2 قازان, 14:11 390 0 زاڭ انار لەپەسوۆا

رەسەيلىك الاياقتار جەلى ارقىلى قازاقستاندىقتاردىڭ 200 ملن تەڭگەسىن جىمقىرعان

رەسەيلىك الاياقتار قازاقستاندىق بانكتىك شوتتارعا قول جەتكىزۋ ءۇشىن ينتەرنەتتەگى جارنامانى پايدالانا وتىرىپ، 200 ميلليون تەڭگەنى قولدى قىلعان. بۇل تۋرالى ماجىلىستە ىشكى ىستەر ۆيتسە-ءمينيسترى مارات قوجاەۆ ايتتى. 

پارلامەنت ءماجىلىسىنىڭ جالپى وتىرىسىندا دەپۋتات ارتۋر پلاتونوۆ ەلىمىزدىڭ ازاماتتارىنىڭ مۇلكىنە قاتىستى رەسەي اۋماعىندا جاسالعان 42 قىلمىستىق ءىس تەرگەلىپ جاتقانىن اتاپ ءوتتى.

اتاپ ايتقاندا، الاياقتىق جولمەن جانە اقپاراتتىق تەحنولگيالاردى پايدالانۋ ارقىلى بانك شوتتارىنان قازاقستاندىقتاردىڭ اقشاسى جىمقىرىلعان.

"42 قىلمىسقا توقتالساق، شىنىمەن دە قازاقستاننىڭ ىشكى ىستەر مينيسترلىگى تاراپىنان رەسەي اۋماعىندا جاسالعان قىلمىستىق ءىس تەرگەپ جاتىر. بۇل قىلمىسقا كۇدىكتى الاياقتار انىقتالماي جاتىر.

ولار جەلىدەگى جالعان جارنامالىق مۇمكىندىكتەردى پايدالانا وتىرىپ، ءبىزدىڭ ازاماتتاردىڭ شوتتارىنا قول جەتكىزىپ جۇرگەن. وسى ورايدا ەلەكتروندى تاسىلدەرمەن قازاقستاندىقتاردىڭ اقشاسىن رەسەي اۋماعىنا اۋدارعان، شامامەن 200 ميلليونعا جۋىق.

مەنىڭ بىلۋىمشە، بۇل قارجى ماسكەۋ، سانك-پەتەربور، ۋفا جانە بىرنەشە قالانىڭ اۋماعاندى شىعارىلىپ الىندى. ءبىز مينسك كونۆەنتسياسىنا سايكەس، بانكتەردە اقشانى شىعارىپ العان ادامدارعا قاتىستى ۆيدەونى ۇسىنۋ تۋرالى ساۋال جولدادىق", - دەدى مارات قوجاەۆ.

ونىڭ ايتۋىنشا، بۇل باعىتتاعى راسىمدەر بىرنەشە ايعا سوزىلۋدا.

"كەلىسۋ راسىمدەرى ءبىزدىڭ ورگاندار اراسىندا وتكەنشە، كەيىن قازاقستاننىڭ باس پروكۋراتۋراسى ارقىلى، سوندان كەيىن رەسەيدىڭ باس پروكۋراتۋراسىنان وتكىزىلگەنشە، ياعني بۇل اتقارىلاتىن جۇمىستار شامامەن ەكى ايعا جالعاسادى. وزدەرىڭىز بىلەسىزدەر، وسى ۋاقىت ىشىندە ۆيدەو ماتەريالداردى ساقتاۋ مەرزىمى ءوتىپ كەتەدى.

قازىرگى كەزدە كەيبىر فاكتىلەر بويىنشا قاجەتتى ۆيدەو-جازبالار ساقتالماعانى حابارلاندى. سوندىقتان بۇگىن ماجىلىستە قارالعان قۇجات وسى تەكتەس ماسەلەلەرگە جەدەل ارەكەت ەتۋگە مۇمكىندىك بەرەدى", - دەدى م. قوجاەۆ.

سوڭعى جاڭالىقتار