24 قىركۇيەك, 11:21 494 0 ساياسات انار لەپەسوۆا

ەلباسى: حالىق بۇلىڭعىر جولدا كوش باستاۋىما سەنىم ارتتى

ەۋرازيا ەلدەرى پارلامەنتتەرى توراعالارىنىڭ IV كەڭەسىندە ءسوز سويلەگەن ەلباسى نۇرسۇلتان نازارباەۆ ەلىمىزدىڭ تاۋەلسىزدىك جىلدارىنداعى جەتىستىكتەرىنە توقتالدى. 

«قۇرمەتتى كەڭەسكە قاتىسۋشىلار، قادىرمەندى قوناقتار! ەۋرازيا جۇرەگىندەگى ۇلى دالا ەلىنە، قوناقجاي قازاق ەلىنە قوش كەلدىڭىزدەر! پارلامەنت سپيكەرلەرىنىڭ بۇگىنگى باس قوسۋىن قازاقستان استاناسىندا وتكىزىپ وتىرعانىنىمىزعا قۋانىشتىمىز. اتاپ ايتقاندا، وسى جيىنعا ازيا مەن ەۋروپانىڭ 60-تان استام ەلىنىڭ دەلەگاتسيالارى، 16 حالىقارالىق ۇيىم وكىلدەرى كەلىپ وتىر. وسى كەڭەستىڭ تابىستى جۇمىس ىستەۋىنە بارشامىز مۇددەلىمىز. كەلگەندەرىڭىزگە ريزاشىلىعىمىزدى بىلدىرەمىز. زاڭ شىعارۋ ورگانىنىڭ قىزمەتىنە زور ءمان بەرەمىز. قازاقستان دەپۋتاتتارى ارىپتەستەرىمەن كەڭ اۋقىمدى بايلانىستى ورناتىپ، مەملەكەتارالىق دوستىقتى نىعايتا ءتۇستى. ەلدەرىمىزدىڭ جوعارى وكىلدى ورگاندارىنىڭ دەپۋتاتتارى ەۋرازياداعى ىنتىماقتاستىق اياسىن ودان ارى كەڭەيتەدى دەپ سەنەمىن»، - دەدى كەڭەس بارىسىندا ءسوز العان نۇرسۇلتان نازارباەۆ.

وسىندا كەيىن ەلباسى كەڭەس وداعى ىدىراعاننان كەيىن تاۋەلسىزدىگىن العان الەمدە جەر كولەمى بويىنشا 9-ورىندى يەلەنەتىن قازاقستاننىڭ دامۋ جولىنا توقتالىپ ءوتتى.

«ەلدىڭ تۇڭعىش پرەزيدەنتى رەتىندە 30 جىلعا جۋىق ۋاقىت بويى قازاقستان رەسپۋبليكاسى دەپ اتالاتىن مەملەكەتتى قۇرۋ، ەلدى باسقارۋ باقىتى بۇيىردى. وسىنشاما ۋاقىت بويى حالىق ماعان ەلدى بۇلىڭعىر جولدا كوش باستاۋىما سەنىم ارتتى. وسىنشاما ۋاقىت ەلدى باسقارىپ كەلىپ، بيىل ءوز ەركىممەن وكىلەتتىگىمىزدى توقتاتۋ تۋرالى شەشىم قابىلدادىم. ارنايى قابىلدانعان زاڭعا سايكەس، ەلباسى – تۇڭعىش پرەزيدەنت مارتەبەم بار جانە قازىر ونى جۇزەگە اسىرىپ جاتىرمىن»، - دەدى قر تۇڭعىش پرەزيدەنتى.

نۇرسۇلتان نازارباەۆ قازاقستاننىڭ 1991 جىلدان بەرگى جەتىستىكتەرىنە توقتالدى. وسى ۋاقىتتىڭ ىشىندە ەلىمىز الەمنىڭ دامىعان 50 ەلىنىڭ قاتارىنا قوسىلعانىن، جالپى ىشكى ءونىم 18 ەسە وسكەنىن، رەسپۋبليكا ەكونوميكاسىنىڭ كولەمى بۇكىل ورتالىق ازيا ەلدەرىنىڭ ءجىو-سىنەن 2 ەسە اسىپ تۇسەتىندىگىن، حالىقتىڭ جان باسىنا شاققانداعى تابىسى دوللارمەن ەسەپتەگەن 9 ەسە ارتقانىن، كەدەيشىلىك دەڭگەيى 40 پايىزدان 4 پايىزعا دەيىن تومەندەگەنىن، سوڭعى 20 جىلدا 320 ملرد دوللار تىكەلەي شەتەل ينۆەستيتسياسى تارتىلعانىن اتاپ ءوتتى.

سوڭعى جاڭالىقتار