بويىنشا ايقىندايتىن سالىق سالۋ وبەكتىلەرىنىڭ قۇنى جەكە تۇلعالار ءۇشىن تۇرعىنجايلار، ساياجاي قۇرىلىستارى، گاراجدار بويىنشا سالىقتىق بازا بولىپ تابىلادى (سالىق كودەكسىنىڭ 529-ب.1-ت.).

اۋىل شارۋاشىلىق ماقساتىنداعى پايدالانىلمايتىن جەرلەر بويىنشا جەر سالىعىنىڭ بازالىق مولشەرلەمەلەرىن تۇزەتۋ قاي جاعدايدا جۇرگىزىلەدى؟

جەرگىلىكتى وكىلەتتى ورگانداردىڭ قازاقستان رەسپۋبليكاسىنىڭ جەر زاڭناماسىنا سايكەس پايدالانىلمايتىن اۋىل شارۋاشىلىعى ماقساتىنداعى جەرگە بازالىق جەر سالىعىنىڭ مولشەرلەمەسىن ون ەسەدەن اسىرماي ارتتىرۋعا قۇقىعى بار (سك 509-ب. 4-ت.).

2015 جىلى قوزعالتقىش كولەمى 4700 تەكشە سم. بولاتىن 2010 جىلعى Lexus ماركالى اۆتوماشينانى ساتىپ الدى دا، اناسىنىڭ اتىنا راسىمدەدى، اناسى «التىن القا» وردەنىن يەلەنگەن، ول كولىك سالىعىن تولەۋدەن بوساتىلادى  ما؟

سالىق كودەكسىنە سايكەس قوزعالتقىش كولەمى 4000 تەكشە سم. اساتىن جانە ۋاكىلەتتى ورگاندا 2013 جىلعى 31 جەلتوقساننان كەيىن قايتا رەسىمدەلگەن اۆتوموبيلدەر كولىك سالىعىن تولەۋدەن بوساتىلمايدى، سوندىقتان اتالعان نورما كورسەتىلگەن ادامدارعا قولدانىلمايدى.

2-ءشى توپتاعى مۇگەدەكتەر مەن كولىك سالىعىنان بوساتىلا ما؟

ءيا،بوساتىلادى. 2013 جىلعى 31 جەلتوقساننان كەيىن كولىك قۇرالىنىڭ مەنشىك يەسىنىڭ اۋىسۋىمەن بايلانىستى ۋاكىلەتتى مەملەكەتتىك ورگانداردا تىركەلگەن، قوزعالتقىش كولەمى 4000 تەكشە سانتيمەتردەن اساتىن جەڭىل اۆتوموبيلدەن باسقا، سالىق سالۋ وبەكتىسى بولىپ تابىلاتىن ءبىر اۆتوكولىك قۇرالى بويىنشا مەنشىگىندەگى موتوكولياسكا جانە اۆتوموبيل بويىنشا جەڭىلدىكتى پايدالانا الادى.

مۇمكىندىگى شەكتەۋلى جەكە تۇلعالار ءۇشىن مۇلىك سالىعىن جانە جەر سالىعىن ەسەپتەۋ كەزىندە قانداي سالىقتىق جەڭىلدىكتەر كوزدەلگەن؟

مۇگەدەكتەر مەنشىك قۇقىعىنداعى بارلىق سالىق سالۋ وبەكتىلەرىنىڭ جالپى قۇنىنىڭ 1500 ەسەلەنگەن مولشەردەگى ايلىق ەسەپتىك كورسەتكىشى شەگىندە مۇلىك سالىعىن تولەۋشى بولىپ تابىلمايدى.

مۇگەدەكتەر مىنالار بويىنشا: تۇرعىن-ءۇي قورى، ونىڭ iشiندە، ونىڭ جانىنداعى قۇرىلىستار مەن عيماراتتار الىپ جاتقان جەر ۋچاسكەلەرi; ءۇي ماڭىنداعى جەر ۋچاسكەلەرi; قۇرىلىس الىپ جاتقان جەردi قوسا العاندا، جەكە (قوسالقى) ءۇي شارۋاشىلىعىن جۇرگiزۋ، باعباندىق جانە ساياجاي قۇرىلىسى ءۇشiن بەرiلگەن جەر ۋچاسكەلەرi; گاراجدار ورنالاسقان جەر ۋچاسكەلەرi بويىنشا جەر سالىعىن تولەۋشى بولىپ تابىلمايدى.

جەكە تۇلالاردىڭ جەرگىلىكتى سالىق بويىنشا بەرەشەگىن قالاي تەكسەرۋگە بولادى؟

سالىقتىق بەرەشەكتىڭ، ونىڭ ىشىندە كولىك قۇرالىنا سالىعى بويىنشا بەرەشەكتىڭ بار جوعىن مەملەكەتتىك كىرىستەر كوميتەتىنىڭ (www.kgd.gov.kz) سايتىندا «ەلەكتروندى قىزمەت» - «سالىقتىق بەرەشەكتىڭ جوق (بار) ەكەنى تۋرالى مالىمەت» بولىمىندە جسن ەنگىزۋ ارقىلى، سونداي-اق «ەلەكتروندى ۇكىمەت» پورتالىندا نە جەرگىلىكتى جەرى بويىنشا مكب تەكسەرۋگە بولادى.

مەملەكەتتىك كىرىستەر ورگانى مۇلىك جانە كولىك قۇرالى بويىنشا دەرەكتەر قورىن وزەكتەندىرۋ ءۇشىن قانداي ءىس-شارالار جۇرگىزۋدە؟

قازىرگى ۋاقىتتا مەملەكەتتىك كىرىستەر ورگاندارى ۋاكىلەتتى ورگاندارمەن دەرەكتەر قورىن وزەكتەندىرۋدى جۇرگىزۋدە. مەنشىك يەلەرى تۋرالى مالىمەتتەر ناقتىلانۋدا، سونداي-اق وسىنداي مالىمەتتەرگە تالداۋ جاسالۋدا. قر ءىىم، قر ءام، قر اشم كۋزر، «ازاماتارعا ارنالعان ۇكىمەت» كەاق اقپاراتتىق جۇيەلەرىمەن ءوزارا ونلاين ءىس-قيمىل 2019 جىلعى 4-توقسانعا جوسپارلانۋدا. بۇل شارا سالىق تولەۋشىلەردەن كەلىپ تۇسەتىن وتىنىشتەردى قىسقارۋعا، سونداي-اق سالىق سوماسىن دۇرىس ەسەپتەۋگە مۇمكىندىك بەرەدى.

سالىقتىق راقىمشىلىق جەكە تۇلعالاردىڭ مۇلىك سالىعى، جەر جانە كولىك سالىعى بويىنشا بەرەشەكتەرىنە اسەر ەتەدى مە؟

ءيا، تاراتىلادى. بۇل رەتتە الدىڭعى كەزەڭ ىشىندە جەكە تۇلعادا قالىپتاسقان سالىقتىق مىندەتتەمەلەر بويىنشا 2019 جىلعى 31 جەلتوقسانعا (قوسا العاندا) دەيىنگى مەرزىمدە قارىزدىڭ نەگىزگى سوماسىن تولەگەن جاعدايدا ايىپپۇلدار مەن ءوسىمپۇلدار سوماسى راقىمشىلىققا جاتادى.

سوڭعى جاڭالىقتار