26 قىركۇيەك, 11:15 553 0 ەكونوميكا انار لەپەسوۆا

نان قىمباتتاي ما؟

بيىل رەسپۋبليكا بويىنشا ەگىس القاپتارىنىڭ كولەمى 22,2 ملن گەكتاردى قۇرادى. ونىڭ ىشىندە بيداي 6 ملن گەكتار اۋماققا سەبىلدى. ەگىس ناۋقانى وڭتايلى مەزگىلدە جۇرگىزىلىپ، ديقاندار ساپالى قۇرال، قاجەتتى تەحنيكامەن قامتىلعانىمەن، بيىل استىق جىلداعىداي بىتىك شىقپادى.

شىلدەنىڭ ىستىعىندا بىرقاتار ەگىس القاپتارى كۇيىپ كەتتى. قۇرعاقشىلىقتان قوستانايدىڭ 8 اۋدانىنىڭ القاپتارى قاتتى زارداپ شەكتى. مامانداردىڭ ايتۋىنشا، بيدايدىڭ ونىمدىلىگى ورتاشا ەسەپپەن گەكتارىنا 4-5 تسەنتنەردەن اسپاعان. بۇدان بولەك كوپتەگەن ەگىستىك جەرلەرىنىڭ توپىراعى قۇنارسىزدانىپ كەتكەن.

اگروونەركاسىپتىك كەشەندى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى – ازىق-تۇلىك تاۋارلارى يمپورتىن 400 ميلليونعا دەيىن تومەندەتۋدى كوزدەگەن ەدى. بۇل تىزىمگە استىقتى جاتقىزامىز.

– نان باعاسى كوتەرىلمەۋى ءۇشىن «ازىق-تۇلىك كەلىسىم-شارت كورپوراتسياسى» استىقتى ساتىپ الۋ ناۋقانىن جاريالادى. ونىڭ قۇنى تونناسىنا 62 مىڭ تەڭگە. بىراق بۇل كولەمدى كوتەرۋ قاراستىرىلىپ جاتىر. ال نان باعاسىنا كەلسەك، ازىرگە 75-78 تەڭگە شاماسىندا بولىپ قالا بەرەدى. قازىر ناننىڭ قۇنى قانشاعا كوتەرىلەتىنىن ءدوپ باسىپ ايتۋ قيىن. ويتكەنى ونىڭ باعاسى ءار وڭىردە ءارتۇرلى. شارۋالار بيدايدى ءوز باعاسىمەن ساتقانىمەن، ناۋبايحاناشىلار قۇنىن قىمباتتاتىپ جىبەرۋى مۇمكىن. ءبىز ارينە باعانى قازىرگى كۇيىندە ۇستاپ قالۋعا تىرىسامىز. بۇعان جەرگىلىكتى اكىمشىلىك جانە ساۋدا مينيسترلىگى دە جاۋاپتى بولۋى كەرەك، – دەدى ايداربەك ساپاروۆ.

مينيسترلىكتەگىلەر ازىرگە نارىق باعاسى تۇراقتى دەپ سەندىرگەنىمەن، ەلىمىزدىڭ استىق وڭدەۋشىلەر قاۋىمداستىعى كۇنى كەشە بيداي باعاسىنىڭ شامادان تىس قىمباتتاپ كەتكەنىن ايتىپ دابىل قاقتى. سونىڭ سالدارىنان ۇننىڭ دا باعاسى جىلداعىعا قاراعاندا شارىقتاعان. قاراعاندى وبلىسىندا 24 ديىرمەن بولسا، قازىر ونىڭ بارلىعى دا بيدايدىڭ جوقتىعىنان قاڭتارۋلى تۇرعان كورىنەدى. استىقتىڭ جەتىسپەۋشىلىگى مەن باعانىڭ تۇراقسىزدىعىن شەشۋ ءۇشىن قاۋىمداستىق مۇشەلەرى وسى سالاداعى شيكىزات ەكسپورتتاۋ جۇمىستارىن رەتتەۋدى ءوتىنىپ وتىر. سونداي-اق كاسىپكەرلەر سىرتقى نارىقتا وزدەرىنىڭ بارىنشا قورعالعانىن قالايدى. استىق وڭدەۋشىلەر قاۋىمداستىعىنىڭ مۇشەلەرى وسى ماسەلەنى دە كوتەرىپ، ۇكىمەتكە حات دايىنداۋدا.

استىقتىڭ قىمباتتاۋىنا بايلانىستى ۇننىڭ قۇنىن دا كوتەرۋگە ءماجبۇر بولدىق دەيدى قاراعاندىلىق ديىرمەنشىلەر. ماسەلەن، بىلتىر ءبىر قاپ جوعارى سۇرىپتى ۇن 4 مىڭ تەڭگە بولسا، قازىر 5 مىڭ تەڭگەدەن اسىپ جىعىلعان. «بىلتىر وسىنداي ۋاقىتتا بيدايدىڭ 1 تونناسى 43 مىڭ تەڭگەدەن ساتىلعان. بيىل ەندى 64 مىڭ تەڭگەدەن باستالدى دا، قازىر 70 مىڭ تەڭگەگە جەتتى. قوستاناي جاقتا ءتىپتى 75 مىڭ تەڭگەگە دەيىن قىمباتتاپ كەتكەنىن ەستىدىك. سوندىقتان ءبىز، ديىرمەنشىلەر امالدىڭ جوقتىعىنان ۇننىڭ باعاسىن ءبىراز كوتەردىك.      ۇن – ەلگە ەڭ كەرەكتى ءونىم. حالىققا اۋىر بولاتىن بولدى»، – دەيدى قاراعاندىلىق ۇن كومبيناتىنىڭ ديرەكتورى دوس-مۇقاسان تاۋكەباەۆ.

نان – بەرەكە باستاۋى. ەلدەگى تىنىشتىق پەن تۇراقتىلىقتىڭ كەپىلى – توقشىلىق. سوندىقتان استىق ماسەلەسى سالعىرتتىقتى كوتەرمەيدى.

سوڭعى جاڭالىقتار