4 قازان, 10:16 595 0 ادەبيەت انار لەپەسوۆا

لوندوندا اباي مۇرالارى ۇلىقتالدى

لوندوندا قازاقتىڭ ۇلى اقىنى ابايدىڭ 175 جىلدىعىنا ارنالعان جيىن ءوتتى. قازاق ويشىلىنىڭ مۇرالارى ۇلىقتالعان شارا ەۋرازيالىق مادەنيەت اپتالىعى اياسىندا ۇيىمداستىرىلدى.

«اباي مۇراسى تەك قازاقستان حالقىنا عانا ەمەس، بۇكىل ادامزاتقا ورتاق. ونىڭ ەسىمى ءھام شىعارمالارى اعىلشىن اقىنى جانە دراماتۋرگى شەكسپيردىڭ ەڭبەكتەرىمەن ءبىر قاتاردا تۇرادى». بۇل بريتانيالىق زيالى قاۋىم وكىلدەرىنىڭ پىكىرى. كەزدەسۋ بارىسىندا جازۋشىلار، اقىندار جانە ادەبي اۋدارماشىلار ۇلى ويشىلدىڭ شىعارمالارىنان قانداي عيبرات العاندارىن ايتتى.

بەستسەللەرگە اينالعان عىلىمي-كوپشىلىك كىتاپتاردىڭ اۆتورى، دراماتۋرگ، اقىن، كومپوزيتور جانە ادەبي اۋدارماشى دجون فارندون: «اباي قوعامنىڭ العا جىلجۋى ءۇشىن كوپ نارسە جاسادى. وزىنەن كەيىن وشپەس رۋحاني مۇرا قالدىردى. مەنىڭ ويىمشا، ابايدىڭ 175 جىلدىعى قارساڭىندا ونىڭ شىعارماشىلىعى تۋرالى باتىستا كوبىرەك ايتىپ، ەسىمىن ناسيحاتتاي بەرۋىمىز كەرەك»، - دەپ اتاپ ءوتتى.

كەزدەسۋگە ەۋرازيانىڭ كوپتەگەن ەلدەرىنەن جازۋشىلار مەن اقىندار كەلدى. قىرعىزستان، تاجىكستان، رەسەي جانە مولدوۆا مەملەكەتتەرىنىڭ وكىلدەرى ابايدىڭ وتكەن عاسىردا ايتقان ويلارى قازىر دە وزەكتى ەكەندىگىن اشىپ ايتتى.

«اقىن شىعارمالارى ومىرلىك قۋات بەرەدى جانە وقىرماننىڭ دۇنيەتانىمىن وزگەرتەدى»، - اتاپ ءوتتى قوناقتار. قازاقستاندىق وكىلدەر ءوز كەزەگىندە ابايدىڭ 175 جىلدىعىنا جوسپارلانعان مادەني ءىس-شارالاردىڭ اۋقىمى كەڭ ەكەنىن، بۇعان ەلىمىزدە جۇزەگە اسىرىلىپ جاتقان «رۋحاني جاڭعىرۋ» باعدارلاماسىنىڭ ىقپالى زور ەكەنىن ايتتى.

«ابايدى زەرتتەپ جۇرگەن قازاق ادەبيەتىنىڭ كورنەكتى وكىلدەرىنەن باسقا، باسقا سالانىڭ دا مىقتى عالىمدارى بار. مەن وسى جولى ەكونوميست ورازالى سابدەننىڭ اقىندى وزىنشە زەرتتەپ، اباي الەمى ارقىلى قازاقستاندى قالاي جوعارى دەڭگەيگە كوتەرۋگە بولاتىنىن جازعان ەڭبەكتەرى تۋرالى بولىسكىم كەلىپ وتىر»، - دەدى باسقوسۋدا ەۋرازيالىق شىعارماشىلىق گيلدياسىنىڭ مۇشەسى، ادەبي اگەنت باقتىگۇل ماحانبەتوۆا.

سوڭعى جاڭالىقتار