3 قازان, 16:00 525 0 سپورت دينارا مىڭجاسارقىزى

بەكزات ساتتارحانوۆ تۋرالى فيلم كورەرمەنگە جول تارتتى

«حابار» اگەنتتىگىنىڭ تاپسىرىسىمەن سيدنەي وليمپياداسىنىڭ چەمپيونى مارقۇم بەكزات ساتتارحانوۆ تۋرالى كوركەم فيلم جۋىردا، ەلىمىزدىڭ ۇلكەن ەكراندارىنان كورەرمەنگە جول تارتادى، دەپ حابارلايدى قازاقپارات.

كارتينادا جاسىنداي جارق ەتكەن جاس عۇمىر – بەكزاتتىڭ ءومىرى مەن سپورتتاعى جەتىستىگى كەڭىنەن سۋرەتتەلەدى.تۋىندىنىڭ رەجيسسەرى - مۇرات بيدوسوۆ، ستسەناريىن سەرجان زاكەرۇلى جازعان. «بەكزات» دراماسىن 3 قازاننان باستاپ،ياعني بۇگىننەن باستاپ ەلىمىزدىڭ كينوتەاترلارىنان تاماشالاي الاسىزدار . ءفيلمنىڭ سيۋجەتتىك جەلىسىندە بەكزات ساتتارحانوۆ ءومىرىنىڭ ءۇش كەزەڭى قامتىلادى. بالالىق شاعى، بوز بالا كەزەڭى جانە ءومىرىنىڭ سوڭعى ءساتى. 90 جىلداردىڭ باسىنداعى قيىن-قىستاۋ زامانعا تاپ كەلگەن بەكزاتتىڭ بالالىعى كوپ قيىندىقتارمەن وتەدى. تۇركىستان قالاسىنداعى تەمىر جولدى بويلاي ورنالاسقان شاعىن اۋىلدىڭ قاراپايىم تىرشىلىگى بالا بەكزاتتىڭ كوزىمەن بەينەلەنەدى. ونىڭ ارمانى، نامىسقوي ءبىتىمى ءار ءبىر ساتتە سىنالىپ وتىرادى. بىردە اتا-اناسى بەكزاتتى كۇرەسكە قاتىسسىن دەپ باپكەرگە اپارادى. وندا بەكزات ءوزىنىڭ سەرگەكتىگىمەن كوزگە تۇسەدى. دەگەنمەن كۇرەسكە قاتىسقان بالانىڭ بويى وسپەي قالادى دەگەن تۇسىنىكپەن ونى بوكسقا اۋىستىرادى. باپكەرىمەن تانىسقان كۇننەن باستاپ، بۇل سپورت تۇرىنە ەرەكشە زەيىنى اشىلعان بەكزات - كۇن سايىن ەرىنبەي جاتتىعىپ، العاش رەت تۇركىستاندا وتكەن سايىستا جۇلدەلى ورىنعا يە بولادى. بوز بالا شاعىندا گەرمانيادا وتكەن تۋرنيردە توپ جارىپ، باپكەرلەر وليمپياداعا دايارلاۋ جاتتىعۋلارىنا قابىلدايدى. 1999 جىلى تاشكەنتتە وتكەن بۇكىل ازيا بىرىنشىلىگىندە كۇمىس جۇلدەگە يە بولىپ، وليمپيادا ويىندارىنا جولداما الادى.

سولاي 2000 جىلى سيدنەيدە تارتىستى ويىندار وتكىزىپ، التىن مەدالدىڭ يەگەرى اتانادى. ءفيلمنىڭ ءتۇسىرىلىم جۇمىستارى تۇركىستان، الماتى جانە ىستامبۇل قالالارىندا وتكەن. باستى ءرولدى جاس اكتەر سامات ازىمقۇلوۆ سومدايدى. ول 2006-2007 جىلدارى كيكبوكستان جاستار اراسىندا ەكى رەت قازاقستان چەمپيونى بولعان. سونىمەن قاتار تۋىندىدان عالىمبەك وسپانوۆ، مۇرات جارىلقاسىنوۆ، مايرا ماقۇلبەكوۆا، دۋلىعا اقمولدا، قۋانىش مۇقاتاي، باقداۋلەت شايماحان جانە باسقا دا اكتەرلەردى كورە الاسىزدار. 3 قازاننان باستاپ ەلىمىزدىڭ كينوتەاترلارىنان بەكزات ساتتارحانوۆ تۋرالى «بەكزات» كوركەم ءفيلمىن تاماشالاۋعا شاقىرامىز.

سوڭعى جاڭالىقتار