28 قىركۇيەك 2019, 11:07 776 0 ەكونوميكا انار لەپەسوۆا

«قازاگرو» 1100 قىزمەتكەرىن قىسقارتپاق

سوڭعى كەزدەرى باسى داۋدان ارىلماعان «قازاگرونىڭ» ءۇش ەنشىلەس كومپانياسى جابىلادى. سونىڭ ارقاسىنا 3 ميلليارد تەڭگەدەن استام قاراجات ۇنەمدەلمەك. اۋىل شارۋاشىلىعى ءمينيسترى ساپارحان وكسىكباەۆ بۇل تۋرالى بۇگىن سەناتتا ءمالىم ەتتى، دەپ حابارلايدى كتك ارناسى. 

"بۇرىن «قازاگرو» قۇرامىندا 7 ەنشىلەس كاسىپورىن بولسا، ساراپتاۋدان كەيىن ونىڭ ەكەۋىن جاۋىپ، بىرەۋىن «اگرونەسيەلىك كورپوراتسياسىنا» قوساتىن بولدىق. ويتكەنى ولار ءبىربىرىنىڭ جۇمىسىن قايتالايدى. ناتيجەسىندە «قازاگرونىڭ» 1100 ادامى قىسقارىپ، 3,2 ميلليارد تەڭگە ۇنەمدەلەدى", - دەيدى اۋىل شارۋاشىلىعى ءمينيسترى ساپارحان وكسىكباەۆ.

«قازاگرونىڭ» باتپاققا باتىپ قالعانىنا ءبىراز بولدى. جىل باسىنداعى ەسەپ بويىنشا، ءىرى حولدينگتىڭ قارىزى 400 ميلليارد تەڭگەگە جەتىپ جىعىلعان. انىق بولعانى، بۇل 2013-2018 جىلدار ارالىعىندا قابىلدانعان شەشىمدەردىڭ قورىتىندىسى ەكەن.

مامانداردىڭ ايتۋىنشا، ءىرى كومپانيانىڭ مۇنداي جاعدايعا تۇسۋىنە نەگىزىنەن 2 جاعداي اسەر ەتكەن. ءبىرى – تەڭگە دەۆالۆاتسياسى، ەكىنشىسى – نەسيەلەندىرۋشى بانكتەردىڭ دەفولتقا ۇشىراۋى. قارىزعا باتىپ بەرەكەسى قاشقان حولدينگتىڭ ءوزى عانا. ال ەنشىلەس كومپانيالارى تۇراقتى تابىس اكەلىپ جاتىر دەيدى ماماندار.

 

سوڭعى جاڭالىقتار