22 قىركۇيەك, 02:09 554 0 سپورت دينارا مىڭجاسارقىزى

بەكزات نۇرداۋلەتوۆ – الەم چەمپيونى

رەسەيدىڭ ەكاتەرينبۋرگ قالاسىندا ءوتىپ جاتقان بوكستان الەم چەمپيوناتىندا 81 كەلى سالماقتا قازاقستاندىق بوكسشى جەڭىمپاز بولدى. قازاقستاندىق بەكزات نۇرداۋلەتوۆ فينالدا وزبەكستاندىق بوكسشى ديلشودبەك رۋزمەتوۆپەن جۇدىرىقتاسىپ، تورەشىلەر شەشىمىمەن 5:0 ەسەبىن جەڭىسكە جەتتى.

وسىلايشا، قازاقستان قورجىنىنا العاشقى التىن مەدالدى سالدى. بەكزات جەكپە-جەك باستالعان ساتتەن باستاپ، ءوزىنىڭ قارسىلاسىنان ءبىر ءباس جوعارى ەكەنىن كورسەتە ءبىلدى. ەستەرىڭىزگە سالا كەتەيىك، نۇرداۋلەتوۆ جارتىلاي فينالدا 81 كەلىگە دەيىنگى سالماق دارەجەسىندە ءتورت دۇركىن الەم چەمپيونى جانە ريو-2016 وليمپيادا چەمپيونى كۋبالىق حۋليو سەسار لا كرۋستان باسىم ءتۇستى. ءتىپتى، جارتىلاي فينالدىڭ ەكىنشى راۋندىندا نۇرداۋلەتوۆ قارسىلاسىن نوكداۋنعا جىبەرگەن بولاتىن. مىنە، وتانداسىمىز وسىنداي مىقتى قارسىلاستارىنىڭ بارلىعىن جولدان تايدىرىپ، الەم چەمپيونى اتاندى.

قر مادەنيەت جانە سپورت ءمينيسترى اقتوتى رايىمقۇلوۆا الەم چەمپيوناتىندا قازاقستان قورجىنىنا التىن مەدال سالعان بەكزات نۇرداۋلەتوۆتى قۇتتىقتادى.

"قۇرمەتتى بەكزات!
بارلىق جانكۇيەرلەرىڭنىڭ جانە جەكە ءوز اتىمنان جەڭىسىڭمەن قۇتتىقتايمىن! تورتكۇل دۇنيە كوز تىككەن باسەكەدە قارسىلاستارىڭنان ءبىر ءباس جوعارى ەكەنىڭدى ايقىن دالەلدەدىڭ. سەنىڭ التىن مەدالعا جەتۋ جولىندا 6 بىردەي بوكسشىنى جولدان تايدىرىپ، مىقتىلىعىڭدى تانىتقان بۇل جەڭىسىڭ قازاق ەلىنىڭ الەمدىك سپورتتاعى ورنىن ايعاقتاي ءتۇستى.
دەنىڭە ساۋلىق، الداعى توكيو وليمپياداسىندا دا ەلىمىزدىڭ كوك بايراعىن جەلبىرەتەر جارقىن جەڭىستەر تىلەيمىن", – دەلىنگەن قۇتتىقتاۋدا.

سوڭعى جاڭالىقتار