23 قىركۇيەك, 10:19 554 0 قاۋىپسىزدىك دينارا مىڭجاسارقىزى

ميتينگتە ونداعان ادام ۇستالدى

 قازاقستان پوليتسياسى ۇكىمەتكە قارسى ميتينگتە ونداعان ادامدى ۇستاعان. نۇر-سۇلتان مەن الماتىدا 21 قىركۇيەك كۇنى بولماق "رۇقسات ەتىلمەگەن ميتينگى كەزىندە" 57 ادام ۇستالدى دەپ حابارلادى قازاقستان ىشكى ىستەر مينيسترلىگى.

بۇل ادامداردىڭ "زاڭ بۇزعانى ءۇشىن ۇستالىپ، ولاردى اكىمشىلىك جاۋاپكەرشىلىككە تارتۋ ماسەلەسى قاراستىرىلىپ جاتقانى" ايتىلعان مينيسترلىك حابارلاماسىندا. وندا تاعى "پروكۋراتۋرانىڭ ەسكەرتۋىنە قاراماستان جەكەلەگەن ازاماتتاردىڭ تىيىم سالىنعان ەكسترەميستىك ۇيىمنىڭ ارانداتۋ ارەكەتتەرىنە ەرىپ كەتكەنى" جازىلعان.

"كەيبىرى قۇقىق قورعاۋ قىزمەتكەرلەرىنە قارسى ارەكەت ەتە باستادى، وسىلايشا وزگە ازاماتتاردىڭ قاۋىپسىزدىگى مەن تىنىشتىعىنا، جول قوزعالىسىنا قاۋىپ ءتوندىردى" دەلىنگەن مينيسترلىك مالىمەتىندە.

21 قىركۇيەكتە الماتى، نۇر-سۇلتان جانە شىمكەنتتە "رۇقسات ەتىلمەگەن ميتينگ" ءوتىپ، پوليتسيا ونداعان ازاماتتى ۇستادى.

وقيعا ورنىندا بولعان ازاتتىق تىلشىلەرىنىڭ حابارلاۋىنشا، نۇر-سۇلتاندا پوليتسيا ۇستاۋ كەزىندە كەيبىر تۇرعىندارعا دورەكىلىك تانىتىپ، اۆتوبۋسقا يتەرىپ كىرگىزگەن. ۇستالعانداردىڭ ءبىرى پوليتسيا اۆتوبۋسىنىڭ تەرەزەسىن سىندىرىپ، قاشىپ كەتپەك بولعان. بىراق پوليتسەيلەر قايتا ۇستاپ العان.

ازاتتىق ءتىلشىسىنىڭ مالىمەتى بويىنشا تاعى 20 شاقتى ادام شىمكەنتتە ۇستالعان.

سوڭعى جاڭالىقتار