22 قىركۇيەك, 01:43 459 0 ونەر دينارا مىڭجاسارقىزى

بالالار مۋزىكامەن اينالىسۋى كەرەك

مادەنيەت جانە سپورت ءمينيسترى ا.رايىمقۇلوۆا ريددەر قالاسىنداعى مۋزىكا مەكتەبىنە باردى. وندا مەكتەپ ديرەكتورى م.بەستۋجەۆا مينيسترگە ۇجىمنىڭ جۇمىسى مەن الداعى جوسپارلارى جايلى باياندادى.

ا.رايىمقۇلوۆا فورتەپيانو، ۇرمەلى اسپاپتار ساباقتارىنا قاتىسىپ، بالالاردىڭ شىعارماشىلىق توپتارىمەن تانىستى. مينيستر بالالارعا مۋزىكامەن اينالىسۋدىڭ ماڭىزدىلىعى مەن قاجەتتىلىگى تۋرالى ايتىپ بەردى.
مادەنيەت جانە سپورت ءمينيسترى مەكتەپ ۇجىمىمەن كەزدەسۋىندە پرەزيدەنت قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋى جايلى، وندا كورسەتىلگەن مىندەتتەردى جۇزەگە اسىرۋ جايىندا باياندادى.

جولداۋداعى «ازاماتتار ۇنىنە قۇلاق اساتىن ۇكىمەت» جوباسى جايلى، ەلدىڭ دامۋىن بيلىك پەن قوعام اراسىنداعى ديالوگ ارقىلى قامتاماسىز ەتۋ تۋرالى باعىتتارى تالقىلاندى.
ا.رايىمقۇلوۆا مەكتەپتىڭ ماقتانىشىنا اينالعان، ءتۇرلى وبلىستىق، رەسپۋبليكالىق، حالىقارالىق بايقاۋلاردا توپ جارىپ جۇرگەن، 2-10 قازان كۇندەرى الماتى قالاسىندا وتەتىن "The Planet of ART – 2019" حالىقارالىق فەستيۆالىنە قاتىسۋعا دايىندالىپ جاتقان سانجار ساعىندىقوۆپەن كەزدەسىپ، ونەرلى دارىنعا ساتتىلىك تىلەدى.

سوڭعى جاڭالىقتار