3 قازان, 22:28 359 0 ايماق انار لەپەسوۆا

"بىزگە مالسىڭدار دەيدى": الماتى وبلىسىندا مۇعالىمدەر كورگەن قورلىقتارىن ايتىپ بەردى

الماتى وبلىسىندا مەكتەپ مۇعالىمدەرى ساباق وتكىزۋدەن باس تارتتى. ولار ديرەكتوردىڭ ورىنباسارىنان كورگەن قورلىقتارىن ايتىپ، شۋ شىعاردى. ايتۋلارىنشا، ديرەكتور ورىنباسارى اقشا جيناپ، كەمسىتىپ، نەگىزسىز ايىپپۇل سالاتىن كورىنەدى، دەپ حابارلايدى كتك ارناسى.

«ول ەشكىمدى تىڭدامايدى. مەكتەپتە ءوزى قۇداي، ءوزى سوت. ويىنا كەلگەنىن جاساپ، اقشا جينايدى. كوميسسيا كەلەتىن بولسا، ءتىزىم بويىنشا شاقىرىپ، اقشا تالاپ ەتەدى. ول مۇندا جۇمىس ىستەمەۋى كەرەك دەپ سانايمىن»، - دەيدى مۇعالىمدەردىڭ ءبىرى وكسانا باباحانوۆا.

العا اۋلىنداعى ورتا مەكتەپ ديرەكتورىنىڭ ورىنباسارى بۇل قىزمەتكە 10 جىل بۇرىن كەلگەن. مۇعالىمدەردىڭ سوزىنشە، وسى ۋاقىت ىشىندە 8 ديرەكتور اۋىسىپتى. پەداگوگتار كۇن سايىن ديرەكتوردىڭ ورىنباسارىنىڭ داۋىس كوتەرۋى مەن تارتىپسىزدىككە توزۋگە ءماجبۇرمىز دەيدى.

ال 30 جىلدىق تاجىريبەسى بار باستاۋىش سىنىپ مۇعالىمى توتى ىنتىقباەۆا اي سايىنعى جالاقىسىن دا تولىق المايتىنىن ايتادى.

«ول اتا-انالاردىڭ الدىنا ءبىزدى توپاس دەپ ايتادى. مۇعالىمدەردى كابينەتىنە شاقىرىپ الىپ، «مالسىڭدار» دەپ سويلەيدى. مەن 200 مىڭ تەڭگەدەن اسا جالاقى الۋىم كەرەك. الايدا قولىما تەك 160 مىڭ تەڭگە تيەدى. وسىلاردىڭ بارىنەن كەيىن ديرەكتوردىڭ ورىنباسارىن قىزمەتىنەن شەتتەتتى. الايدا كەشە ديرەكتور ونىڭ قىزمەتىنە قايتىپ كەلەتىنىن ايتتى»، - دەيدى توتى ىنتىقباەۆا.

ال مەكتەپ ديرەكتورى ءوز ورىنباسارىنى قىزمەتىنەن بوساتىلىپ، ارتىنان قايتا تاعايىندالعانىن جوققا شىعارمايدى.

«ايگۇل تۋارشيەۆا 5 قىركۇيەككە دەيىن تالاپ ەتىلگەن ەسەپ، ساباق كەستەسى، وقۋ-تاربيە جۇمىستارىنىڭ جوسپارىن تاپسىرعان جوق. سول ءۇشىن ونى قىزمەتىنەن شەتتەتۋىمە تۋرا كەلدى. الايدا سول كەزدە ول دەنساۋلىعىنا بايلانىستى ەڭبەككە جارامسىزدىق دەمالىسىندا بولدى. سوندىقتان وعان قىزمەتىن قايتارۋعا ءماجبۇر بولدىم»، - دەيدى مەكتەپ ديرەكتورى جازيرا بالاحان.

ديرەكتور قىزمەتتىك تەكسەرىس جۇرگىزۋگە ۋادە ەتتى. الايدا مۇعالىمدەر مۇنىڭ تيىمدىلىگىنە كۇمانمەن قارايدى. ولار سىبايلاس جەمقورلىققا قارسى ءىس-قيمىل ۇلتتىق بيۋروسىنا دا شاعىمدانعاندارىن، بىراق ناتيجەسىز بولعانىن ايتادى.

ال ديرەكتوردىڭ ورىنباسارى مۇعالىمدەر جالا جاۋىپ وتىر دەيدى. سوزىنشە، ونى قاتال باسقارۋشى بولعانى ءۇشىن ۇناتپايدى ەكەن.

«مۇنىڭ ءبارى جالا. ونى ءبىر الاياق ايەل ۇيىمداستىرىپ وتىر. مەنى قىزمەتىمنەن بوساتۋ ءۇشىن مۇمكىن ەمەس نارسەنى تالاپ ەتۋدە. مەكتەپتەن كەتكەنىمدى قالايدى. بۇل مەنىڭ تۋعان اۋلىم بولسا، قالاي كەتەمىن؟» - دەيدى ديرەكتوردىڭ ورىنباسارى ايگۇل تۋارشيەۆا.

اۋداندىق ءبىلىم  بولىمىندەگىلەر مەكتەپتە تەكسەرىس جۇرگىزىلىپ، ديرەكتوردىڭ ورىنبسارىنىڭ تاراپىنان بۇزۋشىلىقتار انىقتالماعانىن مالىمدەدى.

«بۇل شاعىمدار ەكى تۇلعانىڭ ديرەكتوردىڭ وقۋ ءىسى بويىنشا ورىنباسارى ايگۇل تۋارشيەۆا مەن باستاۋىش سىنىپ مۇعالىمى توتى ىنتىقباەۆانىڭ بىربىرىنە جازعان شاعىمدارى. كوميسسيانىڭ شەشىمى بويىنشا، بۇل ەكى ادامنىڭ اراسىنداعى بىربىرىنە دەگەن تۇسىنىسپەۋشىلىك. بۇل جاعداي مەكتەپتىڭ وقۋ تاربيە ۇردىسىنە جانە پەداگوگيكالىق احۋالدىڭ ۋشىعۋىنا اكەپ سوعۋى مۇمكىن. ونىڭ اقيقاتىنا ءبىز جەتە المادىق»، - دەيدى ەڭبەكشىقازاق اۋدانى ءبىلىم ءبولىمىنىڭ باسشىسى باتەس امانوۆا.

سونىمەن قاتار اۋداندىق ءبىلىم بولىمىندەگىلەر بۇل داۋعا ارالاسقىسى كەلمەيتىندەرىن جەتكىزىپ، مەكتەپتە قوسىمشا تەكسەرىس جۇرگىزىلمەيتىنىن ايتتى. ال مۇعالىمدەرگە سوتقا جۇگىنۋدى ۇسىندى. الايدا مۇعالىمدەر ءبىلىم مينيسترلىگىنە شاعىمدانامىز دەپ وتىر.

سوڭعى جاڭالىقتار